Hâux lưv cxuôv tsêr lav uô lav nhoz trâu nênhs pluôk nhoz Yên Bái

          Tix lâuk Trịnh Văn Hiến, xênhz shông 1985, nhoz jos 2, xã Nghĩa Lộ, thị xã Nghĩa Lộ, tỉnh Yên Bái zênhx zos iz lênhx nênhs txơưx cơư ntông thiêz tix lâuk li phênhv sâu cxơưx trâu tas nro 4 lênhx nênhs hâur chuôz zis. Môngr tsi jông hâur ntu uô hâux lưv, tix lâuk trâus txiêz nanv lox tôngv uô đas jos trâus txu grês ntâu. Viv li, cxuô luôk hâux lưv xar uô tsuôk tso tsês ntơưv co, hâur co muôx hâux lưv civ uô đuô tsêr nhoz yiêz chiê their ntux yar ntux nas.

          Txix đề án uô tsêr paz trâu têx ziv chuôz zis pluôk ntu 2023-2025, đraz shông no, tix lâuk chuôz zis jênhv tâu têz qơưk li 50 tsov đeiv paz uô tsêr nhoz; côngv đros têx tsưr tsix, đoanx thêv, nênhs cxênhz jê, tix lâuk 2 niêv txir txeik cxaz thiêz tưz cxiv uô tâu tsêr nhoz truôx jông đar zuôr xar 100 yiv ndis, muôx 3 qar pư, 1 qar thiêz iz qar uô jâuz mor. Tix lâuk Hiến shir phaz heik:

          “Têz qơưk thiêz têx tập thêv tưz paz cur uô tâu luz tsêr sor đuô, cur lok six shir phaz. Cur oz niêv txir zuôr sir jos chiê nzor hla đhâu luz nênhx yeiz pluôk”.

          Niêv lâuk Vũ Thị Liên nhoz jos 1, xã Nghĩa Lộ, thị xã Nghĩa Lộ cux zos ziv chuôz zis pluôk txov nhêv lok tsêr nhoz. Thâuv oz niêv txir siz đrâux, tsi muôx hâux lưv uô truôx tul, iz lênhx tu 2 tul mê nhuôk tsênhv zâu muk cơưv ntơưr, viv li 3 niêv tuz tsuv nhoz uô nênhx hâur luz tsêr fênhz jaz fênhz juôr viv tsi muôx nhiêx uô tsêr yiêz.

          Txix đề án paz uô tsêr nhoz trâu ziv chuôz zis pluôk, nhiv no, niêv lâuk 3 niêv tuz cux tưz muôx tâu luz tsêr truôx jông nhoz hlôngr trâu luz tsêr kuz. Niêv lâuk Liên pheiz kênh:

          “Muôx tâu luz tsêr yiêz cur lok six shir phaz, cur 2 tul mê nhuôk cux shir phaz hênhr. Nhoz luz tsêr kuz thâuv ntêx cheix ntux lok nas mak lok six nyei. Đros luz tsêr nhoz yiêz, thâuv hmo ntux ntux lok nas cur tsi tsuv sơưr chiê seiz shuôk thiêz đhiê muk đhiê lok seiz cxuô qơư thiêz, thâuv ntux lok nas lox cur chor mê nhuôk cux tsi nyei thiêz”.

          Xav txos tas hli 10, tas nro 85 luz tsêr uô lơưr Đề án paz txưv uô tsêr nhoz trâu ziv chuôz zis pluôk sâuv thax tsav thị xã Nghĩa Lộ hâur shông no tưz uô tier, tax 100% tsưr ziv tso tơưv. Hâur co, muôx 79 luz tsêr nhoz Tsaz yênhx têz qơưk li qơư tsov txos lok huôv tsar KTXH thax tsav tsôngv box mênhx cxưx tsơưs nênhs thiêz tox siêz, 6 luz tsêr txix pênhr paz xã hội. Iz luz đar 80 yiv ndis, taz por 3 truôx, tas nro pênhr nhiêx cxiv uô zos 4 tỷ đeiv.

          Zơưv Lương Mạnh Hà, Phưv Chủ tịch UB thị xã Nghĩa Lộ, tỉnh Yên Bái puz pâuz, chiê taz por six hơưv tsưr ziv cxiv uô thiêz cxiv uô tsêr nhoz huv đros tsôngv box li zoz qơưx tsênhv tsênhz, têx tiv phaz thiêz nganhx muôx txơưx jênhv tưz seiz shuôk tsênhv tsênhz ntơưv yênhx ziv chuôz zis thiêz uô têx luz tsêr huv đros ntơưv qơư, huv đros tsôngv box li phongz qơưx. ĐRos co zos seiz car jông tsưr ziv, six hơưv uô chiê taz por truôx vênhs.

          “Iz hâur têx tsưr ziv uô muôx chêx cuk mak thị xã tưz krêz uô zos huiz tôngv pênhr jos paz txưv. Đrâuv nhiêx txiêx gôngr paz txix têz qơưk, côngv thôngx, tiv phaz tưz cxơưz ties vênhv tôngv xênhv nênhs, chuôz zis li gôngr côngv, têx lưx lươngv công an, quân đội thiêz đoanx thêv paz hnuz côngz. Thôngx cxix, phuôx huiz pưs txux têx lênhx txir ndâux txir luk hâur tsôngv box mênhx cxưx chiê paz yax mông, vênhv thongv, huiz tôngv têx tsưr tsix, lênhx nênhs siêz jông sik côngv tês paz txix ntâu tsưr ziv”.

          Ntu 2023-2025, tỉnh Yên Bái tso tơưv tsưr ziv uô 3 cxênhz 22 luz tsêr trâu têx ziv chuôz zis pluôk, đros tas nro nhiêx txiêx paz zos 150 tỷ đeiv (tsi tâu heik txos pênhr txix têx chuôz zis thiêz côngv thôngx sđ). Đros tas nro cxix luôk chính trị, tsôngv box, doanh nghiệp li sik côngv…txos nhiv no, ntâu tiv phaz tưz uô tiêr tsưr ziv thiêz tas nro tỉnh cux zuôr uô tiêr 100% tsưr ziv cxuôv tsêr lav uô lav nhoz tas nro ntu hâur shông no./.

(Trịnh Xuân-Txâur Vax cxeik nhênhv)