Mbah rhơn nău dơi rơh bầu cử đại biểu Quốc hội khóa XVI n’hanh đại biểu Hội đồng nhân dân ăp gưl năm kan 2026-2031, măng 16/3, n’gor Dak Lak ƀư bar bôk nău kan njroh mprơ đah nkô̆ “Dak Lak – nsum du nău nsing nơm” ta lĕ bar nkual mpeh luh nar n’hanh nhâp nar bah n’gor.

Ta mpeh nhâp nar bah n’gor Dak Lak, măng njroh mprơ ƀư bah năp Trung tâm Văn hóa – pâl nđaih n’gor, dơi rdâk ƀư tĭng pe chương: Nău nsing nơm nar rgum têh, Dak Lak – Mprơ n’hao êng săk n’hanh Nđơr mpăr lot ngai. Đah ăp nkô̆ njroh mprơ rgum, măng njroh mprơ mpơl tay mông nar khuh n’gôr bah nar rgum neh dak rhơn nđơr, mprơ rnê nău khlay bah Đảng, Quốc hội n’hanh nkô̆ hôr khlay bah rơh bầu cử. Săk tơm văn hóa Tây Nguyên dơi treh têl kloh đah ăp nău mprơ, nău nchreng an uănh hôm rêng tât bah chĭng gong, rup gui ƀon lan, yôk bri n’hanh nău nđơr hun hao bah nkual neh.

Ndrel du rơh, ta nkual mpeh luh nar bah n’gor, du măng njroh mprơ săk ntơr êng dơi ƀư ta Quảng trường Phú Yên, phường Tuy Hòa, njêng n’gôr gră bah nar rgum an nuĭh ƀon lan ta ntŭk, lah rjăp nuih n’hâm tâm rnglăp, nsum suan rdâk njêng n’gor Dak Lak nar lơn ma hun hao.