Lào Cai: ATM cxur paz trâu tsôngv box tsơưs nênhs pluôs nhoz Sa Pa

Luz mêir ATM zuôr paz tso cxur trâu chor nênhs pluôs, yênhx puô lênhx nênhs nhoz chor jok Nậm Sang, Nậm Kéng, Bản Sài…phênhv ntâu zos mênhx cxưx Xa Phó đros iz cxiê mênhx cxưx li Tày, Hmôngz, Cho tưz tuôx txos lok six nzor.

Viv chor chuôz zis puôr lênhx zos chuôz zis pluôs thiêz zuôr xar pluôs, viv li ban tsưr tsix tưz cuêz tênhv muôz trâu iz chuôz zis pluôs 10 cir cxur, chuôz zis zuôr xar pluôs 5 cir cxur đhâu luz mêir ATM zôngv mêir điện thoại sơưr đêz chiê tso cxur lok. Lênhx tưs tâu paz cxur mak cux lok six shir phaz:

“Iz kror thâuv yêiz bâuv li iz poz thâuv tsâu. Txơưv tâu ntâu thiêz tsơưs lok cux lok six jông thiêz shir phaz”.

“Chuôz zis txov nhêv, muôx oz niêv tuz xưz, mê nhuôs cux muôx 60 shông trâus tuôs iz chêr tsuôk nhoz iz kro xưz. Tâu paz cxur li no mak jông hênhr lơưv”.

Chor nênhs siêz jông đros muôz cxur paz trâu pox nhuôs nhoz Nậm Sài, zos iz luôs hâux lưv uô muôx liv paz trâu pâuz pox nhuôs ntơưv no, thâuv muôx caz moz phiv liv muk tsik tâu kror tưs, tsuôk nhoz hâur tsêr thiêz pâuz khov trâu chor blêx sâu tâu iz chiv hâur shông. Niêv tix Lê Thị Trang txix Hà Nội tuôx hêik:

“Nhoz têx thành phố lox mak muôx lok six chông nênhs siêz jông, taz sik chiê tuôx txos trâu têx qơư nhoz đêz, tox siêz mak cux lok six lax, kror no mak sơưr đơưk tsuv sir jos sik côngv siêz chiê uô, luz mêir ATM no mak lok six huv đros”.

Chiê muôx tâu luz máy ATM tso cxur no, txix chor nênhs sâu pov chir ntơưv Lào Cai thiêz têx fôngx zưs siêz jông li tsưr ziv xar xuz thơưx, tsêr cơưv Cao Đẳng Lào Cai tưz hêik chor cưk kriê ntơưr sik đros uô tâu thiêz muôz cxur muk paz trâu pox nhuôs. Pos Nguyễn Thị Bích Thủy, Phưv Trưởng khoa Tênhv-Điện tử-Tsêr cơưv Cao đẳng Lào Cai puz pâuz:

“Pêz tưz sir jos kriz uô, tsik xav đruôz hnuz hmo ntux, sơưr đơưk puôr lênhx sir jos uô hur si, tar su tsuôk nox su tas mak piz kriz uô ciês, hmo ntux mak uô txos 9-10 six iz tas hmo, txix têx sir jos co mak pêz tưz uô tâu luz mêir no”.

Hâur hnuz xuz thơưx, luz mêir ATM tso cxur no, tưz tso muôx 2 tấn ntâu cxur paz trâu 200 ntâu ziv chuôz zis. Thiêz hâur  ntu zuôr txos no, pêz zuôr chox luz mêir no muk trâu chor thax tsav qơư txov nhêv txơưr đuô xưk li thax tsav ntus đriv, têx qơư Công nghiệp chiê tso cxur muôz paz trâu pêx xênhv./.