Ngon tô thứ 2 mự 16/10/2017

Bộ đội đèn mương đảy tủm pua lông pày xã tẳng tánh chủm mú chính trị

---------------------------------------

Ngày lằng chơ đảy tủm pua lông pày xã Chiêng Òn, nhẳn chức Phó Bí thừ Đảng uỷ xã, Thượng tá Phạm Hồng Tuấn, cán bộ đôn bộ đội đèn mương Chiên Òn nhẳn nả vịa cóp thỏi hôm quam hẳư xã, tủm pua nả vịa tẳng tánh Đảng, tẳng tánh chủm mú chính trị cờ sở. Tẳng cốc khảu dệt vịa, cài lăm le, ai Tuấn hền đảy Chiêng Òn nhăng mi pưng cờ sở bản báu he mi po đảng viền vạy tánh ók chì bộ, pưng bản ứn mi po đảng viền lẹo hák va đảng viền nhinh nhăng mi nọi, mi bản nhăng báu mi, lưn xưa lỏ pưng bản pi nọng chựa côn Mông, cốc pài lỏ pưa hịt khong  khòng pi nọng, ưởi nọng phủ nhinh cọ báu đảy chôm hặp vịa bản càn mương.

PỌm cắp nả vịa nặn, thượng tá Phạm Hồng Tuấn nhăng cóp thỏi hôm quam hẳư Đảng uỷ xã, pằn vịa hẳư cán bộ, đảng viền cuồng Bàn chấp hành Đảng uỷ, pưng đoàn thể trực thuộc chực  chau chôm hặp sình hoạt đảng pọm cắp pưng chi bộ. Pưng đồng chí nị mi vịa dệt lỏ chự mằn vịa sình hoạt, hụ hền cánh giới thiệu cồng dần pộn dỏn vạy khảu đảng. Riềng đồng chí Phạm Hồng Tuấn sình hoạt nẳng chi bộ bản Suối Cút, bản dú tó đèn mương xút ti pọ lài dạk cha cánh mi lài nả vịa họn hưn ma tang chính trị. Chi bộ mi 4 Đảng viền, mi kình nghiệm, trách nhiệm, hák va luông hụ xiêng cọ báu đảy to đằư. Ai cọ chà van cắp chi bộ tít tờn, tủm pua lau vịa dệt khòng tổ chức Đoàn thanh niền, hội phủ nhinh, cựu chiến bình cuồng bản, giào ngon vịa chảnh thí hẳư pưng tổ chứuc nị. Cài nặn cọ hụ hền cánh giơí thiệu kết nạp đảy 2 côn khảu Đảng, mi luông hụ xiêng, nặm sằư chằư sư, nho số đảng viền khòng chi bộ khửn 6 đồng chí. Pưng nả vịa họn hưn cọ đảy cấp ủy chi bộ, pọm cắp chính quyên bản kẻ khày lợp tăn. Pọm cắp bản Suối Cút, 11 bản ứn khòng xã Chiêng Òn cọ pọm mi đảng viền.

ꪶꪚ ꪶꪓꪥ ꪵꪒꪘ ꪹꪣꪉ ꪔꪣꪴ ꪝꪺ ꪶꪩꪉ ꪼꪜ ꪎꪱ ꪔꪉꪰ ꪵꪔꪉ ꪊꪣꪴ ꪢꪴ ꪊꪉꪸ ꪊꪲ

--------------------

ꪼꪈ ꪨꪉꪰ ꪹꪋꪷ ꪼꪒ ꪔꪣꪴ ꪝꪺ ꪶꪨꪉ ꪼꪜ ꪎꪱ ꪋꪉꪸ ꪮꪮꪙ , ꪐꪽ ꪊꪀꪳ ꪠꪷ ꪚꪲ ꪖꪳ ꪒꪱꪉ ꪮꪫꪲ ꪎꪱ , ꪹꪖꪉ ꪔꪱ ꪠꪱꪣ ꪶꪬꪉ ꪔꪺꪙ , ꪀꪱꪙ ꪶꪚ ꪶꪓꪙ ꪵꪒꪘ ꪹꪣꪉ ꪋꪉꪸ ꪮꪮꪙ ꪐꪽ ꪘꪱ ꪫꪀꪸ ꪀꪮꪚ ꪖꪮꪥ ꪶꪭꪣ ꪁꪫꪱꪣ ꪻꪬ ꪎꪱ , ꪔꪣꪴ ꪝꪺ ꪘꪱ ꪫꪀꪸ ꪔꪉꪰ ꪵꪔꪉ ꪒꪱꪉ , ꪔꪉꪰ ꪵꪔꪉ ꪊꪣꪴ ꪢꪴ ꪊꪉꪲ ꪊꪲ ꪘꪉꪰ ꪹꪀꪷ ꪹꪎꪷ . ꪔꪉꪰ ꪶꪀꪀ ꪹꪄꪱ ꪹꪥꪸꪒ ꪫꪀꪸ ꪀꪱꪥ ꪩꪾ ꪵꪩ ꪯꪱꪥ ꪔꪺꪙ ꪹꪬꪸꪙ ꪼꪒ ꪋꪉꪸ ꪮꪮꪙ ꪑꪉꪰ ꪣꪲ ꪝꪉꪳ ꪹꪀꪷ ꪹꪎꪷ ꪚꪱꪙ ꪹꪚꪱ ꪹꪭꪸ ꪣꪲ ꪝꪷ ꪒꪱꪉ ꪪꪙꪸ ꪼꪫ ꪵꪔꪉ ꪮꪮꪀ ꪊꪲ ꪶꪚ , ꪝꪉꪳ ꪚꪱꪙ ꪮꪙꪳ ꪣꪲ ꪝꪷ ꪒꪱꪉ ꪪꪙꪸ ꪵꪩꪫ ꪬꪱꪀ ꪫꪱ ꪒꪱꪉ ꪪꪙꪸ ꪑꪉꪲ ꪑꪉꪰ ꪣꪲ ꪙꪮꪥ , ꪣꪲ ꪚꪱꪙ ꪑꪉꪰ ꪹꪚꪱ ꪣꪲ , ꪩꪙꪳ ꪹꪏ ꪨꪷ ꪝꪉꪳ ꪚꪱꪙ ꪝꪲ ꪙꪮꪉ ꪹꪋ ꫛ ꪶꪣꪉ , ꪶꪀꪀ ꪜꪱꪥ ꪨꪷ ꪹꪝ ꪭꪲꪒ ꪅꪮꪉ ꪄꪮꪉ ꪝꪲ ꪙꪮꪉ , ꪹꪮꪥ ꪙꪮꪉ ꪠꪴ ꪑꪉꪸ ꪁꪷ ꪹꪛꪱ ꪼꪒ ꪶꪋꪣ ꪭꪚꪰ ꪫꪀꪸ ꪚꪱꪙ ꪀꪱꪙ ꪹꪣꪉ.

ꪝꪮꪣ ꪀꪚꪰ ꪘꪱ ꪫꪀꪸ ꪙꪽ, ꪹꪖꪉ ꪔꪱ ꪠꪱꪣ ꪶꪬꪉ ꪔꪺꪙ ꪑꪉꪰ ꪀꪮꪚ ꪖꪮꪥ ꪶꪭꪣ ꪁꪫꪱꪣ ꪻꪬ ꪒꪱꪉ ꪮꪫꪲ ꪎꪱ, ꪜꪽ ꪫꪀꪸ ꪻꪬ ꪀꪱꪙ ꪶꪚ , ꪒꪱꪉ ꪪꪙꪸ ꪀꪺꪉ ꪚꪱꪙ ꪹꪊꪷꪚ ꪵꪬꪉ ꪒꪱꪉ ꪮꪫꪲ , ꪝꪉꪳ ꪒꪫꪱꪙ ꪹꪖꪸ ꪋꪀꪳ ꪖꪺꪀ ꪋꪀꪳ ꪹꪋꪱ ꪶꪋꪣ ꪭꪚꪰ ꪎꪉꪲ ꪭꪫꪱꪒ ꪝꪮꪣ ꪀꪚꪰ ꪝꪉꪳ ꪊꪲ ꪶꪚ. ꪝꪉꪳ ꪶꪒꪉ ꪊꪲ ꪙꪲ ꪣꪲ ꪫꪀꪸ ꪹꪥꪸꪒ ꪨꪷ ꪋꪳ ꪢꪽ ꪫꪀꪸ ꪎꪉꪲ ꪭꪫꪱꪒ , ꪭꪴ ꪹꪭꪸꪙ ꪵꪀꪉ ꪹꪤꪷꪥ ꪖꪫꪸ ꫛ ꪹꪤꪷꪙ ꪶꪝꪙ ꪤꪮꪙ ꪼꪫ ꪹꪄꪱ ꪒꪱꪉ . ꪦꪉꪸ ꪶꪒꪉ ꪊꪲ ꪠꪱꪣ ꪶꪬꪉ ꪔꪺꪙ ꪶꪋꪣ ꪭꪚꪰ ꪎꪉꪲ ꪭꪫꪱꪒ ꪘꪉꪰ ꪊꪲ ꪶꪚ ꪚꪱꪙ ꪎꪺꪥ ꪀꪒꪴ , ꪨꪷ ꪚꪱꪙ ꪵꪒꪙ ꪹꪣꪉ ꪎꪴꪒ ꪕꪲ ꪝꪷ ꪨꪱꪥ ꪥꪱꪀ ꪋꪱ ꪵꪀꪈ ꪣꪲ ꪨꪱꪥ ꪘꪱ ꪫꪀꪸ ꪭꪮꪙ ꪭꪙꪳ ꪣꪱ ꪕꪱꪉ ꪊꪉꪲ ꪊꪲ. ꪊꪲ ꪶꪚ ꪣꪲ 4 ꪒꪱꪉ ꪪꪙꪸ ꪣꪲ ꪀꪉꪲ ꪈꪣꪸ ꪣꪲ ꪵꪊꪀ ꪐꪣꪸ , ꪬꪱꪀ ꪫꪱ ꪩꪺꪉ ꪭꪴ ꪏꪉꪸ ꪁꪷ ꪹꪚꪱ ꪼꪒ ꪕꪷ ꪻꪒ.

ꪯꪱꪥ ꪁꪷ ꪊꪱ ꪫꪱꪙ ꪀꪚꪰ ꪊꪲ ꪶꪚ ꪔꪒꪲ ꪹꪔꪷꪙ , ꪔꪣꪴ ꪝꪺ ꪹꪨꪱ ꪫꪀꪸ ꪹꪤꪸꪒ ꪄꪮꪉ ꪝꪉꪳ ꪶꪔ ꪊꪁꪳ ꪒꪫꪱꪙ ꪵꪖꪉ ꪘꪙꪸ , ꪶꪭꪥ ꪠꪴ ꪑꪉꪲ , ꪶꪭꪥ ꪁꪫꪲ ꪊꪙꪸ ꪚꪉꪲ ꪀꪺꪉ ꪚꪱꪙ , ꪤꪱꪫ ꪉꪮꪙ ꪫꪀꪸ ꪵꪊꪉ ꪖꪲ ꪻꪬ ꪝꪉꪳ ꪶꪔ ꪊꪀꪳ ꪙꪲ. ꪀꪱꪥ ꪙꪽ ꪁꪷ ꪭꪴ ꪹꪬꪸꪙ ꪀꪱꪉ ꪹꪀꪸꪒ ꪙꪱꪚ ꪼꪒ 2 ꫛ ꪹꪄꪱ ꪒꪱꪉ , ꪣꪲ ꪩꪺꪉ ꪭꪴ ꪏꪉꪸ , ꪙꪾ ꪻꪎ ꪻꪊ ꪏꪳ , ꪑꪷ ꪶꪎ ꪒꪱꪉ ꪪꪙꪸ ꪄꪮꪉ ꪊꪲ ꪶꪚ ꪄꪙꪳ 6 ꪶꪒꪉ ꪊꪲ. ꪝꪉꪳ ꪘꪱ ꪫꪀꪸ ꪭꪮꪙ ꪭꪙꪳ ꪁꪷ ꪼꪒ ꪹꪀꪷꪚ ꪮꪫꪲ ꪊꪲ ꪶꪚ , ꪝꪮꪣ ꪀꪚꪰ ꪊꪉꪲ ꪁꪫꪙꪸ ꪚꪱꪙ ꪵꪀ ꪼꪄ ꪹꪩꪷꪚ ꪕꪽ. ꪝꪮꪣ ꪀꪚꪰ ꪚꪱꪙ ꪎꪺꪥ ꪀꪒꪴ , 11 ꪚꪱꪙ ꪮꪙꪳ ꪄꪮꪉ ꪎꪱ ꪋꪉꪸ ꪮꪮꪙ ꪁꪷ ꪝꪮꪣ ꪣꪲ ꪒꪱꪉ ꪪꪙꪸ.

TB – Thành dịch