Ta ăp n’gor Tây Nguyên, djăt ma ăp rnôk tât Giỗ Tổ Hùng Vương – Nar jât khay Pe, bol mô plơ̆ sĭt me neh ndru me Phú Thọ mpoh nhang ta Đền Hùng, yơn  ăp nuĭh ƀon lan ta aơ mbra dơi mpoh nhang, nkah gĭt  tât n’hâm suan bah ndru me. Rlău ma ăp đền thờ Vua Hùng dơi rdâk njêng, âk ngôi đình way ơm, du đêt ntŭk pâl  nđaih, hŏ weh ƀư ntŭk tâm di  an ăp nuĭh kon dak Việt tĭng ƀư nău way mbah ndru yău bah he đŏng.

Âk năm  rlău aơ, nuĭh ƀon lan thôn 6, xã Đắk Búk So, nkuâl Tuy Đức, n’gor Dak Nông dŭt n’hao êng săk yor geh Đền thờ Hùng Vương têh uĕh, huêng khlay way n’huk dŭl ŭnh nhang. Đền thờ Vua Hùng dơi rdâk ƀư ntơm bah năm 2003, đah rnoh hvi 250m2, tă bah kônh wa ƀon tơm Phú Thọ ta xã Đắk Búk So rong êng neh, rgop prăk ƀư. Wa Chử Văn Chúc, Kruanh ban Lễ hội giỗ tổ Hùng Vương ta aơ an gĭt, ăp năm bôk năp  njêng, dơn geh nuĭh ƀon lan tâm xã Đắk Búk So tât mbah tâm ăp rnôk lễ Tết dơm, lơn lah nar Giỗ Tổ. Lôch nê, nuĭh ƀon lan ta âk ntŭk êng ƀa ƀă tâm n’gor hŏ tât dăn mbah đŏng.

“Lĕ rngôch kônh wa ndrel ƀon tơm Phú Thọ lăp ta aơ wăng sa dŭt ngai. Lơn dah nău ngai ri lơn ma nkah ƀon tơm lơn ma âk. Kơt nê ri kônh wa rong neh, kơl prăk kaih gay rdâk  njêng đền thờ lah du ntŭk mbah dăn huêng khlay. Mpôl hên rgum sĭt ta aơ, mpeh nău nuih n’hâm ri hŭch bah ir nkah ƀon tơm, gay rơh kơn jêh aơ tay ăp kon său nđơn tay rơh u che, yău ye kơt nê ma  ƀư pah kan ntŭk mbah dăn dja”.

Ta yôk Phượng Hoàng mpeh nkual pâl nđaih leng Prenn, phường 3, nkual ƀon  têh Đà Lạt, n’gor Lâm Đồng geh đền thờ ăp Vua Hùng  đŏng, dơi rdâk njêng năm 2002 tĭng kơt rup  Đền thờ Vua Hùng ta yôk Nghĩa Lĩnh, n’gor Phú Thọ. Ta aơ geh đền Thượng thờ Lạc Long Quân n’hanh Âu Cơ, đền Trung mbah dăn kađăch tâl pơh n’hanh đền Hạ mbah dăn kađăch n’glĕ dŭt bah ăp rơh Vua Hùng. Tă âk tơ̆ râng lễ Giỗ Tổ Hùng Vương ta aơ, yuh Nguyễn Thị Minh Hiếu, ta phường 3, nkual ƀon têh Đà Lạt an gĭt:

“Lah du hê nuĭh ƀon lan ta Đà Lạt, ăp năm gâp ndrel rnăk wâl  hăn tât ta aơ gay râng rơh lễ. Gâp ŭch  ăp  oh kon geh rnôk joi gĭt mpeh nău way ơm  bah rnoi nuĭh Việt Nam, nkre, lah du rnôk gay mpôl hên râng ăp nău kan văn hóa rêh jêng kon nuĭh gay rgop ƀư âk mpưm săk tơm văn hóa rnoi nuĭh Việt Nam".

Lễ Giỗ Tổ Hùng Vương dơi ƀư têh khlay ăp năm ta Ntŭk têl ơm yău gưl neh dak Đình Lạc Giao, nkual ƀon têh Buôn Ma Thuột, n’gor Dak Lak đah nău  tât râng bah ăp kruanh rđău kan n’gor, ăp n’gâng kan n’hanh ăp rơh kơn ƀon lan. Ăp nuĭh chŭn mbah chŭt nhang nkah gĭt, ƀư chon mbah bah ngai ndru yău Hùng Vương. Năm aơ, lễ Giỗ Tổ dơi ƀư huêng khlay tâm 2 nar (9 n’hanh 10 khay 3 Âm lịch) đah ăp nău  kan âk mpưm kơt nklâm bánh chưng, juh bánh dầy, Lễ Tiên thường n’hanh Lễ n’hơr an kao, play do  an Ndru yău Hùng Vương. Wa Lại Đức Đại, Groi Giám đốc Sở Văn hóa Thể thao n’hanh Pâl nđaih n’gor Dak Lak an gĭt:

          “Rnôk hăn tât đah Giỗ tổ Hùng Vương ta Đình Lạc Giao ta nkual ƀon têh Buôn Ma Thuột mô di lah djăt ma he mĭn mpeh Giỗ Tổ dơm đŏng ôh ma aơ  hôm  lah ntŭk nkrêp nău tâm rnglăp Yău – Bu lơ đŏng. Ăp năm tâm nar Giỗ Tổ 10-3, ƀon  lan dŭt n’hâm uănh khlay n’hanh tât gay mpoh nhang, dăn an neh dak đăp mpăn ƀon lan uĕh  lăng n’hanh dăn an n’hâm suan ngăch lăng dăng soih n’hanh rƀŏng tât nuih n’hâm tâm rnglăp ta ngôi đình geh nkô̆ khlay dja đŏng”.

Tĭng wa Lại Đức Đại, Đề án rdâk njêng Đền thờ Vua Hùng bah nkual Tây Nguyên ta n’gor Dak Lak tă bah Ủy ban nhân dân n’gor Dak Lak an ƀư hŏ dơi njuăl Bộ Văn hóa Thể thao n’hanh Pâl nđaih gay rblang dăn Thủ tướng Chính phủ. Đền thờ dơi rdâk ƀư tĭng trong lam nuĭh rgop ƀư ta rnoh neh hvi nklăp 20ha, ƀư ta yôk Cư Mblim, mpeh n’har xã Ea Kao, nkual ƀon têh Buôn Ma Thuột n’hanh xã Ea Tiêu, nkuâl Cư Kuin. Nău ntuh kơl rdâk njêng đền thờ Vua Hùng gay mpơl nuih n’hâm nkah gĭt jru bah nuĭh ƀon lan Tây Nguyên đah ăp rơh dâk leo lor bôk năp hŏ geh n’hâm suan rdâk njêng neh dak n’hanh mât ndray neh dak. Nkre, rhŏ dŏng nău ŭch geh ôp mbah bah ƀon  lan n’gor Dak Lak tâm ban kơt ăp n’gor Tây Nguyên.

Ntŭk geh nuĭh Việt gŭ rêh lah ntŭk nê geh mbah Hùng Vương. Ăp đền thờ Vua Hùng ta Tây Nguyên hŏ kơl nuĭh ƀon lan ta aơ di nuih n’hâm chŭn mbah, nkah gĭt ăp Vua Hùng./.