Đah nkô̆ "Buăt nthoi nsum mpôl – Rêng lam săk ntơr", aơ lah nar rgum pâl lor bôk năp dơi ƀư lôch rnôk xã Phú Túc dơi njêng, gay rgop mât ndray, ntik n’hao săk tơm văn hóa ăp rnoi nuĭh nkre đah nkơnh n’hơ ndơ geh ƀư OCOP bah n’gor. Nar rgum geh tât râng bah 14 mpôl tât bah ăp thôn, buôn ta xã, ndrel 3 mpôl tâm nđŭr tât bah ăp xã Ia Rsai, Ia Dreh n’hanh Uar.

Lah ngoăy tâm ăp mpôl geh âk mpưm nuĭh râng, buôn Chư Ung rgum rlău 60 bu hăr blău, nuĭh tâm rlong n’hanh ăp nuĭh lăp kan nsum nsrôih nchrăp an nar rgum. Ntŭk rgum tơm bah mpôl ta nar ƀư lah rdâk tay nău way ơm ngêt ndrănh 3 – du nău way ơm nsĭt geh săk ntơr văn hóa bah nuĭh Jarai. Wa Nay Noar – Bu hăr blău buôn Chư Ung nkoch:

"Ƀon hên râng nar rgum pâl Văn hóa rnoi mpôl đê̆ ƀư jay rdâk tay nău way ơm ngêt ndrănh 3, ƀư gay kon său ôi tay klak păng gĭt nău way ơm ngêt ndrănh 3 bah nuĭh Jarai mhâm ƀư. Ƀon mpôl hên mpơl nău way ngêt ndrănh 3".

Mông nar khuh n’gôr, ntơr uĕh bah Nar rgum Văn hóa – Thể thao ăp rnoi mpôl đê̆ xã Phú Túc mô dơn rgum ta công viên Phú Túc ma hôm khuh n’gôr ta trong nkual ƀon têh. Ăp rơh nchreng an uănh ta trong nkual ƀon têh, tŭr goh chĭng gong, ndăch rvăch njêng mông nar dŭt n’hâm khuh n’gôr. Ăp môn thể thao way ơm kơt tâm rlong tâm râp peh, têk rse, nsăt bao ƀô, ncho lơng djơng ndrel nchreng an uănh ndơ nsoh way ơm wăch rgum âk mpưm nuĭh ƀon lan ta ntŭk n’hanh năch ntroh n’gôr. Rup gui dŭt nkah uĕh lah ăp rơh nchreng an uănh ndơ nsoh rnoi mpôl đê̆, rgop mpư n’hao rnoh khlay bah ăp ndơ nsoh way ơm n’hanh nkoch mbơh săk ntơr văn hóa bah ƀon lan Jarai. Yuh Nay H'Dơ tât bah thôn Lâm Viên an gĭt:

"Rmôt nchreng an uănh uĕh ndơ nsoh bah mpôl hên geh 7 nuĭh. Geh 2 kôp nsoh ndơ way ơm kăl e. Hôm du kôp geh bu ur nsoh ndơ mhe rklă aƀaơ. Bah nê an ăp nuĭh saơ lah, bol nău rêh kăl e mô lah aƀaơ, ndơ nsoh mbra êng êng, yơn nha hôm nsĭt tay rup uĕh êng bah tĭng ntŭk mpôl hên đŏng”

Bah meng ăp nău kan văn hóa - thể thao, Rơh tăch ndơ Tuch tăm OCOP xã Phú Túc geh 24 ndrơng ndơ bah 14 mpôl tât bah ăp thôn, ƀon, pla n’hơ ăp ndơ kah khlay way ơm kơt: puăch ndrôk du nar ih, djăr gŭch mƀêt prung, we (ndơ sa way ơm), ndrănh yăng, blân tăng lha bum blang, blân gâm ntô ndrôk, ka n’hao dak me Sông Ba gŭch …wăch rgum âk mpưm năch n’hanh nuĭh ƀon lan ta ntŭk hăn uănh pâl, rvăt năl, rlong sa kah.  

Wa Ngô Đức Mạo - Giám đốc Ntŭk rgum kan Văn hóa, Thông tin n’hanh Thể thao xã Phú Túc, n’gor Gia Lai lah rgăp Nar rgum Văn hóa - Thể thao ăp rnoi mpôl đê̆ n’hanh Rơh tăch ndơ tuch tăm, nkoch mbơh ndơ geh ƀư OCOP xã Phú Túc lor bôk năp năm 2026 nsĭt tât âk nău kan văn hóa ntơr uĕh êng. Tâm ntŭk văn hóa, ăp bu hăr blău mpơl tay ntŭk gŭ rêh mpôl, nchreng an uănh chraih chĭng, tanh tôk, peh phe, cheh tanh bok brai, trah mon ndah rup si n’hanh pla n’hơ ndơ dŏng kan tuch tăm, ndơ uh goh way ơm. Bah nê, rgop mât ndray, ntik n’hao săk ntơr văn hóa ăp rnoi nuĭh, nkơnh n’hơ rup gui nkual neh, kon nuĭh n’hanh ăp ndơ kah khlay ntĭt êng bah xã Phú Túc, Gia Lai.

Ntơm bah rnôk n’glăp dŏng n’gâng kan bar gưl tât aƀaơ, nău kan văn hóa, thể thao tâm dâng geh rnôk dâk mbrơi tay. Yor kơt nê̆, năm aơ mpôl hên nsŏng kơl UBND xã ƀư Nar rgum Văn hóa - Thể thao ăp rnoi mpôl đê̆ gay mât ndray, ntik n’hao săk tơm văn hóa bah ƀon lan Jarai ta ntŭk. Bol prăk dŏng kan hôm jêr jŏt, ƀư jê̆ chrai tâm dâng, yơn tât rnôk dja ăp thôn, ƀon nsrôih kơt tĭng âk, nsrôih tiăr nti, nchrăp ndơ uh goh đŏng. Nar rgum njêng dơi têl nkah, jêng jâng ntơm gay rgop mât ndray, ntik n’hao săk tơm văn hóa bah ƀon lan Jarai."

Nar rgum Văn hóa - Thể thao ăp rnoi mpôl đê̆ n’hanh Rơh tăch ndơ tuch tăm, nkoch mbơh ndơ geh ƀư OCOP xã Phú Túc lor bôk năp năm 2026 hŏ rgop hĭng ntơr âk ntil nău tâm nău rêh bah ƀon lan ăp rnoi mpôl đê̆. Nkre đah mât ndray săk tơm văn hóa way ơm n’hanh nkơnh n’hơ ndơ geh ƀư tuch tăm, ndơ kah khlay hŏ rgop êt lhăt tâm rnglăp nsum mpôl ăp rnoi nuĭh, nkre njêng jâng nsan hun hao pâl nđaih jŏ jong an n’gor đŏng.