Dưv anr qox Bản Vược-Bá Sái (Trung Quốc) txuôk đros cêr zoz thôngz

           Tỉnh Lào Cai tsênhv sir jos uô cov sêi chor dưv anr zoz thôngz txuôk đros trâu dưv anr qox đêx đuz ntus đriv Bản Vược-Bá Sái, sir jos tas shông 2024 zuôr uô cov tiêr. Ntu cêr Kim Thành-Ngòi Phát ntêr muôx 11 cêik cêr zos iz hâur chor dưv anr co. Zơưv Nguyễn Sĩ Trọng, Phưv Giám đốc Công  ty Cổ phần cxiv tsa tổng hợp Minh Đức puz pâuz: taz viv uô kror thầu 3 cêik cêr, đros tas nro tsiv gri zuôr xar 90 tiv đêiv, sir jos txos hli 6/2024 zuôr uô tiêr tas nro ntu cêr no: “Tas nro cxuô kror hâux lưv mak nênhs thầu tưz uô cxix cxuô lơưv. Zos muôx cxix cxuô lơưv, nênhs thầu jênhv tiêk 7 luz hli thiêz zuôr uô cov tiêr. Tsêx trung sir jos tas nro pênhr jos chiê uô cov tâu li tsưr ziv tưz tso tơưv”.

          Xav jênhv Dưv anr qox Bản Vược-Bá Sái muôx tsiv gri lok six zov chênhr, tỉnh Lào Cai tưz hêik, chox kriê huyện Bát Xát sik côngv đros tsưr yưv pênhr sir jos uô hâux lưv pâux nzir. Zơưv Phạm Năng Chung, Phưv Chủ tịch Ủy ban huyện Bát Xát puz pâuz, nhiv no muôx 100 ntâu ziv chuôz zis tưz txar muk trâu qơư nhoz yiêz, chor chuôz zis tsênhv yuôr huyện tsênhv sir jos uô côngz xưv yax kriê, sir jos txos hâur shôngk shông 2024 zuôr choz zok tas nro thax tsav trâu nênhs thầu: “Hâux lưv pâux nzir txar chor ziv chuôz zis chiê uô plas cêr mak tsuv sir jos cov hâur 3 luz hli hâur shôngk shông 2024 uô cov tiêr; hêik taz viv uô sir jos uô cov sêi, đros co zos sir jos muôz sêi têx pênhr nhiêx kriz uô dưv anr”.

          Dưv anr qox Bản Vược-Bá Sái zuôr tâu cxiv uô hâur 2 shông, iz saz uô iz đraz thiêz uô chor côngz trinhx nhoz zuk saz. Zơưv Nguyễn Văn Phiêu, Phưv Giám đốc Ban Sêiz car Dưv anr yưv pênhr Cxiv tsa côngz trinhx Zoz thôngz tỉnh Lào Cai puz pâuz: Nhiv no tưz xêir tsov tâu taz viv uô chiê kriz uô trâu hâur shôngk shông 2024 no: “Hâur iz ntu lur thiêz zuôr muôx plas cêr chiê kriz uô qox. Tưz ntâu jiês sêiz lax pêz tưz thôngx ziv tâu qơư uô thiêz qox lox đar, ntêr li chak, têx ndê qox cux tưz tâu sêiz lax thôngx ziv lơưv”.

           Qox cêr ar muk đhâu đêx đuz ntus đriv Bản Vược-Bá Sái tâu uô tiêr zuôr tror paz trâu oz tos uô tâu jông đuô sik côngv đhâu ntus đriv; paz trâu huôv tsar kinh têr nhoz têx tỉnh hâur thax tsav kinh têr Côn Minh (Trung Quốc)-Lào Cai-Hà Nội-Hải Phòng-Quảng Ninh (Việt Nam) thiêz tas nro oz têz qơưk./.

CTV TTTB-Lik Thox cxêik nhênhv

Têx uô tâu truôx txix luôs hâux lưv fuô yax kriê chei têz qơưk nhoz ntus đriv Lai Châu

             Jok Cô Lô Hồ, xã Tà Tổng, huyện Mường Tè, tỉnh Lai Châu tưz muôx jiês zos qơư cuz nxor lok uô vax tsưr tsi trơưk chei, siz txênhz ar liêx têz, uô cxâuv têx cui tinhv lok tsưx phưv jôngr ntông, uô cxâuv chei siz zuôr thiêz chuôz zis.... Têx txuz li heik sâuv tưz muôx jiês uô xã hội, chính trị tsi truôx tuk hâur iz ntuk ntêr. Zơưv Lình Xênhv Vax, Bí thư Chi bộ, tsar jok Cô Lô Hồ heik: “Đhâu thâuv tâu heik, fuô kriê lok têz qơưk têx chei, pêz sơưr đơưk tưz pâuz tsênhz đuô, tsôngv niêv txir lax pêx xênhv cux uô jông đuô luôs hâux lưv tsưx phưv jôngr ntông, tsi uô cxâuv, tsi ntor luôx uô ruôr hiêv jôngr. Yax kriê tsôngv pêx xênhv tsoz phưz, por hưv zuk chuôz zis cov jông đuô thiêz sir jos khưr huôv tsar uô nox chiê truôx tuk luz nênhx, chuôz zis”.

            Cux iz zav li xã Tà tổng, txơưv zos tsênhv qơư hành chính, chính trị hâur huyện, taz sik thị trấn Mường Tè cux muôx jiês zos qơư cuz nxor lok zax zênhz; siz txênhz ar liêx têz, siz pênhr cov ntêr niêx ntâu shông. Chiê tsôngv pêx xênhv pâuz tsênhz lok Đảng, têz qơưk têx chei fuô kriê, shông 2023 Ủy ban thị trấn tưz hux jos đros Hôiv đôngx thiêz cxuô ban, ngênhx, đoanx thêv huyện Mường Tè tsưr tsix yênhx châuv jiês  piêr kriê têx chei têz qơưk txos trâu tsôngv niêv txir lax pêx xênhv. Zơưv Lý Go Ky, Phưv Chủ tịch Ủy ban thị trấn Mường Tè, huyện Mường Tè heik pâuz: “Niêx shông thị trấn Hôiv đôngx piêr kriê chei têz qơưk puôr lênhx cxiv tsa tsưr ziv txix hâur shôngk shông chiê yax kriê têx chei têz qơưk txos trâu tsôngv lax pêx xênhv sơưr đơưk pâuz tsênhz, pâuz cxuô. Pêz tsov cưv piêr kriê trâu têx qơư khênhr muôx cuz nxor, phiv liv. Viv tsôngv pêx xênhv nhoz têx qơư co txux chi, tsưr ziv jênhv pâuz tsi yuô siz luôs, siz xưk, pêz cux tsov cưv xeir nênhs thiêz têx tsênhv njiêz huv đros chiê yax kriê”.

            Chiê cxiv tsa, uô jông luôs hâux lưv yax kriê têx chei têz qơưk, hâur shông huyện Mường Tè tưz qênhz shuôs đuô têx tổ đơưk tu têx cuz nxor  ntơưv qơư reik đros uô jông hâux lưv đơưk kho têx li heik sâuv, đhâu ntơư txo grêk tsơưs cuz nxor, phiv liv hâur tsôngv pêx xênhv. Txos nhiv no, chor nênhs lês uô hâux lưv đơưk tu têx cuz nxor tưz uô tâu jông hâux lưv zok muôz, têx li siz txênhz ar liêx têz uz no....hâur thax tsav puôr lênhx tâu đơưk tu zênhx max, tsi chiê muôx yưv phiv liv, siz pênhr ntêr, heik txos trâu têx hloz thênhv siêz. Pos Lù Phí Pa, Tsar phongx Tư pháp huyện Mường Tè, tỉnh Lai Châu heik pâuz: “Pêz tưz sir jos nhênhz chơưv trâu Ủy ban huyện lok têx tsaz yênhx, tsưr ziv chiê fuô kriê têz qơưk têx chei txos trâu tsôngv pêx xênhv cov sơưr đơưk pâuz tsênhz mênhx. Hâur shông 2023, pêz sir jos trâu hâux lưv yax kriê chei siz zuôr, phênhv ntâu zos siz zuôr tsi txưv shông thiêz siz zuôr cxênhz jê”.

            Uô jông Hôiv đôngx piêr kriê chei têz qơưk têx hâux lưv tâu zok muôz, huyện Mường Tè tưz sir jos piêr kriê têz qơưk têx chei txos trâu chuôz zis, côngv thôngx đhâu ntâu tsưr ziv li: Yax kriê txix lul heik, têx jiês cơưv jêx jok.... Hâur co, chor lâul jok, tsar jok, txir ndâux txir luk thâuv tưs cux zos têx lênhx uô ntêx nyuôs yax kriê chei têz qơưk txos trâu tsôngv niêv txir cưr tix nênhx tsa sơưr đơưk. Khov li co, chính trị, xã hội thâuv tưs cux truôx tuk, paz uô tâu jông hâux lưv huôv tsar kinh tế-xã hội ntơưv qơư./.

Khắc Kiên-Riê Lâux cxeik, nhênhv