Lênhx pox niêv mênhx cxưx Hmôngz nhoz Lào Cai chos yuôx zêx, cxuôv cêr yeiz pluôk

          Txix tsuôk shưv đros hâux lưv chos poz cưk, kok ntông, niêv lâuk Trà Xênhv Shôngx- iz lênhx pox niêv mênhx cxưx Hmôngz nhoz jos Lũng Pâu, xã Mường Khương (Lào Cai) tưz truôx siêz huôv tsar chos yuôx zêx, tu zus lơưr khoa học, paz chuôz zis hla đhâu cêr pluôk thiêz yênhx chuôz zis bluô nux hâur jos.

Shông 2021, hâur iz jiês xênhz huôx jêx jos, niêv lâuk tâu cán bộ Hội pox niêv niêv xã tuôx txos ciês ntơưv qơư heik kriê, vênhv tôngv lok Đảng, têz qơưk li chủ trương, tsênhv chei hâur hâux lưv paz tsôngv box huôv tsar uô nox, tiv zix zos hlôngr yiêz tsoz chos, tsiêx tu zus. “Qir thơưx mnôngs cán bộ heik lok hâux lưv chos yuôx zêx, tu zus buô uô hax huv, cur cux tsi tâu njênhs. Tsoz poz cưk, kok ntông tưz reik đros zuk luz nênhx tâu tiêv nênhx lok no, nhiv no hlôngr chos tsoz chos yiêz, tu zus tul tsiêx yiêz zos tsi yênhx côngz mak zuôr nhoz uô nênhx li chas?, niêv lâuk Trà pheiz kênh.

Tâu Hội pox niêv xã li sir jos paz txưv, niêv lâuk uô ntâuz ntơưr, truôx siêz txeik 100 tsov đeiv txix Zênhx hangx tsênhv chei xã hội lơưr tsaz yênhx puz txeik pênhr tsiv uô, muôv muôs nhoz thax tsav txov nhêv. Gra chor nhiêx txiêx txeik tâu lok, niêv lâuk cê shir phaz, cê cxơưx, chiv chir xar tsuv zôngv chor pênhr nhiêx no li chas cov muôx chêx cuk tiv zix. Muôx pênhr nhiêx, taz sik yưv pênhr uô tul tsi ho zos iz phêv liv. Khov tâu cán bộ kôngz nuv xã tuôx txos ntơưv têz chiê heik kriê lok qiv hơưv, ar têz nhoz tiv phaz, niêv lâuk Trà tưz cuiz tênhv hlôngr yiêz tas nro mênhv chêx ar têz tsênhv chos poz cưk, kok ntông chiê chos 4 cxênhz tsoz yuôx zêx.

Taz sik, yuôx zêx tsuv pôngz txix 3 txos 4 shông thiêx qir sâu đê tâu. Hâur ntu co, niêv lâuk chuôz zis zuôr uô li chas? Têx siêz xar co tưz tâu niêv lâuk Trà car chêix txix uô kinh têr yiêz. Niêv lâuk tsês iz phênhv pênhr chiê zuôr 20 tul buô tiv phaz lok tu zus. No zos nôngz buô zôngx ziv tu zus, shưv đros qiv hơưv tiv phaz, tsơưs muôx moz thiêz kaz greix viv li tâu niêv ciêz lok six nhiêv txos. Đrâuv co, hâux lưv tu zus tsênhv paz niêv lâuk zôngv qir chiê phưx vưv tsiv uô kôngz nuv, txu grês nhiêx txiêx yưv chos yuôx zêx. Zênhx muôx chênhz zênhv, ho gruôs cơưv shâuv tsưr ziv uô yiêz txix têx pox niêv hâur jos li têx trâur nuv uô yênhx côngz. Ciês shông xuz thơưx, buô tưz chox lok phênhv sâu trâu chuôz zis 70 tsov đeiv. No zos iz hâur têx chor nhiêx txiêx thâuv ntêx niêv lâuk tsi car xar txos.

          Sir jos uô hâux lưv, cê tu zus buô, cê tsoz phưz trôngz yuôx zêx, niêv lâuk Trà li têx sir jos tưz qir tâu pâux nzir. Txos nhiv no, chuôz zis li 1 hecta ntâu yuôx zêx tưz qir sâu đê truôx, tsơưr lươngv jông. Buô mak thâuv tưs hâur guôx cux zus 20 tul ndê muk, niêv buô thiêz buô zuôr greix. Iz shông thâuv yưx tas nhiêx txiêx tưz yưv, niêv lâuk Trà sâu liv tâu yênhx puôk tsov đeiv. Txix iz chuôz zis pluôk, niêv lâuk Trà chuôz zis tưz hla đhâu cêr pluôk thiêz sir jos yênhx iz hâur têx ziv chuôz zis bluô nux nhoz jos Lũng Pâu. Luz nênhx nhiv no hlôngr yiêz jông.

          Heik txos niêv lâuk Trà chuôz zis li trâur nuv, niêv lâuk Hà Thúy Nghiệm, tsar jos Lũng Pâu jông siêz thav li no: “ Niêv lâuk Trà li trâur nuv zos têx tsênhv tsênhz tso pov chinhz yênhx truôx siêz hlôngr yiêz siêz xar, tsưr ziv uô, zôngv KHKT yiêz lok tsêz chos, tu zus muôx chêx cuk têx chính sách paz txưv sir jos huôv tsar uô bluô nux. Niêv lâuk tsi taz zos iz hội viên pox niêv sei đrơưv, sir jos huôv tsar kinh têr chuôz zis mak tsênhv jông siêz pheiz kênh chênhz zênhv, paz têx chuôz zis txơưr hâur jos sik đros huôv tsar uô nox”.

          Hâur têx trôngz yuôx zêx njuôz jông, lênhx pox niêv Hmôngz Trà Xênhv Shôngx tsênhv sâu đê njik yuôx đhâu ntâu shông sir jos tsoz phưz. Chêx cuk nhiv no tsi taz chox lok cêr jông siêz trâu niêv lâuk chuôz zis, mak tsênhv chuôz cxaz đas jos chiê pox nhuôk têx mênhx cxưx nhoz jos Lũng Pâu truôx siêz hlôngr yiêz siêz xar, tsưr ziv uô, sir jos uô bluô nux, sik côngv tês cxiv tsa jêx jos ziv hnuz ziv bluô nux, vav mênhx.

Phênhv “Nôngx mênhx zuôr tsuv pâuz” hnuz no tsuôk muôx xâuk li no xưz. Phênhv no zos Chiz coaz Đeix nta suôz VN thax tsav Tây Bắc đros tsênhv qơư cxiz kôngz têz qơưk uô./.

Thào Ly-Txâur Vax cxeik nhênhv