Canr bôv Lào Cai xar li chas thiêz cxơưx li chas

thâuv yêik lol Yên Bái

Jông siêz, thôngx ziv muôz 02 tỉnh lok uô cê chiê muôx qơư lox đar huôv tsar kinh tế, taz sik lok sâuv chuôz zis, niêv lâul Trần Thị Huyền Trang, uô hâux lưv hâur Văn phongx Hội Luật gia tỉnh Lào Cai cux tsênhv yuôr ntâu kror tsuv tuôr xav. Iz zos viv niêv lâul tus txir uô công ty saz têz qơưk đrâuv, iz shông tsuôk lok tsêr 2-3 ciêz xưz, niêv lâul iz lênhs tsuv txoz cxơưx tas nro têx hâux lưv uz no hâur vax tsêr. Hâur ntu zuôr txos, yêik lol uô hâux lưv trâu tsênhv qơư hành chính yiêz ntơưv Yên Bái, iz lênhs 02 qơư nhoz zuôr uô li chas muk lol, iz chas co qơư nox nhoz, qơư trâu chor nhuôs cơưv ntơưr cux tsi pov kaz uô chas hlo:“Zos yêik muk trâu iz thax tsav qơư tưs, trơưk cui tinhv tsuv muôx ntâuz ntơưr, qơư nhoz tax hâur thax tsav, thâuv co pok muôx txâuk ntâuz ntơưr trâu chor nhuôs muk cơưv txux chi? Hok đros thiêz têx chuôz zis muôx mê nhuôv hlôngr qơư cơưv, phênhv ntâu zuôr tsuv thik. Zos yêik lok trâu tsênhv qơư hành chính yiêz, chor tuz nhuôs zuôr nộp ntâuz ntơưr cơưv trâu kror tưs thiêz muk tưr thik li chas, co cux iz cêr cxơưx”.

Trơưk li tix lâus Phạm Lý Vượng, uô hâux lưv hâur Viện kiến trúc njuôk hov cxiv tsa tỉnh Lào Cai, tiv tsưr ziv muôz 02 tỉnh lok uô cê xuz thơưx tsuôk heik tsênhv qơư hành chính yiêz zos nhoz ntơưv tỉnh Yên Bái, tsi tâu heik tsênhz mênhx thax tsav qơư tưs, viv li chiê chor nênhs zuôr trâus tâu yêik txar qơư uô hâux lưv quyết định đros chuôz zis muôx qơư nhoz truôx cux zos iz kro phiv liv, xav tsi tâu. Xuz thơưx, thâuv iz cxiê lênhx canr bôv tsuv yêik lok uô hâux lưv trâu ntơưv TP Yên Bái, tsuv muôx chei tsênhv tsênhz chiê paz truôx tuk qơư nhoz, tso siêz uô hâux lưv:“Pêz cux tưz muk qênhz shuôs tsênhv tsênhz thiêz seiz têx qơư nhoz đrav Yên Bái, phênhv ntâu puôr lênhx txix shông 1990 lok thiêz txos nhiv no 2, 3 qơư uô hâux lưv tưz trâus puôk tsuôx, tsi yuô jông nhoz uô hâux lưv lơưv. Hok têx qơư uô hâux lưv ntơưv Lào Cai nhiv no tưz cxiv kho, uô đuô tâu lok six jông, viv li cux xar cov pêz sir jos hlôngr yiêz, muôx têx sir zôngv hur si 2 qơư uô hâux lưv chiê tsi uô tuôr xuôv nhiêx txiêx têz qơưk”.

Chiê muôz jông six hơưv trâu canr bôv yêik lok uô hâux lưv trâu qơư yiêz, cxuô ngênhx muôx vax huôv hâur Lào Cai tưz bax qênhz shuôs yênhx lênhx nênhs trơưk li tsưr ziv, siêz xar, vax tsêr, luz nênhx; qênhz shuôs zoz qơưx thiêz tuôr xav lok sâuv yêz buýt muk lol đhâu tỉnh Lào Cai-Yên Bái..... Thường trực Tỉnh ủy Lào Cai cux tưz thôngx ziv tsưr ziv paz trâu canr bôv yêik qơư uô hâux lưv chiê HĐND seiz shuôs, quyết nghị.

Ủy ban tỉnh Lào Cai nhiv kruôr đhâu cux tưz muôx ntâuz ntơưr heik hâu nov tỉnh Yên Bái moz siêz, đros paz chiê yêik 3 jiês 2 cxênhz ntâu lênhx canr bôv lok Yên Bái uô hâux lưv. Hâur co, heik mênhx txos têx tsênhv tsênhz li: Qơư nhoz trâu chor canr bôv; lok sik hlôngr muôz nhiêx paz canr bôv, chuôz zis ntiêr tsêr nhoz; lênhk txeik chor nhuôs shux xênhz zos canr bôv, công chức, viên chức, nênhs lox tôngv têx tuz nhuôs muk cơưv trâu chor tsêr cơưv huv đros. Zơưv Trần huy Tuấn, Bí thư Tỉnh ủy Yên Bái heik pâuz:“Xuz thơưx, nzaz nzơưv têx qơư muôx nhiv no đros trâu cxiv kho đuô iz cxiê qơư cov truôx khor, jông uô hâux lưv. Pêz muôx têx phênhz qơư nhoz hâur têx tsêr cơưv, thâuv ntêx zos tsêr cơưv cao đẳng, lok sik têx tsênhv qơư cơưv shâuv txux chi uz no.... Cur cux tưz choz hâux lưv, cov phênhz uô têx qơư nhoz li: Nhoz iz lênhs, nhoz 2 lênhs thiêz muôx têx qơư jông trâu 2 niêv txir, 2 tus nhuôv chiê lơưr nhoz tax hâur ntu xuz thơưx”.

Mông txix hâu nov tỉnh Yên Bái cux tso pov, nhiv no, thax tsav qơư co tsi tâu muôx tsêr nhoz xã hội, tsuôk muôx 3 qơư tập thể hâur TP, tưz tâu hâu nov ntơưv qơư  muôz trâu chor chuôz zis nhoz. Hâux lưv tso tơưv ntu 2021-2030, Yên Bái sir jos uô tiêr 751 luz tsêr nhoz xã hội trơưk li Chính phủ choz. Lơưr zơưv Dương Đức Huy, Tsar Ban Tuyên giáo thiêz Jênh vênhv Tỉnh ủy Lào Cai, nhiv kruôr muôz 2 tỉnh lok uô cê, Lào Cai tsênhv yuôr lok six ntâu hâux lưv tsuv đơưk uô li: Uô tiêr têx hâux lưv bax trâu Đại hội Đảng; hâux lưv chuôz tsar 9% ntâu trơưk thủ tướng chox kriê; thiêz ntâu dưv anr zov chênhr li: Yar yêz za, cêr hlâu muk chênhr, qox ntus đriv hla đhâu đêx Liêz, chaz xor tênhv lox 500kV. Zơưv Dương Đức Huy heik:“Tsi muôx cêr thôngx siêz, sir jos, Lào Cai zuôr uô tsi tâu li hnuz no thiêz têx cêr sik thôngx siêz, siz paz ntơư vav chiê siêz zuôr tâu nthuôr uô trâu hâur tỉnh yiêz. Co cux zos iz hâur têx zov chênhr mak pêz xar cov tsưx phưv tâu truôx. Viv, muôx cêr thôngx siêz, xar tơưv tsưr ziv jông thiêx huôv tsar uô tâu thiêz T.Ư cux zuôr ntâuk grê siêz têx lênhx nênhs sik thôngx siêz truôx, muôx txux chi tsưr ziv jông, txix ntơư xeir tsov tỉnh Lào Cai têx lênhx hâu nov yiêz hâur ntu zuôr txos”./.

                                                                                                               An Kiên-Riê Lâux cxeik, nhênhv