Đaiv hôiv Đảng tas nro têz qơưk jiês tiv XIV: Qênhx shênhx thiêz tsiv gri lịch sử Đaiv hôiv XIV-Ntâuk chiv lịch sử mênhx cxưx ntu hlôngr yiêz thiêz huôv tsar

Đaiv hôiv Đảng tas nro têz qơưk jiês tiv XIV tâu cơưv hâur 7 hnuz, txix hnuz 19/1/2026 txos hnuz 25/1/2026 ntơưv thủ đô Hà Nội, muôx 1.586 lênhx Đại biểu, hlôngr njêx muôs trâu 5 triệu ntâu lênhx Đảng viên hâur tas nro têz qơưk đros cơưv…

Đaiv hôiv đại biểu Đảng tas nro têz qơưk jiês tiv XIV (Điv hôiv XIV) zos Đảng, Têz qơưk thiêz Pêx xênhv Việt Nam li xor xưv chinhr triv zov chênhr. Đaiv hôiv XIV tâu cơưv hâur ntu ntiêx têz, thax tsav tsênhv hlôngr yiêz sêi, txơưr txar phiv liv, lax njuôk xav; Têz qơưk đhâu 40 shông hlôngr yiêz, cxuô kror, đas jos, qơư sơưr sâuv ntiêx têz tưz ndê trâu iz thênhv yiêz.

Đros tsênhv njiêz: Sik côngv siêz - Dân chủ - Kỷ cương - Hlôngr yiez - Huôv tsar, Đaiv hôiv XIV xav jênhv tsưr ziv, têx tsênhv chêi yiêz paz trâu têz qơưk hla tâu jông trâu ntu hlôngr yiêz thiêz huôv tsar, uô tau jông chor luôs hâux lưv, tsưr ziv huôv tsar têz qơưk txos shông 2030 thâuv Đảng txưv 100 shông yênhx lix (1930-2030); tsưr ziv uô txos shông 2045, chiv nhênhv 100 shông yênhx lix têz qơưk Cộng hòa xar hôiv chủ nghĩa Việt Nam (1945-2045).

Hâur xar muôx 100 shông lênhx tov cách mạng, Đảng Cộng sản Việt Nam tưz hla đhâu 13 jiês Đaiv hôiv, iz jiês Đaiv hôiv puôr lênhx zos têx kror ntâuk chiv zov chênhr, paz trâu têz qơưk hla đhâu têx phiv liv, xar tơưv, uô tâu jông ntâu kror hâux lưv lox. Đaiv hôiv XIV tror uô chax chês co, hâur qênhx shênhx ntiêx têz thiêz thax tsav muôx ntâu txơưr txar phiv liv, sêi thiêz lax pâuz tâu; Côngz xưv Cách mạng công nghiệp jiês tiv plâuz huôv tsar hênhr; têx kror ruôr hiêv txos ngaz tuk tsar ndê. Đros co, Việt Nam tsênhv uô jông têx kror liv txix hôiv nhập ntiêx têz, têz qơưk qơư sơưr ziv hnuz ziv tsar ndê siêz đuô.

Đaiv hôiv XIV muôx tsiv gri zov chênhr thâuv tổng kết 40 shông hlôngr yiêz, khav tênhv Đảng li tsưr ziv hlôngr yiêz huv zos, xar tơưv, huv đros  tsênhv tsênhz ntơưv Việt Nam thiêz têx tsưr ziv huôv tsar hâur ntu nhiv no thiêz ntu yiêz. No zos jiês chiê tas nro Đảng, tas nro pêx xênhv, tas nro quân phuôx huiz chax chês nhiêv têz qơưk cách mạng, sik côngv siêz, thôngx ziv, sir jos uô tâu jông têx jênhv vưv huôv tsar kinh têr-xar hôiv, cxiv tsa Đảng hur jông, hênhr, paz trâu têz qơưk hla trâu ntu hlôngr yiêz thiêz huôv tsar: Hênhr đuô, huôv vav, vav mênhx, shir phaz, truôx đrênhk hla trâu chủ nghĩa xar hôiv.

 Đaiv hôiv Đảng XIV jiês no tâu cơưv hâur qênhx shênhx ntiêx têz thiêz thax tsav muôx ntâu txơưr txar, phiv liv, đros muôx têx kror liv thiêz têx phiv liv, tso pov Đảng tsuv sir jos lênhx tov, chox car têz qơưk. Vav tiêk Đaiv hôiv zuôr tror khav tênhv thiêz sir jos uô tsênhz mênhx đuô têx tsưr ziv huôv tsar têz qơưk, txix tổng kết tsênhv tsênhz cov ndax jông, khoa học. Hâur ntu huôv tsar yiêz, têx tsuv uô tưz tsik zos tsar ndê kinh têr xưz, mak tsênhv zos gra siêz tsơưr lươngv huôv tsar, paz uô tâu jông hlôngr yiêz thiêz siz bâus xar hôiv, uô truôx jông vênhx huôv, lênhx nênhs thiêz truôx đrênhk muk ntêr./.

                                                                                                                Lường Huyền-Lik Thox cxêik nhênhv

Đảng viv tsôngv pêx xênhv, pêx xênhv muôz cêr njênhs njôngr trâu Đảng

Niêv lâul Lò Thị Lả, heir nênhs Poz Ziz nhoz jok Nà Giòn, xã ntus đriv Chiềng Khoong, tỉnh Sơn La shir phaz lus thâuv tâu đros tus tuz tu, njêik yêv têx đra, chuôz zênhx muk nhoz trâu tsêr yiêz. Niêv lâuk Lả tus txir tsi zuôr chor niêv tuz, tưz tso lơưr tsês thâuv mê nhuôv nhiv kruôr muôx iz hlik, niêv lâul iz lênhs sir jos khưr thiêz tu, txoz cxơưx trâu mê nhuôv luz nênhx, cơưv ntâuz ntơưr, chuôz zis phênhv sâu tâu zos tok njôngr trâu têx kôngz hâur liêx têz, viv li tưz xar tsi txos zuôr muôx vax tsêr truôx khor li luôs lưv tus nhoz. Fuô uô tsaz yênhx paz uô tsêr nhoz trâu têx chuôz zis pluôs, chuôz zis txov nhêv, nênhs muôx côngz têz qơưk trơưk Đảng tsưr ziv, hâur xã, hâur jok đros trâu chor nênhs siêz jông tưz siz chos paz uô tâu iz luz tsêr truôx khor trâu niêv lâul 2 niêv tuz nhoz:“Uô tsâus ntâu txos Đảng, têz qơưk têx cêr paz, nhiv no thâuv muôx ntux yar ntux nas cur 2 niêv tuz tsi trâus cxơưx lơưv, tso siêz huôv tsar uô nox uô hnar”.

Tâu yêik muk nhoz trâu tsêr yiêz hâur têx hnuz tsưr tsix Đảng Đại hội tas nro têz qơưk jiês tiv 14, tix lâus Zis Xênhv Vax, heir nênhs Hmôngz, ziv chuôz zis pluôs nhoz jok Nà Kham, xã Chiềng Khoong tưz ndo njôngr đei qix têz qơưk ciês ntơưv tsêr hơưv Đại hội Đảng tas nro têz qơưk. Đros thiêz tix lâus, tsôngv niêv txir lax pêx xênhv Hmôngz nhoz jok Nà Kham, Đảng chox cêr, gra luz nênhx tsâu sor trâu pêx xênhv. Khov muôx Đảng moz siêz txos, cấp ủy, hâu nov ntơưv qơư muôz jông six hơưv thiêz thiêz côngv thôngx sơưr đơưk sik đros paz, tix lâus chuôz zis tưz muôx tsêr truôx khor nhoz chiê tok nox tsiêz 30. Tix lâus Zis Xênhv Vax heik:“Thâuv ntêx niêv thiêz txir cux pluôs, tsi muôx ntâu ar liêx têz viv li luz nênhx txov nhêv cơưk. Nhiv no cur 2 niêv txir tâu siz sơưk lok uô txix gơưv, muôx Đảng, têz qơưk paz uô tsêr truôx khor trâu pêz nhoz, ưz 2 niêv txir uô tsâus ntâu txos Đảng, têz qơưk têx cêr paz. Hâur ntu zuôr txos, cur chuôz zis zuôr sir jos huôv tsar uô nox chiê luz nênhx iz hnuz tsâu sor, vav mênhx jux juk”.

Xã Chiềng Khoong muôx 50 luz jok, phênhv ntâu zos tsôngv box Poz Ziz, Hmôngz nhoz uô nênhx. Txos nhiv no, tas nro xã tsênhv yuôr 400 ntâu chuôz zis pluôs, bâuv nhos 9% ntâu. Zơưv Lò Văn Thân, Bí thư Đảng ủy xã Chiềng Khoong heik pâuz, zos xã ntus đriv txov nhêv, thâuv ntêx phênhv ntâu tsôngv pêx xênhv uô nênhx nhoz hâur têx luz tsêr đaz tuôs, kâus kêz jik. Taz sik, Đảng, têz qơưk moz siêz fuô uô tsaz yênhx paz uô tsêr nhoz trâu têx chuôz zis pluôs, chuôz zis txov nhêv đros thiêz tsưr ziv “Tsi chiê lênhx pêx xênhv tưs trâus pôngz kaz”, viv li chor chuôz zis txov nhêv li heik sâuv tưz txo grêk tsơưs lok six ntâu.

Đhâu qênhz shuôs hâur shông 2025, tas nro xã muôx 88 chuôz zis zuôr tâu paz uô tsêr nhoz. Hâur têx chuôz zis co, muôx 32 ziv tâu sơưv têz qơưk chei paz uô tsêr nhoz; yuôr đuô li mak tsi tâu sơưv, xã tưz muôx luk hu lơưk cxuô tsưr tsix đoanx thêv, chor nênhs siêz jông sik côngv têk paz chiê 100% chuôz zis txov nhêv hâur thax tsav puôr lênhx muôx vax tsar truôx khor nhoz, tso siêz huôv tsar uô nox uô hâuk:“Tsaz yênhx paz uô tsêr nhoz têx chuôz zis pluôs, chuôz zis txov nhêv, nênhs muôx côngz têz qơưk zos hâux lưv uô muôx liv, paz cxơưz tsôngv pêx xênhv muôx luz nênhx tsâu sor, truôx tuk. Chênhr viv li, têx chuôz zis tâu paz uô tsêr nhoz thiêz tsôngv pêx xênhv cxuô heir nênhs zuôr tso siêz, njênhs njôngr trâu Đảng thiêz têz qơưk tsưr ziv chox kriê, sik đros paz tsưx phưv, cxiv tsa thax tsav, têz qơưk ziv hnuz ziv huôv tsar, vav mênhx”.

Tsôngv box cxuô heir nênhs Chiềng Khoong-Sơn La heik taz, chor tỉnh thax tsav Tây Bắc heik cxuô đros tsôngv pêx xênhv hâur tas nro têz qơưk chiê siêz, njênhs njôngr trâu Đảng tsưr ziv chox car, vav tiêk Đại hội zuôr muôx têx chei jông, tror cxơưz paz cxuô thax tsav qơư huôv tsar hâur ntu têz qơưk hlôngr yiêz./.

                                                                                                            Thu Thùy-Riê Lâux cxeik, nhênhv