Yuôx zêx Shan tuyết-cxơưz đas jos trâu thax tsav tox siêz Văn Chấn (Yên Bái) huôv tsar uô nox

Têx hnuz no, tsôngv box chos yuôx zêx nhoz Văn Chấn (Yên Bái) tsênhv sir jos tu têx yuôx zêx, bax sâu đê fâuv yuôx zêx tiv 2-iz hâur 4 fâuv yuôx zêx chênhr hâur shông. Chiê tsoz yuôx zêx hloz lox thiêz hlar jông, tsôngv pêx xênhv cê trâu qir, phax tuô têx caz hmoz tho nox uô ruôr hiêv, cê uô trơưk cơ quan muôx tsưr ziv uô kôngz fuô kriê. Pos Nguyễn Thị Ngân-iz hâur têx chuôz zis pêx xênhv tưz chos uô đreiv yuôx zêx tâu 20 shông lok no nhoz xã Nậm Búng, huyện Văn Chấn (Yên Bái) heik pâuz: Đros thiêz iz ha têz yuôx zêx, iz shông chuôz zis sâu tâu 100 tsov đeiv ntâu nhiêx, đhâu yưx tas têx nhiêx ntiêr nênhs đros tu thiêz sâu đê, zuôr qir zuôv, tsi muôx iz zav tsoz chos tưs pir tâu:“Chos yuôx zêx mak muôx phênhv sâu tâu ntâu đuô pir li uô lưv zav tsoz chos txơưr đuô, chos 3 shông tưz tâu sâu đê thiêz đhâu 5 shông mak tâu sâu đê ntâu lơưv. Chos yuôx zêx cux tsi so nthuô, đoz têx đrox, tsi tâu tsuôs yuôx tuô đrox, chiê cê taz por tsi uô ruôr hiêv txos tênhx qơư, tsi uô ruôr hiêv txos lênhx nênhs đas jos”.

Xã Nậm Búng nhiv no muôx zuôr xar 90% chuôz zis pêx xênhv chos yuôx zêx, xav hur si muôx zuôr xar 570 ha têz yuôx zêx Shan tuyết. Iz shông, thax tsav no sâu đê tâu 7 cxênhz tênhr njik yuôx zêx nhôngk, gra lok phênhv sâu muôx 50 tyv đeiv trâu pêx xênhv hâur xã, paz txo grêk tsơưs têx chuôz zis pluôs yuôr 7% hâur shông 2024. Zơưv Phan Luận-Quyền Chủ tịch Ủy ban xã Nậm Búng, huyện Văn Chấn heik pâuz:“Pêz tsi so heik, kriê tsôngv pêx xênhv tu thiêz sâu đê trơưk cui tinhv, taz por têx yuôx zêx hloz, hlar tâuk jông chiê lưv fâuv tâu sâu đê”.

Iz chas chos, tu têx yuôx zêx li heik sâuv, luôs hâux lưv tsiv uô, jiêz kra kruôr thiêz muôs cux tâu huyện moz siêz txos. Huyện Văn Chấn nhiv no muôx 50 doanh nghiệp thiêz qơư tsiv uô yuôx zêx, hâur co, ntâu taz viv tưz yưv pênhr zuôr, bax muôx têx chuôz zênhx jông chiê uô tâu trơưk li lênhx nênhs, ciêz đrôngs hâur thiêz đrâuv 2 chas têz qơưk siêz nhiêv. Lơưr zơưv Nguyễn Văn Phương, Giám đốc HTX Vạn Hoa-taz viv tsiv uô đreiv yuôx zêx đuz, heik pâuz: Xav kror đruôz đraz iz shông taz viv tsiv uô tâu iz cxênhz tênhr yuôx zêx đuz. Têx luôs hâux lưv txix đê yuôx zêx, mok juôx, jiêz kra kruôr txos trâu krưr ntiv hnaz.....puôr lênhx tâu uô lok six jông:“Tiv iz, pêx xênhv lơưr uô, sâu đê têx njik yuôx zêx trâu taz viv tsiv uô cux tsi yuô tâu jông; tiv 2, têz qơưk tsi tâu muôx cêr thôngx ziv lok sâuv seiz car chiê huôv tsar uô tâu truôx trơưk cui tinhv”.

Tas nro huyện Văn Chấn nhiv no muôx zuôr xar 5 cxênhz ha yuôx zêx; hâur co muôx 1.500 ntâu ha zos yuôx zêx Shan tuyết tox siêz thiêz yuôx zêx Shan tuyết lâul tâu chos ntơưv têx xã tox siêz li: Suối Giàng, Gia Hội, Nậm Búng..... Shông 2024, chor njik yuôx zêx nhôngk hâur tas nro huyện tax zuôr xar 49 cxênhz tênhr, paz gra siêz phênhv sâu tâu thiêz truôx tuk luz nênhx trâu yênhx cxênhz chuôz zis pêx xênhv. Ciês fâuv yuôx zêx hâur shôngk shông 2025, tas nro huyện tưz sâu đê tâu 10 cxênhz ntâu tênhr njik yuôx zêx nhôngk. Zơưv Phù Thế Hanh, Phưv tsar phongx Kôngz nuv thiêz tênhx qơư huyện Văn Chấn heik pâuz:“Ngênhx kôngz nuv cux tưz nhênhz chơưv trâu huyện paz chor doanh nghiệp buôk ti têx tsaz yênhx, tsênhv chei li: Nghị định 69, paz cxiv tsa thax tsav chos, cxiv tsa qơư tsiv uô lơưr VietGAP, cxaz chuôz têx tsaz yênhx piêr kriê xiv huv”.

Thax tsav yuôx zêx Văn Chấn (Yên Bái) tsênhv jux juk khav tinhv suôz bê, tsi tiêk hâur tỉnh mak hur si sâuv tas nro têz qơưk. Taz sik, chiê tsoz yuôx zêx Văn Chấn phuôx huiz tâu têx jông, hâur ntu zuôr txos tsôngv pêx xênhv, doanh nghiệp thiêz hâu nov ntơưv qơư tsuv sik hux jos truôx hâur seiz car, chos thiêz tsiv uô yuôx zêx./.

Thừa Xuân-Riê Lâux cxeik, nhênhv  

Sik côngv đros cxuô thax tsav-cxơưz cxiz paz trâu tox siêz faz Bắc tâu muôv muôs đêz đar

          Hâux lưv “cxơưz tiês sik côngv têx thax tsav hâur huôv tsar muôv muôs điện tử, muôz siêz xiv huv thax tsav tox siêz faz Bắc shông 2025” zos UB tỉnh Lai Châu sik côngv đros Bộ công thương tsưr tsix hnuz 24/5 nhiv kruôr đhâu muôx 10 Sở công thương hlôngr njêx muôk têx tỉnh thax tsav tox siêz faz Bắc; đros ntâu doanh nghiệp, HTX thiêz têx sàn muôv muôs điện tử lox txix Tik Tok Shop, Shopee....cxaz chuôz. Tsưr ziv zos chiê nriêr tsưr ziv chox têx tiv phaz li xiv huv tâu muôv muôs đêz đar thôngz đhâu nền tảng số.         Hâur co muôx jiês cir kết ntâuz ntơưr sik hux jos hâur têx doanh nghiệp muôv muôs điện tử jông thiêz Sở công thương 10 tỉnh hâur thax tsav. Hâux lưv no tâu njênhs njôngr zuôr paz krêz đar niêv ciêz sâu zuôr, chuôz tsar tsiv grê xiv huv tox siêz li yuôx zêx Shan tuyết, jiz mur, txir hơưk lok sik têx zav yuôx njuôz muôx tsiv grê. Zơưv Hà Tiến Dũng, Chủ tịch HĐ quản trị Công ty Tây Bắc TV ntơưv Lai Châu pheiz kênh:“Cur njênhs njôngr tsaz yênhx no zuôr paz têx doanh nghiệp muôx cxaz đas jos, lênhx nênhs chiê pêz tâu thox cxov jông đuô;  uô ntêx zos lênhx nênhs hâur công ty zuôr uô jông đuô hâux lưv muôv muôs xiv huv kôngz nuv, tiv zix zos zuk li xiv huv. Thiêz thôngz đhâu co pêz zuôr paz cxaz pox nhuôk nhoz tox siêz chiê lơưr muôv muôs online txix zuk li điện thoại đros zuk li xiv huv”

          Qơư piêr muôs têx xiv huv nto bê nhoz tox siêz zos qơư zaz zâuv chôngz lênhx nênhs tuôx ndis seiz. 50 ntâu qơư piêr muôs đros yênhx puôk xiv huv tsi taz tâu ntâuk grê muôx tsơưr lươngv jông mak tsênhv tâu seiz zos jông thiêz kaz. Hâur co qơư muôs Mega Livestream- qơư têx doanh nghiệp thiêz tsôngv box tiv phaz cxeik đuôz heik kriê xiv huv txos yênhx cxênhz lênhx nênhs sir zôngv sâuv têx nền tảng số tưz chox lok têx hlôngr yiêz jông hâur jiês no. Niêv lâuk Đặng Thị Thơ nhoz huyện Hữu Lũng, tỉnh Lạng Sơn pheiz kênh:“Tuôx txos Lai Châu hnuz no cur gra 2 xiv huv, hâur co muôx Lạng Sơn li zav nox greix tsơưs thiêz thạch đuz. Cur zos nôngx mênhx, xuv huv zuk uô mak zuk pâuz tsênhv tsơưr lươngv, chiê heik kriê zuk têx xiv huv, zuk khênhr chiv chir nriêr pâuz sâuv sàn muôv muôs điện tử. Tsuôk zuôr muôx 1 luz điện thoại, tas nro Lạng Sơn li têx xiv huv puôr lênhx tâu muôs sâuv kênh TikTok, Facebook, Shopee...”.

          Hâux lưv “cxơưz tiês sik côngv thax tsav haur huôv tsar muôv muôs điện tử, muôz siêz xiv huv thax tsav tox siêz faz Bắc shông 2025” ntơưv Lai Châu tsi taz zos luôk hâux lưv coaz tsôngv hâur số hóa xiv huv tox siêz, mak tsênhv tso pov đas jos thâuv sik côngv thax tsav thiêz zôngv ứng dụng công nghệ số hâur huôv tsar kinh têr tiv phaz.

          Thâuv têx xiv huv kôngz nuv tâu chox muôs sâuv sàn muôv muôs điện tử, cux zos thâuv tsôngv box mênhx cxưx tox siêz li tsiv grê vênhx huôv,   siêz xar tơưv thiêz đas jos lox tôngv tâu ntâu qơư pâuz txos thiêz truôx tul đuô./.

Khắc Kiên-Txâur Vax cxeik nhênhv