Yên Bái uô jông hâux lưv tir thêir têx hax huv chuôr, hax huv tsi jông hâur kaz shôngk shông

                    Uô luôs hâux lưv phax tir thêir têx hax huv chuôr, hax huv tsi jông hâur ntu zuôr txos Tsiêz thiêz đhâu tsiêz têz qơưk Jax shông 2024, têx hnuz đhâu lok no, chor nênhs uô hâux lưv seiz car ciêz đrôngs nhoz têx huyện, thị xã, TP hâur Yên Bái tsênhv sir jos qênhz yuôx shuôs têx qơư zuôr muôs huv hâur thax tsav. Zov chênhr zos qênhz yuôx têx ntâuz ntơưr đas cir zuôr muôs huv, qơư tsiv uô têx hax huv, ntơưr lo chiv.... Zơưv Vũ Thành Long, Phưv thơưx seiz car ciêz đrôngs sôr 2, TP Yên Bái heik pâuz:

                 “Iz chas hâux lưv seiz car hâur thax tsav, pêz tsênhv yax kriê chei têz qơưk trâu têx tsưr tsix, lênhx nênhs , chor nênhs sir zôngv tsi tâu chuôz têk paz zuôr muôs, sir zôngv têx hax huv chuôr, hax huv tsi jông, tsi pâuz tsênhz qơư tsiv uô, tsi taz por vêv xênhz truôx tuk zav nox”.

                   Ntu no, ntơưv cxuô thax tsav qơư nhoz Yên Bái, muôs lok six ntâu zav hax huv phưx vưv tsôngv pêx xênhv zuôr nox tsiêz li: Chơưr bia, đêx kaz jiz, nduôr thax, zênhz gaz ntơưr, tsôngk tril yo, khâu trâu....đros thiêz gri truôx tuk.

                 Tix lâus Nguyễn Anh Quân, nhoz phường Yên Ninh, TP Yên Bái heik pâuz, trơưk li tix lâus thiêz cơ quan muôx vax huôv heik kriê, tix lâus chuôz zis thiêz phênhv ntâu cxuô lênhx sơưr đơưk puôr lênhx zuôr huv ntơưv têx ciêz đrôngs lox, qơư muôs ntâu huv, viv co zos têx qơư muôx suôz bê, muôx hax huv jông, pâuz tsênhz qơư tsiv uô.

                 “Zuôr txos tsiêz 30, têx qơư zuôr muôs huv cux muôx têx tsaz yênhx txo grêk gri hax huv, 10, 20, 30%; hur tiz si cxuô zav hax huv puôr lênhx muôx ntơưr lo chiv, pâuz tsênhz qơư, gri muôs”.

                 Zơưv Trần Hùng Tuấn, Phưv Cục tsar seiz car ciêz đrôngs tỉnh Yên Bái heik pâuz: Txix thâuv txos kaz shôngk shông, ntâu lênhx nênhs liv zôngv sơưr đơưk khênhr zuôr txos ntâu têx hax huv, lơưr muôz iz cxiê huv tsi jông lok muôs shơư lok sik tsar ndê gri xiv huv, Cục seiz car ciêz đrôngs tỉnh Yên Bái tưz bax hux jos đros cxuô ngênhx muôx vax huôv chuôz tsar qênhz yuôx, qênhz shuôs gri, tsơưr lươngv, qơư tsiv uô têx hax huv zuôr muôs hâur ntu no. Đros trâu co zos xưv bluô cov txos qơư chor nênhs zuôr muôs hax huv chuôr, hax huv tsi jông, tsi taz por truôx tuk vêv xênhz zav nox.....

                 “Iz chas luôs hâux lưv qênhz yuôx mak cux tưz yax kriê, vênhv tôngv  tsôngv box thâuv zuôr muôs hax huv tsuv seiz shuôs jông têx ntơưr lo chiv, qơư tsiv uô, hax sir zôngv, tsi zuôr têx huv luôs lưv tus muôs tâus cêr lok sik sâuv mạng xã hội tsi pâuz tsênhz qơư......Iz chas ntơư, pêz cux muôx sôr xor tôngx, qơư txeik sơưr đơưk têx lul heik tsi jông siêz thâuv zuôr tâu têx hax huv tsi jông, hax huv chuôr chiê zênhx max heik trâu lưv lươngv seiz car ciêz đrôngs pâuz thiêzxưv bluô”.

                 Zơưv Trần Hùng Tuấn cux heik pâuz, shông 2023, lưv lươngv muôx vax huôv tỉnh Yên Bái tưz xưv bluô 317 txuz lok sâuv zuôr muôs hax huv chuôr, hax huv tsi jông, bluô tâu 7 tyv đeiv ntâu nhiêx (tsar ndê 205% pir li shông uô ntêx). Luôs hâux lưv qênhz yuôx, qênhz shuôs ciêz đrôngs zuôr muôs huv nhiv no tsênhv tror tâu sir jos fuô uô, chiê tsôngv pêx xênhv sơưr đơưk bax tok nox iz luz tsiêz shir phaz lus, truôx tuk./.

Tuấn Xuân-Riê Lâux cxeik, nhênhv