Đêiv ntơưr bâux-zos đêiv ntơưr sơưr đơưk tsês zuk siêz njênhs

Nhoz ntơưv thax tsav ntus đriv, jok Nậm Sò, phường Lào Cai, tỉnh Lào Cai zos 85 ziv chuôz zis kror qơư uô nênhx nhoz, phênhv ntâu zos tsôngv box cxuô mênhx cxưx tsơưs nênhs. Đros lơưr, yênhx jiês bâux xêir tưz tsik zos tas nro pêx xênhv hnuz hôiv, mak zos jiês chiê hêik txos jêx jok têx kror vav njôngr đhâu yênhx đêiv ntơưr bâux.

Hâur chor jiês sik thav ntơưv têx tos tsês chor hnuz no, pos Đặng Thị Dẩn – Tsar jok Nậm Sò, phường Lào Cai đros pox nhuôs thav txos chor canr bôv yiêz, muôx txux chi thiêz sir jos đros têx vav njôngr yiêz:

“Pêz vav tiêk pêx xênhv zuôr bâux xêir tâu chor canr bôv sir jos paz trâu pêx xênhv luz nênhx. Vav tiêk zuôr muôx têx tsênhv chêi jông đuô paz trâu chor jêx jok nhoz ntus đriv, chiê pox nhuôs tso siêz huôv tsar kinh têr, tuôr truôx jêx jok, paz trâu jêx jok huôv tsar, hlôngr yiêz jông đuô”.

Muk trâu thax tsav tox siêz Y Tý, tỉnh Lào Cai, đêiv ntơưr bâux tsênhv tâu sơưr đơưk njênhs njôngr trâu têx kror tsênhv tsênhz lok hạ tầng. Đros pêx xênhv nhoz ntơưv no zoz thôngz zos kror paz trâu sơưr đơưk tơưv tâu đhâu yêiz pluôs. Lơưr njênhs trâu chor ntơưr bâux zuôr bâux xêir tâu chor đaiv biểu siêz jông, muôx txux chi, pâuz tâu txos tox siêz têx kror cêr txov, sir jos paz trâu pêx xênhv. Tix lâus Tẩn Láo Ú – nhoz jok Sim San 2 hêik pâuz:

“Pêz vav njôngr cấp muôx vax huôv zuôr kho đuô chor cêr muk lok hâur jêx jok chiê pox nhuôs muk lok tâu zôngx ziv đuô. Vav tiêk chor nênhs tâu bâux zuôr sir jos cov pêx xênhv muôx tâu luz nênhx jông đuô, paz trâu pêx xênhv muôx luz nênhx truôx tuk đuô”.

Tuôr truôx cov ntus đriv hux fênhx, thôngx ziv, sik côngv thiêz huôv tsar tưz tsik zos jênhv vưv, mak tsênhv zos yênhx lênhx canr bôv, chiến sỹ nhoz no li siêz xar njôngr. Chor tuz lênhv têx ntơưr bâux zos muôx txơưx jênhv por vêv tsưr qênhx têz qơưk đros vav njôngr tez qơưk zuôr huôv tsar truôx đrênhk. Đại tá Nguyễn Kim Khánh-Chỉ huy trưởng ban Chỉ huy Quân sự xar Y Tý li hêik pâuz cux zos lưx lươngv vũ trạng tỉnh Lào Cai li têx siêz xar, vav njôngr đhâu zuk chor ntơưr bâux:

“Zos thax tsav ntus đriv nhoz đêz, pêz vav tiêk têz qơưk zuôr yưv pênhr trâu hạ tầng chiê huôv tsar du lịch, truôx đrênhk, paz ngaz tuk xar hôiv, ngaz tuk côx phax, uô tâu li co pêx xênhv luz nênhx thiêz tsâu sor, tự do thiêz shir phaz”.

Txơưv zos iz luz tỉnh tox siêz tsênhv yuôr ntâu txov nhêv, taz sik txix siêz njênhs njôngr trâu Đảng thiêz Têz qơưk, tsôngv box thax tsav ntus đriv Lào Cai njênhs tiêk, chor ntơưr bâux nhiv no chênhr zos kror paz trâu jêx jok ntux nênhx zuôr txos, zos kror paz truôx tuk trâu thax tsav ntus đriv têz qơưk./.

TTTB-Lik Thox cxêik nhênhv

Tênhx qơư nhoz Mộc Châu- Sơn La kiês nênhs: Chính quyênx yiêz thiêz nganhx muôx txơưx jênhv sik côngv seiz car

          Txix xor mông heik kriê, hnuz 27/2, UB phường Thảo Nguyên (đhâu chiê phường Cờ đỏ thiêz phường Thảo Nguyên, thị xã Mộc Châu lo uô cê) tưz muôx pov cov số 154 lok hâux lưv kiês nênhs tênhx qơư nhoz tuêv jênh phố Chè Đen 2. Pov cov heik mênhx, nhiv no tsôngv px sir zôngv kror đêx khơưz, taz sik têx kror đêx co puôr lênhx pov đêx njuôz xiêz, tsư nxiêz, chor đêx no zos Công ty CP nôngz nhux tso cuô mis chaz lok txix công ty li cxix luôk đêx, taz sik đêx lok zâu, lax tso tâu pur trâ têx thungz trâu đêx.

          Chiê xav tênhv tâu tênhx qơư kiês nênhs, nriêr tâu qir tiv, qơư uô kiês nênhs tênhx qơư, tsưr ziv khưx phưx, UB phường Thảo Nguyên tưz pov cov Sở kôngz nuv thiêz tênhx qơư chiê muôx tsưr ziv yưr lir.

          Hnuz xiêz 3/3, Sở kôngz nuv thiêz tênhx qơư đros UB phường Thảo Nguyên, Công ty CP nôngz nhux tso cuô mis tưz tsưr tsix đros tsôngv px thav thiêz njuôs siv đêx ntơưv thax tsav jos 4, tuêv jênh phố Chè Đen 2.

          Ntơưv jiês cơưv, zơưv Lê Tiến Quý, Tsar phongx Kinh tế hạ tầng đô thị phường Thảo Nguyên puz pâuz: Hâux lưv kiês nênhs hâur đêx ntơưv thax tsav tuêv jênh phố Chè Đen 2 thiêz tuêv jênh phố 66 tưz truz ntêr yênhx châuv shông no thiêz chính quyênx tiv phaz cux tưz pâuz tâu hâux lưv no. Taz sik, đhâu ntâu jiês qênhz yuôx, txos nhiv no tsi tâu muôx têx xav tênhv lok qênhx shênhx kiês nênhs tênhx qơư pok zos tiv Công ty CP nôngz nhux đas tso cuô mis li huôx tôngv tsiv uô, tu zus nhux. Zơưv Quý heik:

          “ Phường Thảo Nguyên thix ziv đoanx côngz xưv tỉnh nzor heik trâu tỉnh uô trơưk Chei tu zus zos txar têx qơư tsi tâu tso chei tu zus muk qơư txơưr thiêz no zos tsưr ziv lêx ntêr. Lơưr Chei tu zus, txos shông 2025, têx tiv phaz tsuv uô tiêr hâux lưv txar qơư tu zus tsi taz por muk. Taz sik, tỉnh tox siêz Sơn La tsi muôx pênhr jos, tiv zix Mộc Châu mak tu zus nhux tso cuô mis zos siv huv kôngz nuv reik đros công nghiệp thiêz coaz tsôngv đros tsôngv px luz nênhx. Viv li hâux lưv txar qơư tu zus muk cux tsi tâu tâu uô tiêr”.

          Lok saz Công ty CP nôngz nhux đas tso cuô mis Mộc Châu, zơưv Nguyễn Sỹ Quang, Phưv GĐ Công ty xar li no, qênhx shênhx kiês nênhs hâur đêx ntu đhâu zos công ty li iz phêv liv, viv no zos vênhv thix uô zênhr shar txos tsôngv px li luz nênhx, đas jos. Công ty lok six pheiz kênh đros tsôngv px thâuv ntâu shông nhoz uô nênhx đros qênhx shênhx tênhx qơư kiês nênhs no. Taz sik, hâux lưv yưr lir đêx kiês nênhs, cxuô zav kiês nênhs thâuv tưs cux tâu công ty uô lơưr cui tênhv, trơưk tsưr ziv.

          “ Pox nhuôk li têx ziv chênhv thix ziv cux trơưk qênhx shênhx tsênhv tsênhz lok tênhx qơư, tsênhz mênhx zos hâur đêx kiês nênhs. Lok saz Công ty mak uô ntêx têx shông 2020, cxix luôk yưr lir đêx kiês nênhs tsi tâu tâu jông, nhiv kruôr txâuk chiê yưr lir, taz sik đhâu co pêz cux tưz yưv pênhr muôz siêz cxix luôk tax ploz tsênhr ntơưr tso chei. Pêz cam kết hâux lưv yưr lir têx kiês nênhs hâur tu zus mak uô trơưk tsưr ziv”.

          Đhâu jiês uô hâux lưv thiêz đros tsôngv px thav zar hnuz keix xiêz 3/3, têx pưv phênhv chuyên môn nhoz sở kôngz nuv thiêz tênhx qơư tỉnh Sơn La tưz gra đêx lok njuôs siv. Zơưv Nguyễn Văn Hùng, Tsar phongx seiz car tênhx qơư, Sở kôngz nuv thiêz tênhx qơư tỉnh Sơn La- tsar đoanx côngz xưv puz pâuz, đhau chêx cuk njuôs siv têx đêx, đoanx côngz xưv zuôr pov cov trâu chiz coaz muôx vax huôv chiê muôx tsưr ziv yưr lir trơưk chêi têz qơưk li cui tênhv zos muôx têx uô cxâuv. VOV zuôr tror thôngz xor mông lok hâux lưv no trâu tsaz yênhx tov kaz./.

(VOVTB-Txâur Vax cxeik nhênhv)