Trạm Tấu uô jông cxuô luôs hâux lưv phax tar ntux no njiv trâu tsiêx cxu

Ntơưv jok Tấu Dưới, xar Trạm Tấu, tỉnh Lào Cai, đhâu thâuv cxaz chuôz nganhx kôngz nuv li lớp hêik kriê, tix lâus Lư Xênhv Zax, tsar jok tsênhv tror kriê chor txux chi yiêz mak tix lâus tâu cơưv chiê paz pox nhuôs muôx txux chi, tsưr ziv jông đuô hâur phax tar ntux no thiêz tsưr tsix tu zus ngaz tuk chor tsiêx cxu hâur chêix ntux no. Tix lâus Lư hêik: “Cur tưz cơưv tâu ntâu txux chi jông lok phax tar ntux no trâu chor tsiêx cxu, puz trâu nox thiêz six hơưv tso muk nox jâuz cov huv đros chiê paz trâu chor tsiêx cxu muôx đas jos jông. Cur tsưr tsix cơưv pêx xênhv chiê yax kriê trâu pox nhuôs pâuz tu zus, phax tar ntux no thiêz caz moz trâu chor tsiêx cxu”.

Tas nro xar Trạm Tấu, tỉnh Lào Cai-Thax tsav qơư nhoz tỉnh Yên Bái kuz, nhiv no muôx 14 cxênhz ntâu tuk nhux tưv, zos kror paz lok kinh têr zov chênhr trâu pêx xênhv nhoz tox siêz. Njuôk xav jiês ntux no zuôr txos zuôr uô phiv liv txos uô nox thiêz tu zus tsiêx cxu, viv li côngz xưv yax kriê trâu chor ziv chuôz zis tu zus tsênhv tâu chinhr quyền xar sik côngv đros lưx lươngv thú y thiêz chor jêx jok kriz uô cov cxix xcuô.

Zơưv Bùi Hồng Anh, Phưv Chủ tịch Ủy ban xar Trạm Tấu puz pâuz, xar tưz hêik chor ziv chuôz zis qênhz yuôx, thêir vor têx tsêr guôx, bax cov txâuk têx zav nox thiêz tsik tso yar tsiêx cxu thâuv jêx tưv grêk kik: “Sâuv chor thax tsav tox siêz muôx ntâu kror phiv liv, hâur co muôx qênhx shênhx tso yar chor tsiêx cxu thiêz tu zus tsơưs. Viv li, pêz xav jênhv côngz xưv yax kriê zos tsưr ziv uô zov chênhr. Iz chas co, pêz tsưr tsix qênhz yuôx yênhx jêx jok chie paz trâu pêx xênhv uô tau huv zos lơưr hêik kriê”.

Tas nro tỉnh Lào cai muôx 1,5 triệu ntâu tuk tsiêx cxu, zuôr xar 12.000 qơư tu zus lox thiêz 51 qơư tu zus sir zôngv công nghệ siêz. Taz sik, tsênhv yuôr xar muôx 20% ziv chuôz zis tu zus nhoz tox siêz tsik tâu muôx tsêr guôx khor truôx jông, zôngx ziv trâus ruôr hiêv thâuv muôx ntux no njiv ntêr hnuz.

Đros tsênhv tsênhz co, tỉnh tưz tso tơưv tsưr ziv phax tar ntux no, yêiz plaz chiv ntux tsâus yiêz 2025-2026; chox kriê cxuô thax tsav qơư kho đuô têx tsêr guôx, tsês chiê zav nox txâuk nox hâur ntâu hnuz; chuôz cxaz cxax yuôx phax moz paz trâu chor tsiêx cxu muôx jông đas jos; tso lưx lươngv thú y sêiz jor tsik so; hêik cov tsik tso yar chor tsiêx cxu thâuv jêx tưv grêk kik đuô 5 tưv. Chor xar cux tâu choz paz trâu chor ziv chuôz zis pluôs chiê paz uô cov sor, cxaz nzir zav nox trâu chor tsiêx cxu, paz cov chor tsiêx cxu muôs đas jos jông tir tar ntux no, txo grêk tsơưs tiv zix têx trâus ruôr hiêv./.

Trịnh Xuân-Lik Thox cxêik nhênhv