Sik côngv đros khôngz qiv hnuz ntênhs choz jênhv tuz lênhv, tas cik hnuz 27/2 ntơưv Sơn La thiêz Lào Cai tưz tsưr tsix Ntênhs choz jênhv tuz lênhv shông 2024. Shông no, TP Sơn La muôx 132 lênhx hluôk nênhs sơưr cêr muk uô tuz lênhv, hâur co, 95 hluôk nênhs cxaz chuôz nghĩa vụ quân sự thiêz 37 lênhx cxaz chuôz nghĩa vụ công an. 100% hluôk nênhs muôx đas jos jông thiêz yênhx tưv txix trung cấp, cao đẳng, đại học, 83 lênhx cơưv tiêr tsaz yênhx jênhv pâuz lok đảng. Ntơưv tỉnh Lào Cai shông no, Quân khu 2 tưz choz thiêz hu grus 900 lênhx hluôk nênhs muk uô tuz lênhv, choz trâu Sư đoàn 316 (quân khu 2), Bộ chỉ huiz quân sự tỉnh Yên Bái, Bộ chỉ huiz Bộ đội pênhz phax tỉnh Lào Cai thiêz trung đoàn 254 (Bộ chỉ huy quân sự tỉnh Lào Cai)./.

TTTB-Txâur Vax cxeik nhênhv

Tas cik hnuz 27/2, 10 huyện, TP hâur tỉnh Điện Biên tưz iz luôs tsưr tsix ntênhs choz tuz lênhv yiêz shông 2024. Shông no, tỉnh Điện Biên xeir tsov 1.246 lênhx tuz hluôk sơưr cơưr muk uô tuz lênhv, choz trâu têx taz viv bôv đôiv thiêz Công an li: Trung đoàn 741, Bộ Chỉ huy quân sự tỉnh Điện Biên; Bộ Chỉ huy Bôv đôiv Pênhz phax tỉnh, Trung đoàn 82; Sư đoàn 355, Quân khu 2 thiêz Công an tỉnh Điện Biên. Đhâu thôngz sâu, chor tuz hluôk muk uô tuz lênhv jiês no puôr lênhx muôx đas jos jông, tsav zuôr xar 70%; cơưv tas ntơưr siêz đuô pir li shông 2023, têx lênhx cơưv tas Đại học, cao đẳng, Trung cấp tsuv uô tsav 1% ntâu. Chor hluôk nênhs no lơưr muôx hnuz nhôngs txix 18-26 shông, thiêz chor hluôk zos heir nênhs tsơưs tsav 94% ntâu, hâur co muôx 7 lênhx zos heir nênhs lok six tsơưs nênhs./.

Vũ Lợi-Riê Lâux cxeik, nhênhv

Nhoz thax tsav tox siêz tsênhv yuôr ntâu phêv liv taz sik tsêr kho moz đa khoa tỉnh Yên Bái thâuv tưs cux sir jos cơưv shâuv, krêz uô ntâu kỹ thuật siêz thiêz yiêz, kỹ thuật lax uô lok tsoz phưz đas jos thiêz kho moz trâu nênhs moz. Têx y bác sĩ no li sir jos tsi taz gôngr phênhv uô txu grês nênhs moz tsuv xa muk trung ương, mak tsênhv uô nênhs moz nhoz tox siêz hâur thiêz đrâuv tỉnh jông siêz. Thạc sỹ, bác sỹ Diêm Sơn, Phưv giám đốc Tsêr kho moz đa khoa tỉnh Yên Bái puz pâuz:“Côngz xưv thox cxov cán bộ mak thâuv tưs cux tâu tsêr kho moz tsov cưv. Iz shông pêz muk cơưv chuyên khoa I, chuyên khoa 2, thạc sĩ muôx nhos 20 nhân viên y tế. Tiv zix tso muk thox cxov nhoz saz đrâuv têz qơưk đros têx bác sĩ muôx chuyên môn truôx t6hiêz txơưx luk đrâuv têz qơưk, pêz cux thox cxov ntơưv tsêr kho moz niêx shông yênhx cxênhz jiês chiê muôz siêz pênhr xưv chuyên môn”./.

(Đinh Tuấn-Txâur Vax cxeik nhênhv)

Txuz hluôr tơưk cuz jôngr ntơưv 2 jok Séo Mý Tỷ thiêz Dền Thàng hâur xã Tả Van, thị xã Sa Pa, tỉnh Lào Cai txix hnuz 19-22/2/2024 tưz uô ruôr hiêv tas muôx 4 ha jôngr ntông chos thiêz 31 ha têx shôngz ntông tsi tâu lox. Đhâu co muôx têx pâuz tâu: tsuv uô jông lơưr tsưr ziv 4 ntơưv qơư, co zos: Hu zênhx max, phênhz côngz huv đros, sir zôngv nênhs ntơưv qơư muôx: Dân quân tự vệ, têx lênhx nênhs tsưx phưv jôngr thiêz tsôngv pêx xênhv hâur xã muôx hluôr tơưk txeik cuz jôngr zos têx lênhx pâuz tsênhz thax tsav qơư, muôx đas jos jông; zênhx max thiêz sir jos đros tuô, phax tar ciês thâuv nhiv kruôr txeik chis cuz, hâur co tus nênhs chox kriê tuô hluôr tơưk tsuv pâuz tsênhz mênhx thax tsav qơư muk lol thiêz txơưx fuô kriê tsưr ziv, chox lênhx nênhs uô hâux lưv tuô hluôr tơưk.... Iz chas ntơư uô jông tsưr ziv “3 zênhx max”, co zos: Qênhz pov nzor, qênhz pov thâuv hluôr tơưk nhiv kruôr txeik chis cuz mê viv li zuôr tsi trâul hu zâuv ntâu tus chôngz lênhx đros tuô hluôr tơưk; hu zâuv zênhx max lênhx nênhs txix ciês thâuv nhiv kruôr qênhz pov...../.

VOV4-Riê Lâux cxeik, nhênhv