Chos mắc ca shơư yuôx zêx – vav tok tsưr ziv uô nox yiêz nhoz chor nông trường ntơưv Lào Cai

Oz pêz châuv shông đhâu, 500 ntâu héc ta yuôx zêx tưz zos yênhx pêx xênhv nhoz thị trấn Nông trường Liên Sơn, huyện Văn Chấn, tỉnh Yên Bái (kuz), nhiv no zos xar Liên Sơn, tỉnh Lào Cai li phênhv sâu chênhr. Taz sik, tiv muôx tsik txâuk chor tsêr mêir uô ciês ntơưv qơư đhâu thâuv Tsêr mêir yuôx zêx Liên Sơn cơư kror trôngx tsês, pox nhuôs tsuv muôs chor yuôx zêx trâu chor nênhs zuôr đros gri tsik truôx tuk, uô trâu uô nox njiz ntâu phiv liv đuô. Đros qênhx shênhx co, tsưr ziv chos chor mắc ca shơư trâu chor yuôx zêx tưz tâu muôz lok chos siv đros muôx ntâu kror vav tok njôngr.

Trơưk zơưv Trần Quang Chất, Tsar jok 1, xar Liên Sơn, thax tsav qơư tưz muôx 33 héc ta ntâu mắc ca chos shơư chor yuôx zêx, tsav xar muôx 50% thax tsav mắc ca tas nro xar. Chor mắc ca lok six huv đros đêx ar ntơưv no, viv chưx tâu kruôr, tsơưs trâus caz hmoz ruôr hiêv, tas tsơưs côngz đas jos tu thiêz tiv zix zos tsik uô phiv liv txos chor yuôx zêx. Chos siz shơư li no paz muôx tâu chor mắc ca paz nzôngr trâu chor yuôx zêx thâuv muôx yar ntux cuz sor trâu zar hnuz kêix, por hưv chor blôngx yuôx zêx tsik tuôs, đros co cux paz muôx nzôngr nzông trâu pox nhuôs đêx yuôx zêx: “Chor mắc ca nhiv no tsênhv hloz lox jông thiêz têx jâuv zuôr paz muôx tâu kinh têr siêz. Chênhr viv li pêx xênhv lok six vav tiêk cơ quan muôx vax huôv zuôr muôx tsưr ziv sâu zuôr chor txir ntông no, chiê thâuv pox nhuôs chos tâu tsik cxơưx txos qơư muôs”.

Pos Lê Thị Chuất, nhoz đros hâur jok 1, xar Liên Sơn puz pâuz, kuôk no 4 shông, thâuv chuôz zis muôz tsoz mắc ca lok chos hâur têx têz yuôx zêx, chôngz lênhx nênhs tưz tsik thôngx ziv đros. Lơưr nyêi tsav tsoz mắc ca zuôr uô phiv liv txos sâu đêx chor yuôx zêx. Tiv tưz nriêr pâuz txos chor mắc ca nhoz ntâu qơư chos, pos Chuất tưz chos xar muôx 200 tsoz. Thâuv co iz tsoz zuz tâu huyện Văn Chấn, tỉnh Yên Bái kuz paz 50.000 đêiv, hok pox nhuôs mak thêv 25.000 đêiv. Trơưk pos Chuất, txos nhiv no, thâuv 90% thax tsav chos mắc ca tưz piz tơưs pax, txi txir, yênhx châuv ziv chuôz zis tưz sik đros chos zav tsoz chos no. Đros gri muôs chor txir nhôngk txix 20.000-40.000 đêiv iz cir, sâu txix chor mắc ca tâu ntâu đuô pir li chor yuôx zêx cxôngx nzor: “Iz shông sâu chor yuôx zêx tâu 20 triệu đêiv, chor mắc ca nhiv no gri kik tiv zix zos 20.000 đêiv iz cir mak 1 tấn cux sau tâu 20 triệu đêiv lơưv, ntu zuôr txos sâu tâu nâtu tấn đuô mak tsênhv zuôr sâu tâu siêz đuô thiêz”.

Pos Trương Thị Hương Giang, Trưởng phòng Kinh têr xar Liên Sơn, tỉnh Lào cai puz pâuz, zuôr xar 70 héc ta mắc ca chos shơư chor yuôx zêx hâur tas nro xar nhiv no tsênhv piz sâu tâu chor chiv xuz thơưx. Xar tưz tsik zos cxơưz cxiz pox nhuôs chos, mak tsênhv kriê tsưr zuv tu trơưk ploz tsênhr chiê paz tâu jông tsơưr lươngv trâu chor hax huv:

“Pêz xav jênhv tsoz yuôx zêx thiêz tsoz mắc ca tror zos chor tsoz chos chênhr ntơưv thax tsav qơư. Đros chor yuôx zêx, pêz sir jos uô lơưr yuôx zêx hur, uô lơưr tsưr ziv VietGAP chiê paz gra siêz tsơưr lươngv, tsiv gri hax huv. Đros tsoz mắc ca, nhiv no tsênhv huôv tsar jông, tơưv pax ntâu, njuôk xav têx shông zuôr txos zuôr sâu tâu truôx tuk đuô”.

Tsưr ziv uô ntu zuôr txos, zơưv Vũ Đức Trung, Bí thư Đảng ủy xar Liên Sơn puz pâuz, xar zuôr tror sir jos zaz zâuv yưv pênhr, hêik chor doanh nghiệp cxiv tsa tsêr mêir uô ciês ntơưv xar chiê paz gri siêz tsiv gri têx hax huv. Thiêz sir jos chos chor mắc ca shơư trâu chor trôngz yuôx zêx, paz muôx tâu têx qơư jông jav chiê uô yênhx têx qơưk du lịch đrox tsuôs chiv xênhz hâur ntu zuôr txos: “Huôv tsar chor trôngz yuôx zêx yênhx têx qơư du lịch mak zuôr tsuv uô cov muôx tâu têx qơưk jông trâu sâuv chor trôngz yuôx zêx chiê chor kruô du lịch muk ndis sêiz, uô si”.

Txơưv nhiv kruôr piz sâu tâu chor chiv txir xuz thơưx, tsik tâu muôx hêik pâuz tsênhz, taz sik tsưr ziv chos mắc cac shơư chor yuôx zêx ntơưv xar Liên Sơn, tỉnh Lào Cai tsênhv zuôr paz muôx ntâu kror jông đuô. No zuôr zos kror paz tâu jông trâu huôv tsar kinh têr kôngz nuv sâuv têx nông trường yuôx zêx kuz, paz muôx nzir phênhv sâu siêz đuô trâu pêx xênhv./.

Đinh Tuấn-Lik Thox cxêik nhênhv