Uô jông Cuiv Cxênhx txuôs lơưr zơưv hloz Hôx luk kriê nhoz Đắk Lắk

9 shông đhâu, iz hli, tix lâus Nguyễn Văn Tiến, canr bôv Văn phòng Đảng ủy xar Buôn Tría, huyện Lắk, tỉnh Đắk Lắk puôr lênhx tsês 10 cxênhz đêiv chiê gôngr côngv trâu cơ quan li Cuiv Cxênhx txuôs lơưr zơưv hloz Hôx luk kriê. Tix lâus hêik: chor nhiêx gôngr côngv tsik ntâu, zôngx ziv uô taz sik ho paz muôx tâu ntâu têx kror lok six jông:“Cur pov phongz yaox Cuiv Cxênhx txuôs uô lơưr zơưv hloz Hôx no lok six jông, viv li tâu tas nro đảng viên hâur Đảng bôv cux xưk li đoàn viên nhoz têx jêx jok thôngx ziv đros uô. Iz zav li chor đảng viên hluôk li pêz mak iz hli gôngr côngv 10 cxênhz đêiv”.

Cuiv Cxênhx txuôs uô lơưr zơưv hloz Hôx luk kriê zos uô lơưr phongz yaox “Cxênhx txuôs lơưr zơưv hloz Hôx luk kriê” tâu Ban Thường vụ Huyện ủy Lắk uô tsik so hâur ntâu shông đhâu chiê paz trâu chor nênhs muôx luz nênhx txov nhêv. Lơưr co, iz lênhx canr bôv, đảng viên, đoàn viên, công chức, viên chức, nênhs lox tôngv tas nro huyện hâur pêz hnuz cxênhx txuôs tsơưs tiv zix 1.000 đêiv; đoàn viên, hôiv viên nhoz ntơưv cxuô thax tsav qơư mak 10 hnuz cxênhx tsês tsơưs tiv zix 1.000 đêiv. Chor nhiêx cuiv no tâu Ban Tuyên giáo Huyện ủy sêiz car. Pos Đào Thị Thanh An, Phưv Bí thư Thường trực Huyện ủy Lắk puz pâuz, đros tsưr ziv uô no hâur 9 shông đhâu tas nro huyện tưz gôngr côngv tâu xar muôx 3 tiv đêiv, paz trâu yênhx puô lênhx nênhs muôx luz nênhx txov nhêv, zos chuôz zis tâu sơưv cêr chêi, đảng viên, nênhs tsik muôx qơư khov vav, trâus moz têx zav moz hnhar:“Muôz tsaz yênhx no lok sir jos uô cov paz muôx tâu tsiv gri tsênhv tsênhz, paz muôx tâu cêr siz hluz, siz paz hâur côngv thôngx xar hôiv cux xưk li phêiz kênh têx phiv liv đros chor nênhs muôx luz nênhx txov nhêv, trâus moz têx zav moz hnhar chiê lơưr muôx nzir cêr shir phaz hâur luz nênhx…”

Đros huyện Lắk, tsưr ziv “Cxênhx txuôs lơưr hloz hôx luk kriê” tưz tâu uô đêz đar, truôx jông ntơưv ntâu thax tsav qơư li: Cư M’gar, Cư Kuin, Krông Ana, Krông Bông, Krông Buk, Krông Pắk thiêz M’Đắk tỉnh Đắk Lắk. Hâur 2 shông đhâu, tsưr ziv uô no tưz cxênhx tsês tâu muôx 10 tiv đêiv ntâu, đhâu co paz cxiv tsa 89 luz tsêr nhoz, 2 qơư nhoz uô hâux lưv trâu cưk kriê ntơưr, khơưk muôz yênhx puô kror hax huv trâu chor chuôz zis tâu sơưv cêr chêi, nênhs muôx công trâu têz qơưk.

Iz cxiê thax tsav qơư tưz muôx tsưr ziv uô txơưx xar tơưv, muôx chôngz canr bôv, đảng viên thiêz pêx xênhv đros uô. Iz zav li têx tsưr ziv uô “Cxênhx tsês paz trâu chor đảng viên muôx luz nênhx txov nhêv” nhoz Thành ủy Buôn Ma Thuột; “Cxiv tsa côngz trinhx vêv xênhz Tsêr cơưv ntơưr” nhoz huyện Cư M’gar; “Ntơưr cxênhx tsês Búa Liềm Vàng” nhoz Thành uỷ Buôn Hồ… Zơưv Phạm Minh Tấn, Phưv Bí thư Thường trực Tỉnh ủy Đắk Lắk hêik: No zos têx hâux lưv uô tâu truôx jông “Lơưr zơưv hlox Hôx têx luk hêik  kriê” txix ciês ntơưv qơư:“Cơưv shâuv thiêz uô lơưr zơưv hloz Hôx zos iz hâur têx hâux lưv uô tsik so. Thiêz Tỉnh ủy tưz chox kriê tsênhz mênhx txix chi bộ ntơưv thax tsav qơư, txix yênhx lênhx đảng viên tsuv muôz hâux lưv cơưv shâuv, uô lơưr zơưv hloz Hôx zos yênhx kror hâux lưv tsuv uô tsik so thiêz muôz lok xênhz huôx hâur yênhx hli chiê sơưr đơưk pâuz tâu thiêz sir jos uô trơưk txix têx hâux lưv uô zôngx ziv txos hâux lưv lox, sik paz chiê txo grêk yêiz pluôs, cxiv tsa jêx jok yiêz, uô tiêr têx jênhv vưv tâu choz”.

Tưz tsik zos phongz yaox xưz, “Cxênhx txuôs lơưr hloz Hôx têx luk kriê” tưz zos yênhx iz kror hâux lưv uô tsik so tâu yênhx lênhx canr bôv, đảng viên thiêz pêx xênhv nhoz Đắk Lắk sir jos kriz uô. Tsưr ziv uô zôngx ziv taz sik muôx tsiv gri lox, paz muôx cêr shir phaz trâu chôngz lênhx nênhs pluôs txix paz uô têx luz tsêr lox jông, lok sik paz ndar six hơưv thâuv njiz trâus têx cêr txov hâur luz nênhx…/.         

                                                                      TTTN-Lik Thox cxêik nhênhv