Nghị định 339 cxơưz paz shux xênhz ntus đriv truôx siêz tuôx trâu tsêr cơưv ntơưr

Nhoz thax tsav tox siêz ntus đriv, tsêr cơưv phổ thông dân tộc niêv txir zus mor cxênhx iz Nậm Xe, ntơưv xã Sin Suối Hồ, tỉnh Lai Châu tưz ntêr lok cor cav shux xênhz cơưv ntơưr tas zênhx max muk tsêr nox suk, zar hnuz kêix li tror siz zâuv tuôx cơưv. Shông cơưv 2025-2026, tas nro tsêr cơưv muôx 778 lênhx shux xênhz, hâur co 429 lênhx tâu nox nhoz hâur tsêr cơưv, cơưv ntơưr, yuôr 349 lênhx tâu paz pluôk su lơưr Nghị định 339. Bâuv li co shux xênhz cux iz zav yênhx puô pluôk nox muôx cxix cxuô zav jâuz mor sor si tsênhv tok chor shux xênhz hâur niêx hnuz.

Trơưk Chính phủ Nghị định 339/2025/NĐ-CP, iz lênhx shux xênhz tâu paz 450 cxênhz nhiêx nox thiêz 8 cir cxur iz hlik; six hơưv, hnuz nhôngs paz zos paz hâur chor hli shux xênhz cơưv ntơưr hâur tsêr cơưv, tsi tsênhr đhâu 9 luz hlik iz shông cơưv. Ciês shux xênhz lớp 1 zos heir nênhs tsơưs cơưv luk Choz Tsiz uô ntêx thâuv zuôr ndê lớp 1 mak tâu paz nzir iz hlik. Cưk kriê ntơưr Bùi thị Khuyên, Phưv thơưx seiz car tsêr cơưv phổ thông dân niêv txir zus mor cxênhx iz Nậm Xe, tỉnh Lai Châu heik pâuz:“Tsêr cơưv tưz muôx tsưr ziv ntiêr nênhs uô jâuz mor ntơưv têx tsêr cơưv trâu shux xênhz nox thiêz muôz têx pav lêr trâu shux xênhz pư, so ntơưv tsêr cơưv. Yuôr ntơưv 2 tsêr cơưv lox, pêz cux ntiêr nênhs uô jâuz mor nzir trâu têx shux xênhz nox hur si”.

Tsênhv chei no cux cui tinhv tsênhz mênhx lênhx nênhs tâu paz, taz por côngz fênhx, zos đreiv chei tso tơưv. Zos lênhx shux xênhz tưs tâu paz ntâu zav mak pêz zuôr kror chei paz siêz yax; têx cui tinhv, chei paz txơưr đuô cux tâu sơưv hur si. Đros trâu chor shux xênhz tsi nox suk hâur tsêr cơưv mak zuôr tsi tâu paz. Nghị định no tâu shux xênhz têx lênhx uô niêv uô txir jông siêz, shir phaz lus tok njôngr. Tix lâus Trần Ngọc Văn, nhoz jok Huổi Hán, xã Sin Suối Hồ, tỉnh Lai Châu heik:“Cur chuôz zis nhoz kuôk đêz tsêr cơưv xar muôx iz cêik. Thâuv tưs zuôr tar su txos 10 six 30 phênhz mak huôk njôngr six hơưv muk tok mê nhuôv ntơưv trôngx vak tsêr cơưv xưz, lok six chôngz nênhs hênhr, zos chiê têx mê nhuôv nưk muk vơưv nưk nyei tsav yêz siz yar siz tsông ntos trâus kror tưs, viv li thâuv  tưs mê nhuôv zuôr so ntơưr cux huôk njôngr six hơưv muk ntơưr xưz, tưz uô tsi yênhx đaz tsi hlol. Txix thâuv muôx Nghị định no cur jông siêz cơưk thiêz vav tok njôngr nzor tâu fuô uô chiê zôngx ziv trâu chor mê nhuôv thiêz chuôz zis”.

Tsi tiêk paz pluôk nox trâu shux xênhz, Nghị định 339 tsênhv paz nhiêx txiêx trâu têx tsêr cơưv uô pluôk su trâu shux xênhz nox, zuôr têx chuôz zênhx uz no phưx vưv kriê thiêz cơưv txux chi, paz thêv nhiêx tênhv, nhiêx đêx; txơưv têx tsêr cơưv hâur jêx jok, nhoz tox siêz đêz đrôngs cux tâu paz hur si tsi chiê lênhx shux xênhz tưs trâus pôngz kaz. Nguyễn Nhà Kỳ, shux xênhz lớp 5A1, Tsêr cơưv phổ thông Dân tộc niêv txir zus mor cxênhx iz Nậm Xe, tỉnh Lai Châu heik:“Cur tsêr nhoz mê njik đêz tsêr cơưv, hnuz tưs tar su cur cux cheix yêz tuôv lok zos yêz câux vaz muk tsêr nox suk xưz. Cur lok six xar tâu nox nhoz hâur tsêr cơưv, cơưv ntơưr thiêz tâu đros chor fôngx zưs uô si thâuv so ntơưr”.

Chính phủ Nghị định 339 tsi tiêk zos tsênhv chei paz truôx tuk, tsênhv zos Đảng, têz qơưk cêr sik pheiz kênh phiv liv trâu zoz zux tox siêz, ntus đriv. Thâuv fuô tsênhv tsênhz chei no, shux xênhz niêv txir zuôr tsi tsuv tuôx nhoz tok mê nhuôv yênhx paz, yênhx pơưs ntơưv têx trôngx vak tsêr cơưv li thâuv ntêx. Têx pluôk nox muôx cxix cxuô zav jâuz mor sor zuôr paz shux xênhz tso siêz cơưv ntâuz ntơưr, cxơưz paz gra siêz tsơưr lươngv zoz zux thiêz muôx qơư truôx tuk trâu têx thax tsav tsênhv yuôr ntâu txov nhêv li Lai Châu./.

                                                                                                                   CTVVOVTB-Riê Lâux cxeik, nhênhv

Shux xênhz nhoz tox siêz tsuv hnar trik yo sor hâur têx hnuz

ntux no njiv

          Ntơưv xã Phình Hồ, tỉnh Lào Cai, jêx tưv hmo ntu thiêz sơưr nzor têx hnuz jê ntơưv no tsuôk txix 6-7 tưv, ntux no njiv. Txix qênhx shênhx ntux no njiv li ntơưv, têx lênhx uô niêv uô txir tsuv tsưv ziv đuô txos mê nhuôk li đas jos, Mê nhuôk tâu bax trik yo sor, fuôv, vuôv txir thiêz tâu niêv txir thâux muk cơưv ntơưr tsi tsuv muk tơư thiêz. Tix lâuk Zax Xênhv Shôngx pheiz kênh:“Ntux no njiv li no tsuv hnhar sor trâu mê nhuôk, chox mê nhuôk muk cơưv ntơưr thiêz tos mê nhuôk lok tsêr, tsi tsuv muk tơư chiê taz por đas jos”.

          Tsêr cơưv mê nhuôk zâu Họa Mi, xã Phình Hồ nhiv no muôx 635 lênhx shux xênhz đros 3 qơư kriê ntơưr, phênhv ntâu zos tsôngv box mênhx cxưx Hmôngz. Đrâuv hâux lưv cơưv ntơưr hâur qơư cơưv truôx jông, tsi trâus chuô njơư, têx mê nhuôk taz por muôx txâuk pav sor, nox siêr hâuk bâu. 3 qơư kriê ntơưr tsi tsưr tsix uô jâuz mor nox bán trú, shux xênhz gra mor, tsêr cơưv bax cxaz lâux câuz thiêz tuv chiê cưk kriê râuz jâuz mor trâu mê nhuôk nox sor hâur têx hnuz ntux no njiv. Cưk kriê Vũ Thị Liên, Hiệu trưởng tsêr cơưv puz pâuz:“Đros côngz xưv tuôr cov sor trâu shux xênhz hâur têx hnuz ntux no njiv li no mak tsêr cơưv zuôr tsi tsưr tsix têx huôx tôngv đrâuv jôngr mak chiê shux xênhz huôx tôngv hâur lớp cơưv, thôngx cxix cux yax mông chiê shux xênhz tsov cưv. Shux xênhz li niêv txir tâu heik kriê tsuv hnar sor trâu mê nhuôk, trâu vuôv txir tês, vuôv txir tơư thiêz ntông mov sor; heik cxuô têx lênhx uô niêv uô txir lok six tsov cưv. Lok nox hâuk, tsêr cơưv chox kriê têx lênhx uô jâuz mor trâu shux xênhz mak tsuv chiê shux xênhz nox siêr hâuk bâu”.

          Ntơưv xã Trạm Tấu, côngz xưv phax tar ntux no trâu shux xênhz thiêz tsôngv box cux tâu tsov cưv. Zơưv Bùi Hồng Anh, Phưv chủ tịch UB xã puz pâuz: tas nro xã nhiv no muôx 3 cxênhz 500 ntâu lênhx shux xxênhz, nhoz 8 tsêr cơưv, hâur co muôx 4 tsêr cơưv mê nhuôk zâu, 4 tsêr cơưv phổ thôngz niêv txir zus mor cxênhx 1 thiêz cxênhx 2. têx hnuz ntux no njiv, chính quyênx tiv phaz tưz krêz uô hâux lưv yax mông thiêz heik kriê phax tar ntux no txos yênhx jêx jos, tiv zix zos tsov cưv txos têx chuôz zis txov nhêv:“Xã tưz uô côngz xưv thôngz xor mông sâuv cxix luôk thôngz xor mông xã thâuv sơưr nzor thiêz zar hnuz keix, iz jiês 30 phênhz txos 1 six hơưv heik kriê têx tsưr ziv phax tar ntux no txix 2 zav luk heik zos luk Hmôngz thiêz luk choz tsiz, đrâuv co, thôngz đhâu têx jiês xênhz huôx chi bộ, xã heik kriê tsưr ziv phax tar ntux no txix têx ntâuz ntơưr chiê têx lênhx tsar jos yax mông txos têx ziv chuôz zis thiêz têx đồng chí đảng viên hâur chi bộ, chiê uô jông côngz xưv yax mông trâu têx lênhx uô niêv uô txir thiêz tsôngv box”.

          Lơưr njuôs pov, tsênhv zuôr muôx têx jiês ntux no njiv, jêx tưv muôx têx thâuv grês lok six kis. Hâux lưv sik côngv hâur shux xênhz li niêv txir, tsêr cơưv thiêz chính quyênx tiv phaz chiê por vêv đas jos trâu mê nhuok shux xênhz tưz thiêz tsênhv paz shux xênhz nhoz tox siêz Lào Cai muk cơưv ntơưr taz por đuô, tuôr truôx hâux lưv kriê thiêz cơưv ntơưr hâur cheix ntux no njiv./.

                                                                                                                  Thừa Xuân-Txâur Vax cxeik nhênhv