Jok du lịch côngv thôngx txuôk đros Cxiv tsa jêx jok yiêz nhoz Yên Châu

Jok Khá nhoz ciês sâuv txox cêr lox 6, kuôk thị trấn Yên Châu, huyện Yên Châu zuôr xar 10 cêik cêr tror saz Hà Nội. Jok muôx 90 ntâu ziv chuôz zis, 420 ntâu lênhx nênhs, xar muôx 100% zos tsôngv box Thái uô nênhx nhoz.

Tuôx trâu jok Khá, tsôngv kruô zuôr tâu nriêr pâuz lok cxuô zav jông thiêz têx qơư jông jav muôx nhoz jêx jok tsôngv box Thái thâuv ntêx, đros chuôs li tas nro chor chuôz zis tsênhv uô nênhx nhoz hâur têx tsêr lơưx cxôngx nzor, iz ndis zos vax txir mo môngk, txir mo khak lox, muôx đêx ntưk nkhâuk lêv lok đhâu hâur jok…

Zơưv Quàng Văn Phanh, muôx 80 shông, nhoz jok Khá puz pâuz, pox nhuôs hâur jok nhiv no cux tsênhv tuôr tsês chiê thiêz phuôx huiz tâu ntâu kror vênhx huôv jông mênhx cxưx Thái, li hu gâux, têx zav đhiê pax vuôs mênhx cxưx; tuôr tsês thiêz uô têx zav hâux lưv uô cxôngx nzor li ntok ntâuz, xơưk fuôv txiêx, hiêz têx zav tơưz, chuôz zênhx sir zôngv xênhz huôx yênhx hnuz, đros têx ntênhk hôiv li “Txi côngv jêx jok”, “Têx tuz nhuôs txi côngv uô tsâus txos pox côngz, zơưv côngz, niêv txir’, “Txi côngv jôngr”… No zos têx ntênhk cxôngx nzor muôx tsiv gri, thor cov muôx đas jos jông, muôx tâu iz shông sâu tâu kôngz lôngk ntâu: “Yênhx shông txos hnuz xiêz 10 mak tsuv txi côngv iz jiês. Txi côngv thor trâu chor nênhs hâur jok muôx đas jos, uô tâu nox; sâu tâu kôngz lôngk ntâu, chor tsiêx cxu tsik muôx moz, huôv vav”.

Txix têx kror liv zênhx muôx, huyện Yên Châu tưz kriz uô Đề anr huôv tsar tsưr ziv du lịch jêx jok ntơưv jok Khá; tsưr ziv cxiv uô têx hax huv du lịch hâur 5 shông, đros tas nro pênhr yưv uô xar muôx 43 tiv đêiv, tsêx trung cxiv tsa têx kror chênhr, li: Trôngx vas piz muk hâur jêx jok; cxiv tsa qơư txêik tok tsôngv kruô ntơưv qơư đrêk, tsês chiê yêz; qơưk đrêk yêz thiêz chor yêz tênhv thâux xa tsôngv kruô muk trâu hâur jok cov muôx tâu tênhv qơư jông; chor qơư muôs huv thiêz têx zav uô si nriêr pâuz; cxiv tsa luôs hâux lưv nriêr pâuz; kho đuô iz ndis jêx jok, cxiv tsa têx qơưk vêv xênhz…

Lok saz jok Khá, kriz uô Đề anr tưz xêir tsov 5 ziv chuôz zis zuôr kho đuô tâu zos yênhx homestay; 3 ziv chuôz zis kriz qơư uô cxuô zav jâuz mor nox hâuk mênhx cxưx; 3 ziv chuôz zis uô têx ntâuz, xơưk têx fuôv txiêx, hiêz têx tơưz, chuôz zênhx phưx vưv trâu tsôngv kruô du lịch; ntâu ziv chuôz zis nhoz jok Khá tưz tâu kriê têx txux chi uô du lịch côngv thôngx. Jok cux yênhx lix 2 đôiv nthuôr uô cêr lov jêv, tsik so tsưr tsix cơưv shâuv thiêz nthuôr uô cêr lov jêv trâu tsôngv kruô du lịch sêiz. Niêv tix Vì Thị Thanh, nhoz jok Khá puz pâuz: “Cur chuôz zis cux đăngk cir uô du lịch. Đhâu đăngk cir, chuôz zis tưz zuôr chor pav yiêz chiê tok tsôngv kruô tuôx nhoz so. Thâuv muôx kruô tuôx, pêz tsik so uô tsôngv box Thái chor zav nox, li jâuz tâuz ntông, njuôs hâu, kêiz njêl cxiêz… chiê phưx vưv trâu tsôngv kruô”.

Zơưv Quàng Văn Chiến, Phưv Chủ tịch Ủy ban xar Sặp Vạt cux puz pâuz: “Tỉnh, huyện paz muôx tsưr ziv cxiv tsa jok Khá zos qơư du lịch côngv thôngx, pêz xar lok six shir phaz. Pêz tưz đros huyện thiêz taz viv hêik pâuz uô côngz zưv nriêr pâuz, cêv kuôk đuô chor côngz trinhx hâur jok, yênhx lix HTX Du lịch chiê pox nhuôs sik đros uô thiêz pâuz tâu uô du lịch li chak”.

Lơưr zơưv Lù Văn Cường, Chủ tịch Ủy ban huyện Yên Châu, chiê cxiv tsa jok Khá zos yênhx jok du lịch côngv thôngx đros trâu cxiv tsa jêx jok yiêz, Ủy ban huyện Yên Châu tưz chox kriê nganhx muôx vax cxiv tsa thiêz kriêz kriz uô lơưr têx luôs hâux lưv lok tênhv qơư vênhx huôv ntơưv qơư du lịch côngv thôngx jok Khá; tsưr tsix chor lớp kriê, gra siêz jênhv pâuz lok tênhv qơư vênhx huôv, cxiv tsa têx ploz tsênhr jông lok cêr uô nênhx, sik thav luk cux li hâur têx huôx tôngv kinh doanh du lịch txơưr: “Nhiv no pêz tưz cxiv tsa tsưr ziv chox chor ziv chuôz zis muk ndis shuôk, cơưv shâuv ntơưv têx qơưk du lịch jông xưk li têx kror muôx tsênhv tsênhz ntơưv jok Khá. Đros co, pêz cux chox pox nhuôs muk trâu têx qơưk tsênhv kriê têx tsưr ziv uô du lịch chiê pox nhuôs cơưv shâuv, pâuz tâu. Pêz cux tưz hêik trâu tỉnh thiêz tâu tỉnh chox kriê muôz lok cxiv tsa jok Khá yênhx jok du lịch vênhx huôv jông chiê sir zôngv chor pênhr txix têz qơưk tsaz yênhx thiêz têx pênhr nhiêx huv chêi chiê huôv tsar jok Khá zos yênhx jok du lịch vênhx huôv côngv thôngx tưz tâu tỉnh tso tơưv”.

Chủ tịch Ủy ban huyện Yên Châu cux puz pâuz, đrâuv jok du lịch côngv thôngx mênhx cxưx Thái, thax tsav qơư cux tưz cxiv uô tsưr ziv tuôr tsês chiê, phuôx huiz tsiv gri vênhx huôv iz cxiê mênhx cxưx li Hmôngz, Xinh Mun…, chiê phuôx huiz tsiv gri vênhx huôv cxôngx nzor đros trâu du lịch; txix co, paz thơưz kinh têr-xar hôiv ntơưv thax tsav qơư huôv tsar. No cux zos iz hâur têx tsênhv njiêz zov chênhr mak huyện tưz muôz tso trâu hâur Nghị quyết Đại hôiv Đảng bôv huyện jiês tiv 20, ntu 2026-2030 zuôr tâu kriz cơưv trâu shông zuôr txos./.

Thù Thùy-Lik Thox cxêik nhênhv