Ngọc chiến-Mường La: Huôv tsar du lix côngv thôngx đros Trâu têx qơư đa đêx sor muôx chôngz lênhx kruô tuôx ndis shuôk, uô si

Txos Ngọc Chiến-Mường La-Sơn La, chor tsêr kruô so du lịch côngv thôngx ntơưv jok Lướt, hâur co muôx zơưv Lò Văn Chinh luz tsêr kruô so côngv thôngx nhiv no tưz muôx chôngz lênhx nênhs pâuz txos, xêir tsov nhoz so. Tix lâus Nguyễn Ngọc Hợi, iz lênhx kruô nhoz ntơưv thành phố Vĩnh Long tuôx puz pâuz: Đhâu têx fôngx zưs hêik pâuz thiêz nriêr pâuz sâuv mạng, tix lâus tưz pâuz mê njil txos tuk đêx sor ntơưv jok Lướt thiêz qơư du lịch côngv thôngx ntơưv no. Jiês no tuôx trâu faz Bắc, tix lâus tưz chox chuôz zis tuôs ndis shuôk uô si ntơưv no thiêz sơưr đơưk cux lok six nhiêv:

“Cur pov chor đêx ntơưv no mak lok six sor. Đas tas mak pov zuk gruôs đuô. Ntơưv no cux muôx têx zav nox thiêz têx zav đhiê pax vuôs Thái lok six kaz thiêz jông sêiz. Tsôngv box nhoz no cux nhiêv kruô. Tiv zix ntơưv no cux jông thiêz huv đros trâu chor jiês ndis huôk uô si thiêz nhoz so li no”.

Zơưv Lò Văn Chinh zos nênhs nhoz ntơưv tiv phaz. Txơưv xênhz zus thiêz hloz lox nhoz ntơưv no, taz sik zơưv cux pâuz tsik tâu tiêk tuk đêx sor hâur jok no muôx txix thâuv tưs lok, tsuôk pâuz tiêk tuk đêx sor no tưz zênhx muôx đros đrêiv pox nhuôs nhoz ntơưv no luz nênhx txix ntâu fâuv nênhs lok lơưv. Xuz thơưx, tuk đêx no tsuôk zos pox nhuôs hâur jok đa đhâu thâuv muk uô liêx têz lok. Tov kaz no sơưr đơưk siz hêik pâuz, mak ziv hnuz ziv muôx chôngz lênhx kruô tuôx ndis shuôk uô si đros trâu đa đêx sor.

Txis shông 2004, zơưv Chinh chuôz zis zos ziv chuôz zis xuz thơưx ciês hâur jok yưv pênhr cxiv uô 7 qar đêx đêx, đhâu co cxiv uô iz qơư đa chôngz nênhs. Txix shông 2010 txos hâur shông 2017, zơưv kror qơư đa đêx tâu kriz đar đros muôx 4 kror qơư đa chôngz nênhs, 25 qar đa đêx sor thiêz 4 qơư nhoz so zuôr txêik tok tâu muôx 100 lênhx nênhs tuôs ndis shuôk, uô si thiêz nhoz so.

“Cur cux muk ntâu qơư pov luôs uô, lok mak cur cux xar. Shông 2004 mak cur uô oz pêz qar đa đêx uô ntêx, oz pêz shông tov kaz ho uô nzir qơư đa đêx, max mav uô jux juk xưz. Kruô tuôx ntơưv no luôs cux muôz pir đros ntâu qơư mak hêik tiêk ntơưv no đêx hur, kruô nhiêv đa thiêz ziv hnuz ziv muôx chôngz lênhx nênhs tuôx. Tsôngv kruô cux hêik trâu zuk cov uô nzir kror no, kror tor, zuk cux lav uô xưz, hok zuk mênhx cxưx têx vênhx huôv mak tsuv tâu phuôx huiz”.

Đrâuv phưx vưv trâu đa đêx sor, zơưv Chinh chuôz zis tsênhv uô têx zav nox mênhx cxưx Thái, qơư nhoz so, muôx vênhx nghệ jêx jok, tsôngk yo mênhx cxưx, tsênhv uô chox tsôngv kruô ndis shuôk jêx jok Ngọc Chiến. Chiê paz muôx tâu têx kror jông trâu chuôz zis kror qơư du lịch côngv thôngx đros đa đêx sor, zơưv Chinh đros têx tuz nhuôs tưz sâu tsês cxuô zav txix têx shôngz ntông, chiê uô chuôz zis têx qơư nhoz so thiêz nox hâuk. Tiv zix, trur tsêr, đros ntâu zav cux tâu zôngv ntông chiê uô lok six jông. Chor qơư đa đêx mak tâu uô vêv xênhz hur si tsik so, chiê tsôngv kruô thâuv muk ndis shuôk uô si lok tâu đa đêx sor, paz trâu zuk tror muôx đas jos jông. Niêv tix Đinh Ngọc Linh, iz lênhx nênhs txix thành phố Hồ Chí Minh tuô hêik pâuz:

“Tuôx ntơưv no mak lok six nhiêv, viv khôngz qiv ntơưv no lok six jông, têik cik sơưr nzor pư sơưr mak pov zuk gruôs đuô. Cur nhiêv chor zav nox mênhx cxưx ntơưv no viv nox kaz hênhr”.

Tsưr ziv du lịch sôngv thôngx đros phênhv sâu txix tu zus, chos kôngz lôngk, iz shông paz trâu zơưv chuôz zis phênhv sâu muôx yênhx puô triệu đêiv. Lơưr zơưv Chinh: Txơưv tiêk li, taz sik zơưv têx qơư nhoz so no cux tsênhv tax tsik tâu tâu zoz qơưx. Zơưv chuôz zis tsênhv muôx tsưr ziv kho đuô, uô nzir têx qơư nhoz pư, đa đêx sor cov jông đuô.

“Đros chor kruô chôngz li no mak tsênhv tax tsik tâu tâu zoz qơưx, têx thâuv tsênhv tsik txâuk thiêz. Cur tsênhv xar uô nzir 10-15 kror qơư đa đêx thiêz. Tsêr mak uô nzir iz luz thiêz cov txêik tok tâu muôx 150 lênhx nênhs tuôx nhoz so”.

                    (Thủy Thùy-Lik Thox cxêik nhênhv)