Niêv ciêz ntơưv Lào Cai: Muôx txâuk trox yêz muôs, grê trox chuôz ndê siêz uô phêv liv trâu tsôngv px

***

          Đhâu jiês kho đuô grê trox yêz jê lok no, grê muôs têx zav trox hâur têz qơưk puôr lênhx chuôz ndê.

          Chor sâu xor xưv sâuv jênhv ntơưv iz cxiê qơư muôs trox sâuv thax tsav tỉnh Lào Cai tso pov, hâux lưv zuôr muôs cux fênhx yax, tsi muôx yưv qênhx shênhx muôx tsi txâuk trox chiê muôs. Taz sik, tsênhv cxơưx grê trox zuôr tror chuôz ndê.

          Ntâu lênhx nênhs xar tiêk, grê trox chuôz ndê zuôr uô trâu grê ntâu zav hax huv txơưr cux chuôz ndê, uô zênhr shar txos tsôngv px li luz nênhx. Têx yêz jix vuv, grê trox chuôz ndê cux uô zênhr shar tsênhz txos phênhv sâu. Tix lâuk Nguyễn Tuấn Anh, iz lênhx nênhs tsar yêz jix vuv ntơưv phường Yên Bái, tỉnh Lào Cai pheiz kênh:

          “ Fênhx yax thâuv grê trox chuôz ndê, zuôr muôx iz ntu chiê têz qơưk lok sik têx doanh nghiệp ntiêr thâux gra hlôngr yiêz grê thâux gra mul lok. Taz sik, hâur ntu đhâu, grê trox tưz ndê muôx nhos 60%, ndê sei li ntơưv mak pêz cux njiz phêv liv. Cur muôx iz luz yêz, chuôz zis li phênhv sâu puôr lênhx khov txos luz yêz no, viv li cur cux xar njôngr têx chiz coaz muôx txơưx jênhv muôx tsưr ziv chiê truôx tul grê trox yêz sâuv niêv ciêz, chiê têx lênhx nênhs uô vênhv teiv li pêz tso siêz uô zuk li hâux lưv”.

          Lơưr têx tsưr qơư muôs trox yêz, hax huv trox yêz sâuv thax tsav tsênhv tâu têx doanh nghiệp cungz truôx tul, tuôv zênhv tsôngv px li zoz qơưx muk lok. Taz sik, chor nênhs zuôr trox chuôz ndê lok iz cxiê ntu, tiv zix zos thâuv muôx xor mông hêik lok jiês hlôngr yiêz grê hâur têx hnuz lơưr co, phênhv ntâu zos ntơưv têx qơư muôv muôs nhoz cxix luôk Petrolimex Lào Cai.

          Zơưv Bùi Đăng Toản, Phưv GĐ Công ty TNHH MTV Petrolimex Lào Cai – taz viv muôx pưs txux tsênhv cungz trox yêz sâuv thax tsav puz pâuz, txix qênhx shênhx grê muôs trox yêz chuôz ndê siêz tsi so txơưr txar hâur ntu jê ntơưv no, công ty tưz chuv tôngv uô ntâu tsưr ziv chiê taz por muôx trox cungz trâu 69 qơư muôv muôs trox hâur taz viv, tsi chiê muôx yưv qênhx shênhx muôx tsi txâuk trox muôs:

          “ Ntu đhâu, zoz qơưx sâu zuôr trox sâuv thax tsav chuôz ndê siêz. Muôx têx ntu công ty li chor trox muôs muôx nhos 350 khối iz hnuz, chuôz ndê zuôr xar 2 jiês pir đros fênhx pheiz niêx hnuz. Hâux lưv no uô phêv liv trâu hâux lưv cungz hax huv. Chiê truôx tul niêv ciêz hâur iz ntu lur mak công ty tsênhv chuv tôngv chiê tuôv zênhv tâu. Taz sik, zos qênhx shênhx no truz ntêr, zuôr trâus muôx têx chiz coaz têz qơưk li sik côngv, thôngx cxix muôx têx qơư cungz trox sik đros cxaz chuôz chiê taz por muôx txâuk hax huv, tuôv zênhv zoz qơưx sir zôngv trox sâuv thax tsav tỉnh”.

          Tas nro tỉnh Lào Cai nhiv no muôx 223 qơư muôv muôs trox yêz. Tiv qênhx shênhx nxor loanv ntơưv Trung Đông uô zênhr shar, iz cxiê doanh nghiệp thiêz qơư cungz trox tưz txu grês hâux lưv cungz; chor hax huv cungz tsuôk tax muôx nhos 65% pir đros luz hli tov ntêx. Ntâu qơư muôv muôs cux tsi muôs trâu lênhx nênhs gra choz, thôngz tuôx zuôr trox chiê cxênhx tsês.

          Lơưr Sở công thương tỉnh Lào Cai, cxix luôk qơư muôv muôs trox sâuv thax tsav tuôv zênhv tâu tsôngv px thiêz doanh nghiệp li zoz qơưx sir zôngv. Txix niêv ciêz li qênhx shênhx, nganhx công thương tưz sik côngv đros têx lưx lươngv muôx txơưx jênhv chuôz tsar qênhz yuôx, seiz car huôx tôngv muôv muôs trox, tsi jeik khơưk tsês lok sik uô cxâuv hâux lưv muôv muôs txơưr. Zơưv Trịnh Văn Thành, Phưv GĐ Sở công thương tỉnh Lào Cai puz pâuz:

          “ Txix grê trox li têx txơưr txar ntu jê ntơưv no, Sở công thương tưz tso tơưv ntâuz ntơưr chox kriê Chi cục seiz car niêv ciêz chuôz tsar qênhz yuôx, seiz car hâux lưv muôv muôs ntơưv têx qơư muôs trox yêz sâuv thax tsav, chiê jav tâu hâux lưv tsi jông muôx yưv. Đrâuv co, Sở cux yax six seiz njôngr qênhx shênhx sâuv niêv ciêz. Thâuv muôx têx txơưr txar sở ciêr chênhr pov cov trâu UB tỉnh thiêz Bộ công thương chiê muôx tsưr ziv chox kriê têx doanh nghiệp taz por cungz trox trâu cxix luôk qơư muôv muôs trox sâuv thax tsav, tuôv zênhv tsôngv px li zoz qơưx sir zôngv”./.

(Trịnh Xuân-Txâur Vax cxeik nhênhv)

Khổng Lào- Huôv tsar uô nox thiêz cxiv tsa jêx jos yiêz nhoz ntus đriv

         Hâur shôngk shông 2022, 6 lênhx pox niêv nênhs Thái nhoz jos Huổi Loỏng, xã Khổng Lào cuiz tênhv huôv tsar uô nox trơưk tsưr ziv tsiv uô txir tsơưz kra kruôr txix ciês xiv huv chos tâu ntơưv tiv phaz. Tsi muôx pênhr nhiêx, muôx tsi ntâu chênhz zênhv, niêv ciêz sâu zuôr tsơưs... taz sik đros siêz sir jos huôv tsar uô nox, lơưr tưz truôx siêz cơưv shâuv, hlôngr yiêz tsưr ziv kỹ thuật thiêz cxiv tsa bê xiv huv trâu zuk. Xiv huv txir tsơưz kra kruôr Khổng Lào nhiv no tsi taz zos xiv huv jông hâur tỉnh mak tsênhv tâu muôs ntơưv ntâu ntênhs ciêz tox siêz, yênhx xiv huv OCOP jông, krêz tơưv tsưr ziv huôv tsar kinh têr kôngz nuv jông nhoz tiv phaz. Niêv lâuk Phạm Xênhv Vax, iz hâur têx lênhx pox niêv sik côngv huôv tsar uô nox pheiz kênh:

          “Chiê muôz siêz phênhv sâu trâu têx hluôk nênhs cux xưk li muôz siêz tiêu chí phênhv sâu hâur tsaz yênhx nôngx cxênhz nyiêz mak cur cux xưk li têx fôngx zưs sik đros tsiv uô, heik kriê xiv huv kôngz nuv tiv phaz”.

          Tsi taz muôx hâux lưv uô, muôx phênhv sâu siêz, chor pox niêv nênhs Thái no li trâur nuv tsênhv krêz tơưv chinhz yênhx huôv tsar uô nox hâur côngv thôngx, tiv zix zos pox niêv thiêz hluôk nênhs hâur thax tsav ntus đriv. Têx lớp kriê cơưv cxaz lok muôv muôs điện tử, pênhr xưv krêz đar niêv ciêz tưz paz tsôngv box truôx siêz đuô thâuv chox xiv huv tiv phaz lok hâur chor hax huv muôx tsiv grê.

          Đros trâu huôv tsar kinh têr, Khổng Lào tsênhv tsov cưv cxiv tsa tênhx qơư nhoz uô nênhx hur jông. Nhoz Chi hội pox niêv jos Lang 2, đros 230 lênhx hội viên, phongz yaox tuôr jông vêv xênhz tênhx qơư, cêr muk lok hâur jêx jos tưz yênhx cêr uô nênhx jông hâur niêx hnuz. Niêv lâuk Pờ Thị Thao, Chi hội trưởng Chi hội pox niêv jos Lang 2 puz pâuz:

          “Cur thiêz ban seiz car cux tưz khiêz phêv jêx jos yax mông txos tsôngv box. Pir li tênhx qơư mak pêz cux tưz tôngv vênhx hội viên pox niêv hâur yênhx hli qêz suô cêr hur đu, iz ciêz iz jiês lok sik oz ciêz iz jiês. Yax mông por vêv phongz qơưx mak cux yax mông txos tsôngv box ntâu đuô thiêz”.

          Txix hnuz xiêz 1/7/2025, xã Khổng Lào tâu hlôngr yiêz thâuv sik côngv tas nro xã Hoang Thèn, Bản Lang thiêz Khổng Lào lok uô cê. Tas nro xã muôx 32 jêx jos, 3 cxênhz 400 ntâu ziv chuôz zis, zuôr xar 17 cxênhz lênhx nênhs, phênhv ntâu zos tsôngv box Thái, Cho, Hmôngz thiêz choz tsiz sik đros nhoz uô nênhx. Đại hội Đảng bộ xã jiês tiv 1 nhiv kruôr đhâu tưz xav tênhv tsưr ziv txix nhiv no txos shông 2030 chox tiv phaz yênhx xã uô tiêr hâux lưv cxiv tsa jêx jos yiêz thax tsav ntus đriv.

          Txos nhiv no, xã tưz tax tâu 16/19 luôs hâux lưv cxiv tsa jêx jos yiêz, tiv zix zos zaoz thôngz, đêx liv, y tế, tsêr cơưv ntơưr, tsôngv box li phênhv sâu. Ntâu cêr muk lok hâur jos tâu cxiv uô bê tông; cxix luôk đêx liv taz por muôx đêx zưs chiê tsêz chos; tsêr cơưv, trạm y tế uô tâu huv đros; phênhv sâu fênhx pheiz lênhx nênhs tax tâu 42 tsov đeiv ntâu iz shông. Chor ziv chuôz zis pluôk txu grês ntâu, jêx jos hlôngr yiêz tsênhv tsênhz.

          Zơưv Đỗ Văn Quynh, Chủ tịch UB xã Khổng Lào, tỉnh Lai Châu puz pâuz:

          “Ntu zuôr txos, pêz zuôr chêx chôngk têx tsưr ziv chiê yax mông tsôngv px cxaz chuôz phongz yaox sik côngv tês cxiv tsa jêx jos yiêz muôz siêz. Cxơưz cxiz huôv tsar tsiv uô kôngz nuv hax huv, zôngv KHKT yiêz uô têx trâur nuv uô nox tập thêv, ziv chuôz zis huôv tsar uô nox, reik đros cxiv tsa bê xiv huv jông nhoz tiv phaz”.

          Txix têx lênhx pox niêv nênhs Thái nhoz jos Huổi Loỏng li hâux lưv huôv tsar uô nox, txos hâux lưv sik côngv đas jos cxiv tsa jêx jos yiêz, xã Khổng Lào, tỉnh Lai Châu ziv hnuz ziv hlôngr yiêz jông txix ciês têx sir jos huôv tsar hâur côngv thôngx./.

(Khắc Kiên-Txâur Vax cxeik nhênhv)