Yên Bái huôv tsar ntông nox txir tsơưr lươngv siêz

Pos Trần Thị Dung nhoz jok 4, xar Nghĩa Lộ, thị xar Nghĩa Lộ, tỉnh Yên Bái ziv chuôz zis chos ntông nox txir tâu muôx 10 ntâu shông. Grê muôs ndê grêk tưz sưv đros pos ziv chuôz zis. Taz sik, lơưr pos Dung, thâuv chor txir ntông txi ntâu cux zuôr muôs sâu tâu ntâu đuô pir li thâuv txir ntông muôs tsik tâu grê siêz. Pir li shông no, txơưv tiêk txir lưv tsiz sôngz txo grêk tus grê iz đraz, kik tiv zix hâur 10 shông đhâu, taz sik chor txir no ho sâu tâu ntâu đuô pir li shông uô ntêx, viv li phênhv sâu cux tsuôk txo grêk tsơưs txix 15 txos 20% pir li tsêiz no:“Muôx ar têz ntâu viv li cur chuôz zis chos ntâu zav ntông nox txir. Chos mak tsuv chos ntâu cov sâu tâu ntâu tsik zos chos iz oz tsoz xưz, hêik cxuô mak phênhv sâu cux truôx tuk”.

Iz chas chos ntâu, sâu đê tâu txir ntâu chiê pâux nzir trâu thâuv grê txo grêk kik chos têx zav zuz nôngz yiêz cux li sir zôngv khoa học kỹ thuật chos, tsoz phưz ntông nox txir cux tâu ntâu chuôz zis sir jos kriz uô, chiê paz muôx tâu zav ntông nox txir muôx tsơưr lươngv siêz, txir jông gâux, muôs tau grê siêz. Zơưv Nhiêx Cuôv Xênhv Thox, nhoz jok Hua Khắt, xar Nậm Khắt, huyện Mù Cang Chải zos iz hâur chor ziv chuôz zis uô ntêx hlo chos chor txir hồng FUJI. Tiv uô jông lơưr tsưr ziv kriê, xêir tsov têx zav tsoz chos huv đros qiv hơưv, viv li 1 héc ta ntâu txir hồng FUJI tưz txi txir đros sâu tâu ntâu, tsơưr lươngv siêz, tâu chôngz nênhs nhiêv zuôr:“Txix shông tiv 3 chor txir hồng tưz txi txir. Iz tsoz sâu tâu muôx 40-50 cir, 5-6 luz txir mak muôx iz cir lơưv. Txir lox, nox mak kaz jiz, shông no gri muôs chor txir hồng cux truôx tuk viv li ziv chuôz zis sâu tâu xar muôx 100 triệu đêiv”.

Cxuô thax tsav qơư tsênhv sir jos nhênhz chơưv, muôz têx zuz nôngz yiêz, kỹ thuật yiêz lok chos, uô siv, zos jông mak zuôr kriz uô đêz đar. Zơưv Lê Trọng Khang, Chủ tịch Ủy ban huyện Mù Cang Chải puz pâuz: “Khov sir zôngv khoa học kỹ thuật mak huyện cux sir jos hlôngr yiêz đuô chor tsoz chos, tsênhv tsênhz zos xêir tsov iz cxiê zav tsoz chos huv đros trâu đêx ar, qiv hơưv li: txir lê, txir hồng gis, jâuz hur thiêz iz cxiê zav txơưr đuô”.

Cxuô thax tsav qơư ntơưv Yên Bái tsênhv sir jos hlôngr yiêz đuô nganhx kôngz nuv trâu uô têx hax huv tsơưr lươngv siêz, cov huv đros trâu siêz nhiêx sâuv ciêz đrôngs. Huôv tsar thax tsav uô hax huv tsêx trung đros trâu huôv tsar chor hax huv kaz, hữu cơ, OCOP… Zơưv Vũ Đức Trung, Phưv Chủ tịch Ủy ban thị xar Nghĩa Lộ puz pâuz:“Pêz tưz chox kriê sir jos chos têx zav tsoz chos jông đuô. Pêz cux xêir tsov, cxơưz cxiz chos têx zav zuz nôngz siêr nzor lok sik siêr lis, txix co paz gra siêz đuô phênhv sâu txix têx ntông nox txir no”.

Tỉnh Yên Bái li tsưr ziv zos chos thiêz huôv tsar truôx tuk 10 cxênhz ntâu héc ta ntông nox txir, paz sâu tâu muôx 55.000 tấn, tsiv gri xar muôx 500 tiv đêiv iz shông./.

Đinh Tuấn-Lik Thox cxêik nhênhv