9 tsêr cơưv nội trú oz cấp tsênhv jux juk tâu uô tiêr ntơưv têx xã ntus đriv Điện Biên

Têx hnuz no, ntơưv công trường cxiv tsa Tsêr cơưv Phôv thông nội trú Cxênhx iz thiêz Cxênhx oz Thanh Yên, têx luôs hâux lưv thâuv tưs cux tâu sir jos uô. Công nhân tâu huiz tôngv chôngz tiv zix, têx meir tâu chiê uô hâux lưv tsi so cov uô tiêr têx tsêr lớp cơưv thiêz chor côngz trênhx txơưr đuô.

Zơưv Ngô Văn Bút, Giám đốc Công ty TNHH Tư vấn thiêz cxiv tsa Ánh Tuyết, tỉnh Điện Biên puz pâuz: Chiê uô cov tâu li tsưr ziv tso tơưv, taz viv tsênhv sir jos uô ntâu luôs hâux lưv, uô nzir six hơưv, uô thâuv đruôz hnuz thiêz hmo ntux hur si: “Ntơưv công trường thâuv tưs cux muôx txix 300 - 400 lênhx nênhs muôx têx tổ đros têx meir câuk ar, meir luôv ar cux li nênhs lox tôngv. Muôx têx thâuv pêz chox kriê uô hmo ntux thiêz uô đruôz hnuz hur si cov uô tâu trơưk tsưr ziv tỉnh tưz tso tơưv thiêz sir jos uô cov txos hnuz 31/8 pêz zuôr choz zok côngz trênhx no trâu tỉnh, trâu xã thiêz tsưr yưv pênhr muôz lok txêik tok têx nhuôs tuôx cơưv tâu shông cơưv yiêz”.

Lơưr Sở Zoz zux tỉnh Điện Biên, 9 tsêr cơưv phôv thông nội trú oz cấp ntơưv têx xã ntus đriv zos: Nà Bủng, Nậm Kè, Quảng Lâm, Sín Thầu, Núa Ngam, Thanh Yên, Thanh Nưa, Sam Mứn thiêz Mường Nhà tsênhv tâu cxơưz tiês cxiv tsa. Txos nhiv no, têx dự án puôr lênhx uô tâu txix 69-100%. Hâur co, têx tsêr cơưv ntơưv têx xã Thanh Nưa, Sam Mứn, Thanh Yên, Nậm Kè thiêz Mường Nhà phênhv ntâu uô tâu trơưk tsưr ziv tso tơưv; yuôr têx tsêr cơưv ntơưv têx xã Quảng Lâm, Sín Thầu thiêz Núa Ngam tsênhv tâu sir jos cxaz nzir pênhr jos, chuôz zênhx chiê uô tiêr li tsưr ziv tưz tso tơưv.

Zơưv Nguyễn Xuân Thuận, Phưv Giám đốc Sở Zoz zux tỉnh Điện Biên puz pâuz: Chiê uô tâu cov huv zos tsưr ziv tso tơưv thiêz uô tâu jông tsơưr lươngv côngz trinhx, tsưr yưv pênhr thiêz nganhx zoz zux tsik so qênhz yuôx, đơưk kho têx phiv liv muôx yưv, đros co paz jông lok pênhr jos chiê tsưr yưv pênhr kriz uô tâu tsi so: “Yênhx hnuz pêz puôr lênhx qênhz yuôx chiê đơưk kho tâu têx phiv liv muôx yưv. Nhiv no lok công nhân sâuv công trường, pêz heik cov uô txos kror tưs mak uô tiêr kror co thiêz chiê chor công nhân uô ciês têx luôs hâux lưv txuôk nzir cov uô tâu trơưk tsưr ziv tso tơưv. Đros co cux heik cov muôz pênhr nhiêx chiê paz trâu chor nênhs thầu zuôr chuôz lov, uô cov tâu zos đrêiv tsưr ziv tưz tso tơưv”.

Tưz tsik zos bax cxuô kror chiê têx tsêr cơưv kriz cơưv tâu ciês hâur shôngk shông cơưv xuz thơưx, tỉnh Điện Biên cux tsênhv sir jos paz trâu uô tiêr cxix cxuô 9 côngz trênhx uô ntêx six hơưv kriz cơưv shông cơưv yiêz. Txos nhiv no, tas nro 9 tsêr cơưv tưz bax tâu têx lênhx nênhs sêiz car; hâux lưv xeir zuôr shux xênhz txix 98 - 100%. Chor tsêr cơưv puôr lênhx tưz uô tâu jông tsưr ziv tsưr tsix uô jâuz mor nox, bax lênhx nênhs sêiz car shux xênhz nhoz hâur tsêr cơưv; sêi đrơưv zuôr têx chuôz zênhx kriê ntơưr, chuôz zênhx hâur tsêr trâu shux xênhz nhoz thiêz bax txâuk cxuô zav lok nox, nhoz, tsoz phưz đas jos trâu shux xênhz.

Zơưv Lê Thành Đô, Phưv Bí thư Thường trực Tỉnh uỷ, Chủ tịch Hôiv đồng tỉnh Điện Biên puz pâuz: Chiê paz cxiv tsa cov sêi, tỉnh tưz heik têx taz viv, nênhs thầu cxaz nzir zuôr xar 1.200 lênhx nênhs uô, sir jos uô tiêr tas nro 9 tsêr cơưv nội trú oz cấp uô ntêx thâuv hla trâu shông cơưv yiêz: “Tsuv tsêx trung siêz tiv zix, bax lênhx nênhs, meir, chuôz zênhx thiêz tsưr tsix kriz uô khoa học, tsuv uô nzir six hơưv chiê uô cov tâu trơưk li tsưr ziv tưz tso tơưv. Tiv oz, zos tsuv qênhz shuôs đuô yênhx ntu uô têx luôs hâux lưv chiê kho đuô six hơưv kriz uô cov uô tâu tiêr uô ntêx hnuz 31/8. Sir jos tas nro phênhv cxiv tsa tsuv uô tiêr uô ntêx chêix ntux nas chiê hâur ntu chêix ntux nas mak kriz têx luôs hâux lưv nhoz saz hâur tsêr”.

Luôs hâux lưv muôz tas nro 9 luz tsêr cơưv phôv thôngz nội trú oz cấp yiêz no lok kriê ntơưr tsi tiêk paz tau jông hâux lưv cơưv ntơưr trâu shux xênhz têx xã ntus đriv, mak tsênhv iz thênhv jux juk đơưk kho tâu têx phiv liv cêr cơưv ntơưr ntơưv thax tsav qơư. Hâur qênhx shênhx tas nro tỉnh Điện Biên tsênhv yuôr 1.135 tsêr cơưv ntơưv têx jêx jok, tsưr ziv tsêr cơưv nội trú oz cấp tâu vav chiê siêz zuôr paz trâu chor shux xênhz tâu cơưv ntơưr, xênhz huôx hâur tênhx qơư jông đuô, paz phênhv gra siêz tsơưr lươngv zoz zux, txo grês sik cêv kuôk nhoz tox siêz đros têx thax tsav txơưr. Têx luz tsêr cơưv yiêz tsênhv jux juk tâu uô tiêr nhiv no zuôr tsik zos qơư kriê ntơưr xưz, mak tsênhv zos qơư chiê kriê nzir pênhr jos, cxơưz cxiz shux xênhz nhoz thax tsav ntus đriv tuôx cơưv ntơưr thiêz paz huôv tsar tâu truôx jông hax tsav ntus đriv têz qơưk./.

Vũ Lợi-Lik Thox cxêik nhênhv

PHAX TAR MOZ VƯV

Chiê phax, tar moz vưv, tsôngv box tsuv uô jông têx tsưr ziv li đrav kaz:

Tiv iz: Tu zus đêr, yưk tsuv muôx txơưx jênhv.

- Đăng cir tu zus zos tiv phaz cui tênhv.

- Cxax yuôx vắc xin phax tar moz vưv cxix cxuô thiêz tror cxax nzir hâur yênhx shông.

- Tsi tso đêz muk tâus tov têx cêr; thâuv chox đêr muk ntơưv têx qơư muôx chôngz lênhx nênhs tsuv chox tơưz lôngx kror ndâux lok sik muôz hluô khi.

Tiv oz: Tsik jêk đêr lok sik nhoz jê chor đêr, yưk tov têx cêr zuk tsi pâuz zos lênhx tưs tu zus, tiv zix zos têx tuk đêr, yưk nhâuv lok sik tsi ciêz li fênhx yax.

Tiv pêz: Zos trâus đêr lok sik yưk tov, tsuôz lok sik zeiv ntơưv kror cxaz, tsuv uô ciês têx tsưr ziv li đrav kaz:

- Zôngv đêx hur thiêz yuôx phongx nzuôr hur si kror cxaz tsik so tsơưs tiv zix 15 phênhz.

- Tsi muôz blôngx, tsi plênhr yuôx đrox njuôz, tsi chơưv kho lơưr chênhr zênhv txix nzor.

- Tsi zôngv ntâuz krưr kror cxaz ntov.

- Tsuv ciêr chênhr chox ciês muk qơư y tế jê tiv zix chiê tâu bác sĩ heik kriê thiêz cxax yuôx vắc xin phax tar moz vưv sei tiv zix. Zos zuôr trâus, mak zuôr cxax yuôx huyết thanh phax tar moz vưv.

Tsôngv pox nhuôk tsuv tsov cưv: Tsi cxoz tos sêz tuk đêr, yưk co pok huôv moz thiêx mav li muk cxax yuôx, viv li co zuôr uô pôngz lơưv six hơưv jông tiv zix chiê phax tar moz.

Thâuv tưz huôv moz, lênhx nênhs moz zuôr muôx têx moz yưv li:

- Uô cuz, moz tâuz hâu, gênhs gênhs.

- Nyei đêx, nyei chuô, nyei pov cêr.

- Lax nox hâuk tâu, lok ntâu kâuz ndâus.

- Phênhz tsi mênhx, tsi tâu, uô kror muôk njês njok.

Thâuv tưz pov muôx yưv têx li heik co mak zuôr tsi muôx yuôx chơưv kho tâu, lênhx nênhs moz zuôr trâus tuôs đhâu oz pêz hnuz. Viv li, cxax yuôx phax tar moz vưv nzor zos tsưr ziv jông tiv zix chiê chơưv paz lênhx nênhs tsi trâus huôv moz vưv.

Tsuv chuv tôngv por vêv zuk, chuôz zis thiêz côngv thôngx txix uô jông têx tsưr ziv phax tar moz vưv./.

Hồng Việt - Txâur Vax cxeik nhênhv