Lễ hội way ơm Bạch Đằng năm 2024 hŏ ntơm ƀư ta đền Trần Hưng Đạo, miếu Vua Bà mpeh nkual têl ơm yău gưl neh dak mha êng Bạch Đằng ta thị xã Quảng Yên, n’gor Quảng Ninh. Lễ hội way ơm Bạch Đằng lah rnôk mpơl nuih n’hâm nkah gĭt bah rơh kơn bah kơi đah yău ye bôk  năp n’hanh ăp nuĭh dăng janh rnoi nuĭh, hŏ geh n’hâm suan têh kuâng đah neh dak, đah ƀon lan.

Lễ hội dơi ƀư ăp năm ntơm bah nar 6 tât 9 khay 3 (âm lịch) ta ndru têl ơm yău lơh dơi Bạch Đằng lah: đền Trần Hưng Đạo, miếu Vua Bà, đình Yên Giang (phường Yên Giang) n’hanh đình Trung Bản (xã Liên Hòa), đền Trung Cốc (phường Nam Hòa, thị xã Quảng Yên) đah ăp nău way ƀư nkah gĭt n’hâm suan bah ăp nuĭh dâk leo bôk năp n’hanh lah rjăp nău khlay, rnoh khlay lịch sử bah lơh dơi Bạch Đằng tâm rnôk rlăch ndăng rdâng lơh phŭng rlăng lăp tŭn jot, mât njrăng neh dak; rgop ntĭm nti nău way ơm lịch sử an ăp rơh kơn aƀaơ n’hanh ôi tay klak./.