Ntênhk hội đhiê pax vuôs-zos qơư txuôk đros ntâu vênhx huôv nhoz Lai Châu

Txix thâuv têis cik sơưr nzor, hâur thax tsav yar tiêx Nà Khương, tsôngv px cxuô hêir nênhs sđ tưz hnar zuk hêir nênhs têx tsôngk tiêz, tsôngk yo jông jav cxôngx nzor tuôx kriz cêr lov jêv đros trâu têx đruôk tôngx, cxêz tôngx đror lov jêv lul. Hur si chor lâuk uô niêv, uô txir cux li têx mê nhuôv thiêz tsôngv kruô sđ puôr lênhx đros côngv cêr lov jêv đhiê pax vuôs. Pos Hoàng Thị Lợi, hêir nênhs Poz Ziz, nhoz jos Hua Sẳn, xã Bản Bo, tỉnh Lai Châu shir phaz lul hêik pâuz: “Cur zos chor uô cêr lov jêv hâur jos Hua Sẳn. Cur jông siêz thâuv tâu đros côngv uô têx cêr lov jêv hâur jiês kriz ntênhk hội no thiêz cur cux xar njôngr hâu nov xã tsuv kriz uô ntâu jiês cêr lov jêv, cov tuôr tâu tsês zuk hêir nênhs têx vênhx huôv jông cxôngx nzor cov tsôngv kruô oz chas têz qơưs pâuz txos”

Bản Bo thiêz Nà Tăm zos oz tsênhv qơư xã chox lok uô hâux lưv uô cê hâur thax tsav tỉnh Lai Châu. Hâur tsênhv qơư co, phênhv ntâu zos hêir nênhs poz ziz thiêz choz tsiz huôv tsar cêr uô nênhx nhoz. Đhâu muôz oz xax chox lok uô iz xã uô hâux lưv uô cê, hâu nov xã tưz yax kriê tsôngv px hâur tsênhv qơư co tuôr tsês zuk hêir nênhs têx txux chi, vênhx huôv jông cxôngx nzor tsik chiê pôngz plox. Ntơư zos txux chiê đhiê pax vuôs, sênhr chêr, vênhx huôv tưr phiêz tơưz, tưr têx tuz nxêik jông jông gâux, tưr têx tsôngk tiêz, tsôngk yo jông jav, tưr gruôv gox đêx…muôx chôngz lênhx kruô tuôx sêiz shuôk. Pos Nguyễn Thu Thủy, iz lênhx kruô nhoz Hà Nội tuôx ndis uô si shir phaz lul hêik pâuz: “Thâuv tuôx sêiz shuôk txos thax tsav qơư faz Bắc no, cur jông siêz hênhr. Lar hêik zos tsôngv px hâur thax tsav co têx txux chi đhiê pax vuôs, sênhr chêr…cxơưz cxiz tâu chôngz lênhx kruô tuôx sêiz shuôk”.

Zơưv Nguyễn Văn Chiến, Phưv Chủ tịch UBND xã Bản Bo, tỉnh Lai Châu cux hêik pâuz tiêk: Kror jông yax ntơưv no zos, tsôngv px sđ têx hax huv tsiv uô tâu li: Jiz mur, cxur, yuôx zêx, têx ntâuz ntok cxôngx nzor….Đhâu co, hêik kriê têx muôx jông ntơưv qơư trâu tsôngv kruô pâuz txos, paz phênhv trâu xã muôx suôz bê lok cxuô qơư jông jav, dis uô si, sêiz shuôk têz qơưs txos Lai Châu: “Ntênhk hội đhiê pax vuôs, sênhr chêr zos hêir nênhs poz ziz iz ntênhk hội cxôngx nzor.  Thôngz đhâu ntênhk hội, đros trâu tsôngv px sđ tsưr ziv siêz xar njôngr, hâur iz shông yiêz, zuôr khưr sâu tâu ntâu kôngz lôngk, muôx luz nênhx tsâu sor đhâu hâur têx shông đhâu”.

Txix hêir nênhs poz ziz nhoz jos Nà Khương, xã Bản Bo, tỉnh Lai Châu ntênhk hội đhiê pax vuôs, sênhr chêr, cux chênhr zos cxơưz cxiz tsôngv px hâur thax tsav qơư co sik côngv đas jos tsưr ziv cxiv kho jêx jos-xã cov ziv hnuz ziv hlôngr yiêz thiêz huôv tsar-tsôngv px muôx luz nênhx tsâu sor./.

 Tsu cxêik nhênhv-Khắc Kiên

Phong slư-“Nênhs Tày txux chi heik cưr cxiêx gâux đrâul”

“Phong Slư- cur tưz shâuvthâuv tsênhv zâu, sênhr suôz heik trơưk li chor lâul, chor pos, chor niêv kriê. Pov chor lâul sênhr suôz heik, cur cux cơưv shâuv thiêz heik siz lưr. Đros co, pêz tsênhv heik nênhs Nùng têx txux chi cưr cxiêx Sli, hêik gâux then....hur si. Heik cxuô, zuk heir nênhs têx txux chi vênhx huôv, cêr lov jêv thâuv pêz ntu lênhx tưs cux pâuz sênhr suôz heik”.

“Thâuv ntêx cur pov chor pos, têx lênhx uô niêv muk sênhr chêr uô si lov jêv mak cur cux đros lơưr muk chiê mnôngs têx lâul heik thiêz cơưv shâuv, jux juk txơưv pâuz sênhr suôz heik xưz. Thâuv ntu co, lok six txov nhêv tsi muôx lênhx tưs krêz lớp kriê têx txux chi ntơư li nhiv no, tsuôk zos lênhx tưs nhiêv mnôngs, nhiêv cơưv mak tưx cơưv shâuv chor lâul, têx lênhx txơưx sênhr suôz ntơư txux chi xưz”.

Tsi muôx ntơưr cơưv, tsi muôx qơư kriê, têx tuz nhuôs hâur jok lênhx tưs nhiêv thiêz xar cơưv têx txux chi heik cưr cxiê Phong Slư mak tưx cơưv shâuv xưz. Lơưr mnôngs luôs lưv tus heik, sênhr chêr uô lov jêv txơưv ndo chiv jông tsês thiêz sênhr suôz heik, uô trơưk li ntơư. Jux juk têx txux chi cêr lov jêv no tâu kriê thiêz tuôr tsês đros đreiv sơưr đơưk luz nênhx xênhz huôx niêx hnuz iz cxênhx đhâu iz cxênhx, iz tiêv đhâu iz tiêv tsi pôngz plox xưk li zơưv Hoàng Văn Thình nhoz xã Lũng Nặm thiêz pos Sầm Thị Sinh nhoz xã Trường Hà, tỉnh Cao Bằng nhiv kruôr heik tas ntơư, Phong Slư tsi tiêk shâuv heik cov bliês, tsênhv jux juk yênhx cêr cor cav, muôx đrox đreiv trâu luz nênhx xênhz huôx yênhx hnuz.

Tsênhz tiês, Phong Slư zos têx suôz cưr cxiêx, txưv cưr cxiêx gâux đrâul sênhr heik siz lưr, xa têx lo luk jông, ndo yuô txos trâu tus zuk hluz, nhiêv trâus. Thâuv lênhk txeik thiêz hnor tâu têx pax luk, suôz cưr cxiêx sênhr heik co, luôs zuôr sênhr têx txưv  cưr cxiêx tror tuôx têz zuk têx luk heik, ntơư zos txux chi cưr cxiêx Phong Slư. Đhâu têx luk siz xa, siz lưr, siz têz li co, cưr cxiêx Phong Slư jux juk yênhx iz txux chi heik xa chor tuz nxeik hluôk, têx gơưv gâux đrâul siz sưv siz jông cêr ndo yuô, siz tok mông njôngr chiê tâu siz chuôs njiz.

Suôz cưr cxiêx Phong Slư tâu tuôr tsês đhâu ntâu tiêv tsi chiê pôngz plox li no chênhr zos iz txux chi cêr lov jêv jông. Txix têx luk kruôs, ndo txos  Đảng, Lâul Hôx côngz txiêx njis txos trâu heik lol cêr huôv tsar uô nox, gâux đrâul....puôr lênhx muôz sênhr uô suôz cưr cxiêx heik. Taz sik, chiê sênhr uô yênhx suôz cưr cxiêx heik muôx txưv, tâu sơưr đơưk nhiêv mnôngs mak tsi zôngx ziv. Tsuv pâuz cxuô luk Tày, pâuz tsênhz lok luz nênhx, cêr txov, tâu jông, muôz têx blôngx hmaz blôngx ntông cxuô tsar zav lok siz pir sênhr uô yênhx suôz cưr cxiêx. Pos Sầm Thị Sinh heik lol têx phiv liv li no: “Têx jax cưr cxiêx muôx lok six ntâu zav, heik lol Đảng, Lâul Hôx, tir ntâuk tros châuz cxiv tsa têz qơưk, uô nox uô hâuk, cưr cxiêx gâux đrâul, viv li pêz lok six nhiêv heik, xar tơưv têx tsưr ziv sênhr suôz heik uô cưr cxiêx lov jêv. Taz sik cux cur tsi pâuz muôz xar uô cưr cxiêx Tày heik. Têx jiês tâu muk nthuôr uô cêr lov jêv, cur khênhr thor txos têx lênhx txơưx sênhr chêr, hu gâux, heik cưr cxiêx ntơư paz kriê cur krêz suôz sênhr uô cưr cxiêx, pax huôv txix luk Tày xưz”.

Nhiv no, hâur ntu têz qơưk hlôngr yiêz, huôv tsar, cưr cxiêx Phong Slư tsi yuô tâu zôngv thiêz nthuôr uô lov jêv li thâuv chor lâul ntu lơưv. Taz sik nhoz ntâu jêx jok, suôz cưr cxiêx co cux tsênhv tâu tuôr tsês, sênhr heik uô  si lov jêv hâur têx jiês xênhz huôx côngv thôngx, hnuz hôiv vênhx huôv. Pos Nông Thị Loan nhoz xã Đông Khê heik: “Chiê tuôr tâu tsês zuk heir nênhs têx txux chi vênhx huôv tsi chiê pôngz plox mak hâur jêx jok muôx xor xưv, hnuz lov jêv li chas cux tsuv muôx têx txux chi vênhx huôv sênhr suôz heik cưr cxiêx uô si lov jêv, lar heik zos cưr cxiêx Phong Slư. Têx suôz cưr cxiêx ntơư zos heik lol Đảng, heik lol chor lâul têx côngz txiêx njis, heik lol cêr huôv tsar uô nox uô hnar , sik thôngx siêz, siz hluz siz paz. Tsi tas li cux muôx kênh jax heik lol tsôngv niêv txir cưr tix nênhx tsa hnuz lov jêv, cêr shir phaz thâuv Đảng, têz qơưk moz siêz txos pêx xênhv, paz uô cêr zôngx ziv muk lol. Lar heik hâur têx hnuz tsiêz mak tsôngv box siz zâuv tuôx trâu ntơưv tsêr vênhx huôv chiê siz lưr cưr cxiêx, nthuôr uô lov jêv....”.

Txix têx suôz cưr cxiêx sênhr heik uô lov jêv lus, txix têx lo luk jông, ndo yuô sênhr uô pax luk heik txix têx suôz cưr cxiêx, pax huôv Phong Slư, muôx têx khav tinhv, co tsi tiêk zos txux chi, suôz sênhr uô si lov jêv mak zos côngv thôngx nênhs Tày cêr uô nênhx xênhz huôx shir phaz lus hâur niêx hnuz. Đhâu ntâu niêx ntêr shông, txơưv luz nênhx tưz hlôngr yiêz, vav mênhx, taz sik nhoz cxuô jêx jok nênhs Tày ntơưv thax tsav Đông Bắc, txux chi heik cưr cxiêx Phong Slư cux tsênhv tâu tuôr tsês, nthuôr uô lov jêv hâur hnuz hôiv, têx jiês xênhz huôx vênhx huôv tsi chiê pôngz plox. Chor nênhs txơưx sênhr chêr hu gâux, heik cưr cxiêx nthuôr uô lov jêv li zơưv Hoàng Văn Thình, pos Sầm Thị Sinh....cux tsênhv niêx hnuz kriê zuk heir nênhs têx txux chi ntơư trâu cxênhx hluôk cơưv shâuv, đros tuôr tsês tsi chiê pôngz plox. Thâuv suôz cưr cxiêx ntơư tsênhv tâu sênhr heik nhoz hâur têx jêx jok, thâuv co sơưr đơưk cux tsênhv muôx cêr sik thôngx siêz, siz paz, siz hluz, nhiêv têz qơưk thiêz por hưv, tuôr tâu nênhs Tày têx txux chi vênhx huôv tsi chiê pôngz plox./.

VOVĐB-Riê Lâux cxeik, nhênhv