Tâm jay mhe ƀư nâp ueh đah rnoh khlăy ƀư rlău 1 rmen prăk, wa Dà Cắt Tư ntêm du ntŭk dŭt têh ueh tâm jay gay ma yông rup Wa Hồ, bằng khen, giấy khen kơp dơn nău dơi geh bâh ăp nuĭh kan tâm rnăk vâl tâm rnôk nti n’hanh pah kan.  Du mblâm tủ geh prăp âk ntil ndơ dŏng n’hanh săm ƀŭt, ntoh lư ngăn lah ăp ndrôm săm ƀŭt mpeh nău way n’hanh nău ueh êng bâh nuĭh Bunong. Wa Dà Cắt Tư dŭt ŭch đah ndrôm săm ƀŭt “Văn học dân gian rnoi Bunong” yor wa nơm rgum nchih năm 2013, rgum geh âk ntil nău kơt mprơ tâm ơh, mprơ hôr, nău mprĭng, nău way...wa nkoch. “Bâh ntơm hôm nha jê̆ gâp geh hăn nti âk ntŭk. Tât têh, gâp geh rơh hăn nti đại học ta nkuăl ƀon têh Hồ Chí Minh. Bâh kơt nĕ, gâp gĭt na nê̆ lơn nău khlăy ngăn bâh nău way mpôl rnoi Bunong kơt ăp nău tâm pât, ăp nău mprĭng nău hôr n’hanh nău nkoch nău way bâh rnoi nơm. Lôch geh nti, gâp plơ̆ sĭt ta ƀon lan, ntơm mât rbăy n’hanh nchih rgum tay ăp ntil nău mprĭng nău hôr bâh rnoi nơm jêng ndrôm săm ƀŭt. Du njoat mhe đah gâp lah geh rơh hăn ta Hà Nội n’hanh geh mâp Tổng Bí thư Nguyễn Phú Trọng . Wa ntĭnh ntăn an lah ăp nuĭh geh nău knơm tâm ntŭk rêh jêng an geh trĕ lam nău mât rbăy n’hanh mât ueh nău way nơm. Bâh nĕ gâp lơ ma nsrôih ntêm âk mông nar mât rbăy, mât tay ăp nău nkoch, nău way ơm, nău nkoch nđơn bâh rnoi Bunong, đah nău ŭch lah nklơi ndơn an kon său ba kơi.

Geh âk mông nar đah nău nsrôih mât rbăy n’hanh n’hao ăp nău khlăy ueh êng bâh mpôl rnoi, wa Dà Cắt Tư lĕ geh njêng ăp mpôl tŭr chĭng ta thôn Liêng Trang 1, thôn Dà Nhinh 1 n’hanh Dà Nhinh 2. Aƀaơ ăp mpôl tur chĭng aơ way geh mât nău kan n’hanh ăp nar lơ ma hun hao lơn, âk tơ̆ tât râng tâm nđur njroh mprơ đah ăp ntŭk êng êng tâm n’gor Lâm Đồng. Nô Dà Cắt Ha Tiên, nuĭh kan ndrel ta mpôl tur chĭng xã Đam Rông4 nkoch. “U che he kăl e lĕ an tay nău way ơm ueh êng dŭt khlăy ngăn. Yor nĕ he an geh nsrôih nti n’hanh mât rbăy gay ma mô an roh nău ueh êng mpôl rnoi nơm. Mpôl tur chĭng bâh hên way geh ƀa ƀơ tât râng ăp rơh tâm rlong n’hanh geh âk nău nkhôm rnê. Bâh nĕ hên lơ ma gĭt vât âk lơn nău khlăy bâh nău mât rbăy nău ueh êng bâh ăp mpôl rnoi Tây Nguyên kơt Bunong, K’Ho”.

Gay ma ntop mât rbăy n’hanh n’hao ăp nău khlăy way ơm bâh ăp mpôl rnoi, mhe nơh, n’gâng kan ta ntŭk lĕ geh năp tay  2 bor chĭng an ăp câu lạc bộ. Wa Liêng Hót Ngát, nuĭh way kan ta ntŭk kan văn hoá xã Đam Rông 4, n’gor Lâm Đồng an gĭt, tâm let năp tay, ta ntŭk mbra geh hun hao tay ăp câu lạc bộ chĭng ta lĕ rngôch ăp thôn ƀon. Đah ăp nău nsrôih  kơt wa Dà Cắt Tư, n’gâng kan têh lĕ geh nchih hồ sơ đă Ngih dak kơp dơn nghệ nhân ưu tú. Wa Liêng Hót Ngát an git: “Tâm xã mô nă geh âk nuĭh nsrôih kơt wa. Bâh geh tâm rgop n’hanh rgŏ jă bâh wa ma nău ueh êng ching gong bâh nuĭh Bunong, k’Ho ta aơ geh ndâk nsơm, mât rbăy n’hanh hun hao kơt aƀaơ”.

Năm aơ lĕ rlău 75 năm deh, wa Dà Cắt Tư ta xã Đam Rông 4, n’gor Lâm Đồng hôm nha nsrôih rgum rbăy nău mprơ nău mpring nău chĭng nău nkoch nđơn kơt lah mât huêng khlăy rnoi nơm. Bâh ăp ndrôm săm ƀŭt bâh ti wa nơm nchih rgum tât ăp câu lạc bộ chĭng gong yor wa njêng, nti lah nău ndơn mât nâp nâl bâh du nău ueh êng. Bâh geh nău nsrôih n’hanh nău blău kơt wa Dà Cắt Tư, nău ueh êng rnoi Bunong mô dơn geh mât rbăy ma hôm nha geh săk soan dăng mhe, trĕ lam đah nău rêh ueh mhe.