Jax sâu thưr 3 hnuz 19/7/2016

Sơn La: Phiv liv txix yuôx tuô đrox

Txos chêix uô kôngz lôngk, chuôs li chuôz zis pêx xênhv tưs cux muk zuôr yuôx tuô đrox, viv no zos zav yuôx tuô đrox muôx chêx cur, tsik tas ntâu côngz thâuv muk uô liêx têz. Taz sik, đrâuv chiê tuô đrox, mak zôngv yuôx tuô đrox chiê nox tuôs thâuv njiz cêr pôngz siêz, phiv liv cux muôx ntâu. Iz zav li niêv tix Quàng Thị Kiên 26 shông, nhoz ntơưv huyện Mường La, tỉnh Sơn La, viv siz char hâur tsêr tưz zôngv yuôx tuô đrox chiê nox tuôs, tuôx tsêr kho moz chiê chơưv kho muôx 10 hnuz luk no, taz sik đas jos mak tsênhv tsik tâu muôx. Zơưv Cà Văn Châu, nênhs hâur niêv tix Quảng Thị Kiên puz pâuz: “Yuô tuô đrox mak lênhx tưs cux pâuz, tas nro nhuôs zâu. Chuô zis tsuôk vav tiêk mê nhuôs jông mok muk tsêr xưz”.

Iz zav li niêv tix Quàng Thị Kiên tsuôk zos iz hâur lok six ntâu lênhx nênhs viv siz char hâur chuôz zis, mak nox yuôx tuô đrox. Tsuôk hâur shôngk shông txos nhiv no, tsêr kho moz đa khoa tỉnh Sơn La tưz jênhv xar muôx 100 lênhx nênhs trâus tưx tiv nox yuôx tuô đrox, tsik tâu xav txos yênhx puô lênhx nênhs chơưv kho ntơưv chor tsêr kho moz huyện, lok sik chor nênhs chox tuôx chơưv paz tsik zênhx. Thạc sỹ, Bác sĩ Mè Thị Xuân, phưv trưởng khoa chơưv paz đas jos-tir tar tưx, tsêr kho moz đa khoa tỉnh Sơn La puz pâuz: Hâuk iz pak tsơus yuôx tuô đrox, txix 10 txos 20 mil xưz tsik tâu chơưv paz ndar six hơưv mak zuôr trấu stuôs. Hok chox tuôx tsêr kho moz chơưv kho sêi mak chơưv kho cux phiv liv thiêz tas ntâu đas jos, nhiêx txiêx: “Zos tiêk nênhs moz tuôx kho nzor hâur 6 six hơưv đhâu thâuv nox yuôx, mak nox tâu chor yuôx tuô đrox paraquat zos zav hlơưr đrox tuôs sêi, mak nhiv no zos liv nyar. Taz sik tsưr ziv no tiv iz zos kỹ thuật yiêz, bảo hiểm tsik tâu muôx nhiêx thêv hâur bê ntơưr viv li phênhv ntâu vax tsêr tsuv chiv chir thêv nhiêx trâu liv nyar, thiêz nhiêx txiêx cux tas ntâu”.

Nhoz Sơn La nhiv no, lênhx tưs cux zuôr zôngx ziv zuôr tâu yuôx tuô đrox, đros gri zos txix 50 txos 100 cxênhz đêiv iz hưx 900ml. Lơưr Chi cục chos kôngz lôngk thiêz por vêv đrox tsuôs tỉnh Sơn La li thôngz sâu, hâur shông 2015 tưz muôx 150.000 ntâu cir yuôx tuô đrox thiêz txos nhiv no iz huôv tỉnh muôx 450 ntâu qơư kinh doanh yuôx por vêv đrox tsuôs. Đros co tsênhv muôx yênhx puô qơư nhiês muôl muôs yuôx, tsik txâuk tsar tov cux tsênhv muôx, tiv zix zos ntơưv chor thax tsav nhoz đêz, tox siêz. No cux zos chi cụ chos kôngz lôngk thiêz por vêv đrox tsuôs tỉnh Sơn La li iz hâur tễ xkror phiv liv lok côngz xưv coangr lik. Zơưv Phạm Văn Hùng, phưv chi cục trưởng, chi cục chos kôngz lôngk thiêz por vêv đrox tsuôs tỉnh Sơn La puz pâuz: “Chor qơư muôl muôs zâu, nhiês muôs mak uô lơưr chêix. Têx kror li co mak pêz xưv lik ciês zos tiêk pov tâu, hok tsik pov mak cux tsik pov kaz uô li chak. Co zos kror mak pêz cux lax uô, pêz cux muôx tsơưs nênhs hok thax tsav đar, viv li cux lax uô tâu”.

Hâux lưv zôngv yuôx tuô đrox paz trâu pêx xênhv cxênhx txuôs tâu six hơưv, cux xưk li đas jos luôx suô đrox. Taz sik, sir zôngv yuôx tuô đrox tsik huv tsưr ziv tưz uô muôx yưv têx phiv liv lox. Viv li, chor nganhx txơưx jênhv tsuv uô truôx đuô côngz xưv coangr lik, chiê pêx xênhv sir zôngv yuôx tuô đrox cov huv li tsưr ziv, tsik chiê muôx yưv têx phiv liv tsik jông tưs./.

(Hoàng Long-Lik Thox cxêik nhênhv)