Ta phường Tuy Hòa, Sở Văn hóa, Thể thao n’hanh Pâl nđaih n’gor Dak Lak mhe ƀư Tâm nchră uănh năl lôch jêh hăn ôp uănh pâl nđaih. Aơ lah ngoăy tâm ăp nău kan bah n’gor tâm nău nsrôih rdâk njêng săk ntơ lư “Dak Lak – Sĭt mpeh drăp ndơ ơm yău ntlơi an tay” jêng ntŭk tât lăp uĕh tâm dak n’hanh dak bah dih.

Trong ƀư hăn ôp uănh ntơm bah nar 1 tât 4/4, đah nău tât râng bah ăp doanh nghiệp hăn leo jong nar, nhih pah kan nkoch trêng nău lư, báo chí n’hanh ăp nuĭh rnâng kan, nuĭh ntoh lư, nuĭh rƀŏng leo nău lư tâm trong kan pâl nđaih tâm n’hanh bah dih dak râng. Mpôl hŏ hăn rlong uănh ta âk ntŭk tât, ndơ geh ƀư pâl nđaih ntĭt êng nkre đah văn hóa, bri dak n’hanh drăp ndơ ơm yău ntlơi an tay Dak Lak, bah nê uănh năl săk blău rhŏ dŏng, ntŭk ntô n’hanh nău dơi mât dŏng tour, trong hăn pâl. Âk nău rgop an lah, gay an ƀư săk geh, Dak Lak ân wat jêh tay ntŭk ntô ndơ dŏng, n’hao săk uĕh rhŏ dŏng, hun hao ăp ndơ geh ƀư ntĭt êng geh nău tâm ntêng lêng nkual, nkre ntrôl dăng nkoch trêng mbrô tâm nkơnh n’hơ, mât dŏng pâl nđaih. Wa Trần Hữu Phước, giám đốc công ty THP Travel Tour & Caravan Center, ta Quảng Trị an lah:

“Aƀaơ, ăp n’glah trong me nthoi đah dor yôk n’hanh ăp n’gor duyên hải miền Trung dôl hôm khuch djơh. Gâp mĭn lah ân dăp rgum n’hanh hun hao ntung trong dăng. Lah rdâk njêng dơi njăr trong dja ri gâp mĭn lah ăp mpôl caravan nthoi Dak Lak, ăp n’gor cao nguyên trung phần đah ăp n’gor duyên hải miền Trung, kơp lĕ ma Đà Nẵng n’hanh Quảng Trị ri jêng du ntŭk geh ƀư tâm ntêng lêng nsum dŭt uĕh tâm ntil pâl nđaih Caravan”.

Âk đại biểu an lah đŏng, Dak Lak ân mât dŏng ăp săk geh dơh uĕh ơm geh gay njêng luh ndơ geh ƀư pâl nđaih mhe, lơn lah ndơ geh ƀư ntĭt êng, ndơ geh ƀư pâl măng gay jong âk mông nar rlong gĭt năl, manh gŭ măng ta ntŭk. Bah meng nê, Dak Lak ân n’hao dăng tâm nkơnh n’hơ n’hanh ntrŭt ntrôl ngăch pâl nđaih tâm n’hanh bah dih dak, njêng ntŭk rgum tơm gay wăch rgum năch dak bah dih tât đah n’gor.

Tĭng Sở Văn hóa, Thể thao n’hanh Pâl nđaih Dak Lak, lôch pơk hvi ntŭk hun hao, pâl nđaih ta ntŭk geh âk ndơ gay jêng ăp trong tâm ntêng lêng đah nkual bri neh têh hvi n’hanh duyên hải. Êng quý I/2026, lam n’gor wơt nklăp 2,3 rkeh tơ̆ năch, nsĭt geh pâl nđaih rlău 4.100 rmen prăk, mât kơn tay rnoh hun hao uĕh. Wa Lê Phúc Long, Groi Giám đốc Sở Văn hóa, Thể thao n’hanh Pâl nđaih n’gor Dak Lak an gĭt, n’gor rƀŏng trong n’hao năch pâl nđaih jêng n’gâng kan wăng sa tơm khlay, tĭng kơn rdâk njêng săk ntơ lư “Dak Lak- Sĭt mpeh drăp ndơ ơm yău ntlơi an tay” jêng ntŭk wăch tât uĕh bah năch tâm n’hanh bah dih dak.

“Tâm nchră rơh dja mbra kơl n’gâng kan văn hóa, thể thao, pâl nđaih dŭt âk nkô̆, ntơm bah trong kơl, hun hao ndơ geh ƀư pâl nđaih, rƀŏng trong nkoch trêng, nkơnh n’hơ, ntrŭt ntrôl ngăch n’hanh mha êng lah ndơ ƀư gay wăch rgum năch tât đah Dak Lak, ndăn dŏng tơm ndơ mpêt khlay n’hanh ngăn geh aƀaơ bah Dak Lak”.