Lênhx nxeik nênhs Êđê hlôngr yiêz tsưr ziv xơưk pax ntâuz, ntok ntâuz

Muk sêiz shuôk qơư muôs hax huv ntok ntâuz Mara hâur têx hnuz kaz ciêz, pêz pov khôngz qiv uô hâux lưv ntơưv no đhâu têx suôz meir xơưs pax ntâuz lok six sưv đros hâur jêx jok.

Tsi tâu cơưv đhâu têx lớp cơưv chuyên nghiệp, taz sik niêv tix H’Loang Mlô, xênhz shông 1996 ho huôv tsar uô hâux lưv xơưk pax ntâuz txix zuk siêz xar truôx bo. Đros tuôr tsês hâux lưv chax chês, niêv tix tsênhv chox lol têx hlôngr yiêz jông sâuv têx tsôngk tiêz tsôngk yo huv đros thiêz siêz nhiêv nhiv no. Txơưv tsôngk yo hlôngr yiêz lơưr tsôngv kruô siêz nhiêv, niêv lâuk cux truôx siêz tuôr tsês têx pax ntâuz thiêz pax trâur lâus, chiê xiv huv cê hlôngr yiêz cê muôx tsiv gri vênhx huôv zuk mênhx cxưx. Niêv tix H’ Loang Mlô puz pâuz: “Têx hnuz xuz thơưx qir huôv tsar uô, cur njiz lok six ntâu kror phiv liv, tiv zix zos phiv liv lok nhiêx txiêx. Muôx têx thâuv xar tiêk tsuv tso tsês tsi uô thiêz, taz sik khov têx chênhz zênhv muôx tâu txix hâux lưv muôs hax huv online thiêz tâu têx niêv lâuk, niêv tix njênhs njôngr, paz max, cur tưz muôx nzir đas jos chiê truôx siêz hla đhâu. Iz thênhv jux juk, cur kriz uô thiêz huôv tsar. Txos nhiv no, công ty tưz muôx 7 lênhx nênhs uô hâux lưv, 60 lênhx cộng tác viên, đros 8 qơư xơưk ntâuz, 8 qơư ntok ntâuz thiêz 3 qơư uô pax ntâuz. Têx lênhx nênhs uô hâux lưv ntơưv no muôx phênhv sâu tâu truôx txix 3,5 txos 10 triệu đêiv iz hli”.

Đrâuv huôv tsar uô nox, uô lax luôv, niêv lâuk H’Loang Mlô tsênhv muôz hâux lưv uô thiêz paz ntâu lênhx nênhs muôx luz nênhx txov nhêv hâur côngv thôngx. Tul nhuôv nxeik H’Lagi Mlô tsênhv zos shux xênhz shông 2 Đại học Tây Nguyên. Khov muôx niêv lâuk H’Loang paz max, H’Lagi Mlô tưz hla đhâu cêr txov chiê tror cơưv ntơưr: “Cur uô tsâus niêv lâuk H’Loang viv thâuv tưs cux sik côngv thiêz paz max trâu cur. Txix thâuv tâu lok đros niêv lâuk uô hâux lưv, cur pâuz nzir lok zuk heir nênhs Êđê li têx tsôngk trik yo cxôngx nzor. Cur cux pâuz tsênhz đuô lok têx pax ntâuz zos chor niêv hloz, niêv tix xơưk tâu, lok six jông thiêz khưr. Iz chas ntơư, cur tsênhv muôx nzir nhiêx txiêx chiê muk cơưv ntơưr, đơưk tâu têx phiv liv lok yêz muk lok thiêz qơư nox nhoz, txix co tso siêz sir jos cơưv ntơưr"

Đros têx pax ntâuz txeix jông jav côngv đros têx cêr vênhx huôv jông, têx pax ntâuz Tây Nguyên ziv hnuz ziv tâu sơưr đơưk hâur thiêz sâuv ntiêx têz moz siêz txos. Tix lâus Donovan Fink, tsôngv kruô tuôx txix Mỹ, puz pâuz: "Cur pov lok six jông. Tsôngs yo no hnar lok six jông, têx pax ntâuz mak tâu xơưk lok six jông jav. Cur lok six shir phaz thâuv tâu tuôx ndis seiz thiêz hnar têx tsôngs trik yo no. Cur cux xar zuôr iz chêr uô huv trâu chuôz zis chiê lơưr tâu pâuz nzir lok  vênhx huôv jông no."

Hâur luz nênhx muôx ntâu hlôngr yiêz nhiv no, têx lênhx hluôk nênhs jông li niêv lâuk H’Loang Mlô tsênhv sir jos tuôr tsês hâux lưv ntok ntâuz chax chês. Đros siêz xar tơưv yiêz, truôx siêz thiêz xar njôngr heik kriê zuk têx vênhx huôv jông, njênhs njôngr tiêk hâur ntu zuôr txos, pax ntâuz Êđê zuôr tror khav tênhv tâu qơư sơưr, yênhx qơư txuôk đros têx vênhx huôv chax chês hâur ntu hlôngr yiêz nhiv no./.

VOVTây Nguyên-Txâur Vax cxeik nhênhv

Jos Khuổi Ky huôv tsar truôx têx muôx ntơưv qơư, cxơưz cxiz cxiv uô qơư ndis uô si côngv thôngx

Cxuô luz tsêr muôz poz jêz cxiv uô tâu muôx yênhx châuv shông, iz cxiê luz yênhx puô shông cux tsênhv tâu tsôngv px hâur thax tsav qơư co tuôr tâu truôx zos đrêiv li têx tsêr cxôngx nzor. Chênhr zos đros trâu têx tsêr muôz poz jêz cxiv uô cxôngx nzor thiêz nhoz jê thax tsav qơư ndis uô si nto bê li tsas đêx tsơưk tsuô, ntâu chuôz zis nhoz Khuổi Ky tưz tror kho đuô têx tsêr cxôngx nzor thiêz cxiv uô tsêr tok kruô tuôx nhoz so, ndis uô si. Lar hêik zos hêir nênhs Tày têx tsêr cxôngx nzor cxiv uô huv đros tsôngv kruô siêz nhiêv. Triệu Ích Sỹ, chuôz zis cxiv uô tsêr tok kruô gra bê Yến Nhi, zos iz chuôz zis uô ntêx hlo cxiv uô cxuô qơư ndis uô si, sêiz shuôk têz qơưs txix ciês zuk luz tsêr muôz poz jêz cxiv uô shir phaz lul hêik pâuz: “Cur chuôz zis cxiv uô qơưs ndis uô si txix shông 2016, viv cur sêiz pov muôx chôngz lênhx kruô tuôx ndis uô si trâu tsas đêx tsơưk tsuô. Đros co, chor kruô nhoz Hà Giang tuôx ndis uô si cux hêik trâu cur tiêk, zuk tsuv uô tsêr tok kruô tuôx nhoz so muk lok ndis shuôk têz qơưs. Txix ntơư, cur chuôz zis thiêx piz cxiv uô tsêr tok kruô. Nhiv no, cur chuôz zis muôx 10 ntâu qar tsêr tsês trâu tsôngv kruô tuôx nhoz so muk lok sêiz shuôk têz qơưs thiêz cur tsênhv huôv tsar truôx zuk hêir nênhs têx txux chi, vênhx huôv jông cxôngx nzor”.

Iz chas tsôngv kruô tuôx nhoz so ndis uô si, tsôngv kruô tuôx trâu  Khuổi Ky cux tsênhv tâu đros tsôngv px hêir nênhs Tày hâur thax tsav qơư co nthuôr uô cêr lov jêv thiêz pâuz txos tsôngv px têx cêr huôv tsar uô nênhx, nox nhoz muk lok hâur niêx hnuz cux li chax chêk muôz poz jêz chox lok cxiv uô tsêr nhoz. Chênhr zos huôv tsar tâu truôx zuk hêir nênhs têx muôx liv co, ziv cxơưz cxiz tâu chôngz lênhx kruô tuôx ndis uô si trâu Khuổi Ky. Pos Nguyễn Thị Thanh Tuyền, nhoz đrôngl Hồ Chí Minh tuôx ndis uô si trâu thax tsav qơư no shir phaz lul hêik pâuz: “Hnuz no cur tuôx trâu txos trâu Cao Bằng, têis cik no cux lok ndis uô si trâu qơư tsas đêx tsơưk tsuô thiêz lok ndis uô si trâu thax tsav qơư no, cur sêiz pov sđ têx tsêr muôz poz jêz cxiv uô huv đros tsôngv kruô siêz nhiêv thiêz ntơư cux chênhr zos tsôngv px sđ têx txux chi, vênhx huôv jông cxôngx nzor, tsuv hêik kriê trâu tsôngv kruô oz chas têz qơưs pâuz txos”

Ntơưv Khuổi Ky, hâur cxuô luz tsêr muôz poz jêz cxiv uô chênhr zos tsôngv px hêir nênhs Tày têx vênhx huôv jông cxôngx nzor tsênhv tuôr tâu truôx đhâu ntâu tiêv lok huv đros thax tsav qơư nhoz, cxơưz cxiz tâu chôngz lênhx kruô tuôx sêiz shuôk, ndis uô si. Nhiv no, jos poz jêz Khuổi Ky muôx 18 chuôz zis cxiv uô cxuô qơư ndis uô si côngv thôngx. Zơưv Nông Ích Đạt, Bí thư Chi bộ jos Gun - Khuổi Ky, xã Đàm Thủy shir phaz lul hêik pâuz: “Cur yax kriê tsôngv px sđ chos cxuô zav jâuz, tu zus kêiz buô chiê tok tsôngv kruô tuôx ndis uô si tâu nox zuk hêir nênhs cxuô zav nox kaz. Sđ têx tsêr muôz poz jêz cxiv uô tsuv tuôr cov tâu truôx zos đrêiv zuk hêir nênhs têx tsêr cxôngx nzor. Đros co, sđ tsuv huôv tsar cov tâu truôx zuk hêir nênhs têx txux chi, vênhx huôv jông cxôngx nzor cov muôx đros đrêiv hâur luz nênhx niêx hnuz tsik chiê pôngz plox”

Đhâu iz ntu ntêr, jos poz jêz Khuổi Ky cux tsênhv tuôr tâu truôx zuk hêir nênhs têx txux chi, vênhx huôv jông tsiv grê đhâu ntâu tiêv. Lar hêik zos hâur têx hnuz no, tưz muôx chôngz lênhx kruô pâuz txos thiêz tuôx sêiz shuôk, ndis uô si.

Txix têx tsêr muôz poz jêz chox lok cxiv uô cxôngx nzor, hâur têx hnuz no hêir nênhs Tày nhoz Khuổi Ky cux tsênhv kriz đar cxuô cxơư ndis uô si, sêiz shuôk têz qơưs txuôk đros huôv tsar truôx sđ têx txux chi, vênhx huôv jông cxôngx nzor, cxơưz cxiz tâu chôngz lênhx kruô tuôx sêiz shuôk, tsôngv px muôx phênhv sâu tâu nhiêx txiêx chox lok cxiv kho chuôz zis, ziv hnuz ziv muôx luz nênhx tsâu sor./.

           Tsu cxêik nhênhv-VOV Đông Bắc