Ƀai má 1 drăng kố:
Ƀai má 2 drăng kố:
VOV4.Sêdang - Tung tơdroăng ki ngin ai tơpui mơ’no a hâi hnah, ngin hiăng tơpui tối ‘na 2 ƀai dêi khu ƀai “Tơdjoâm ivá-môi hiâm mơno tơkâ luâ pơreăng”, vâ mơnhên tối ‘na troăng tơdjâk, troăng pơkâ ki ahdrối, ki khŏm kâi chiâng dêi tâi tâng khu râ kăn pơkuâ tơnêi têa vâ ga kâi châ mơdât pơreăng tâ tú tung pơla nôkố, thăm mơdêk tơdroăng ‘mâi mơnhông pêi cheăng kâ, mơnhông rêh ối pơlê pơla, mê cho kal châ ai vaccine.
Ki păng ‘nâng, ƀă mâu troăng pơkâ ki tí tăng êng pâ pơkeăng vaccine tá troh a tơdroăng pơtối mơnhông ivá ki mơjiâng tíu ki rak ngăn, pơkuâ ngăn vaccine, hriăn plĕng mơjiâng pro vaccine ƀă hên hĕng mâu tơdroăng ki ê Việt Nam hiăng ƀă dế ai mâu hvêa chêng prôk châ tơniăn lĕm, tro troăng ăm hnoăng cheăng ki kố. Tơdroăng mê, tí xê tâi tâng khu râ pơkuâ ôh tá pêi pro ki klâi lơ pêi cheăng bu krâ kơvâ, bú tơkôm roh ki vâ chê 100 rơtuh ngế kuăn pơlê châ pâk tŭm pơkeăng hbrâ mơdât pơreăng SARS COVI 2 chiâng tiah pơreăng ki hmâ trâm hlo mê hía nah, mê nếo ‘mâi mơnhông ƀă mơdêk tơdroăng pêi cheăng kâ, tê mơdró.
Sap ing ai pơreăng COVID-19 xông tâ tú nah, Đảng, Chin phuh hiăng mơnhên tối, “Hnoăng cheăng 2 hdroh”-rế hbrâ, rế tơplâ, mơdât pơreăng la xuân rế mơnhông pêi cheăng kâ-rêh ối pơlê pơla.
Tơkâ hên hdroh pơreăng xông tâ tú, ƀă mâu tơdroăng ki pin tá hâi ‘nâi hdrối ga ti lâi, mê troh nôkố, hlo nhên tơdroăng pơkâ mê xuân tơtro, thăm kal kơdo mơ-eăm hên luâ tâ kơ mê nếo dêi khu râ kăn pơkuâ cheăng kal kí tơnêi têa, vâ ăm ga tơtro, tơniăn ƀă tơdroăng rêh ối chal nếo nôkố, mơjiâng chiâng hên tơdroăng ƀlêi chiâng ki nếo tung hnoăng mơjiâng, mơnhông tơnêi têa. Kố cho ki xiâm dêi ƀai má mơ’nui tung khu ƀai, ai inâi “Rêh ối, pêi cheăng tơtro vâ hbrâ mơdât pơreăng COVID-19, thăm mơdêk rế ó ‘na cheăng kâ”.
Vâ chê 2 hơnăm pơreăng COVID-19 xông tâ tú, malối cho sap ing tơdjâk ki hên dêi rôh pơreăng tâ tú má 4, ki krá tơniăn dêi tơdroăng rêh ối, ivá kâi trâng dêi tơdroăng cheăng kâ trâm xơpá drêng kơlo pêi chiâk deăng, tê mơdró ƀă pêi chiâk deăng tro kơdroh; kơxô̆ khu mơdró kâ pơtê hên hĭn; tâi tâng kế tơmeăm tê ‘ngré ƀă kơxô̆ liăn sap ing tê kế tơmeăm xúa kơdroh; kơxô̆ liăn ‘no cheăng tơdjuôm bu châ iâ; mâu ngế pêi cheăng hía cheăng pêi – ôh tá ai cheăng pêi tâk hên; chĕn liăn ôh tá kâi mơdrếo ăm hngêi rak liăn tâk hên – tơdroăng ki mơni kô ôh tá trâm tơdroăng mơhúa ‘na liăn ngân ƀă hên ki ê.
Tiô ngế ki rơkê plĕng ‘na cheăng kâ. Tiê̆n sih Võ Trí Thành, kố cho tơdroăng ki xơpá kân má môi sap nah tá hâi chói trâm ‘na cheăng kâ – rêh ối dêi tơnêi têa, sap ing mâu hơnăm 60:
“Pơreăng kố gá môi tiah tơdroăng ki ‘mêi pro tơ’nhiê ‘na cheăng kâ pro pá puât tơdroăng ki tê mơdró tung lâp plâi tơnêi, pơla mâu kong têa ƀă tung dế mâu kong têa tung tâi tâng mâu kơvâ cheăng. Xuân cho rôh apoăng klêi kơ’nâi hên hơnăm sap ing pin pêi pro Luât Khu mơdró kâ, kơxô̆ khu mơdró lo ing mâu tíu tê mơdró gá hên tâ tâng vâ pơchông ƀă kơxô̆ khu mơdró kâ mơjiâng pro ki nếo, kố cho tơdjâk kân khât.
Tiô tối hdrối, mơdêk cheăng kâ hơnăm kố kô a kơlo ki tâk iâ má môi tung 30 hơnăm hơ’lêh nếo a Việt Nam. Mâu kơpong ki ai pơreăng tâ tú rơ-iêo môi tiah Sài Gòn, Đông Nam Bộ, Bắc Ninh, Bắc Giang pơrá ăm hlo: cho a rôh ki vâi chiu xơpá”.
“Kơlo ki vâi chiu xơpá” tiô túa khĕn dêi ngế ki rơkê plĕng Võ Trí Thành ôh ti xê to mâu tơdroăng ki châ riân ngăn ƀă tơbleăng. Xua tơdjâk dêi COVID-19 gá hiăng phá tơ-ê tâng vâ pơchông ƀă mâu tơdroăng tơxul tơxaltung cheăng kâ hdrối nah, pơklât thế Chin phuh athế pêi pro tơdroăng ối klê pơlê pơla tung lâp lu ƀă pêi cheăng. Túa dêi klâ krê pơlê pơla, lơklâ kơtăn, “mơdât mot lo” cho “pro pá ăm tơdroăng cheăng”. Ƀă hên tơdroăng ki ê tung tơdroăng rêh ối pơlê pơla. Tơdroăng kố tâng ối ton, mê kô trâm rế hên tơdroăng ki xơpá. Hên khu ki rơkê, khu mơdró kâ tối tiah kố:
“Ngin hiăng trâm tơdroăng ki xơpá má môi ki kâi ki pin ôh tá kâi chiu, tâng pơtối nếo, khu mơdró ôh tá ai ivá xếo. Athế hơ’lêh tơdroăng pơkâ tung la ngiâ vâ pơxiâm vêh pêi cheăng kâ nếo.
Mơnhên ôh tá vâ tơdroăng ki kố kô ối ton, Chin phuh hiăng pơkâ thế mâu khu xiâm, kơvâ cheăng, kong pơlê athế mơjiâng tơdrêng hlối mâu Tôh pêi cheăng ‘na ‘mâi mơnhông, mơdêk cheăng kâ - rêh ối pơlê pơla; Chêh promâu hlá mơéa tơtro ƀă tơdroăng ki ai khât dêi kong pơlê, tíu pêi cheăng. Tơdroăng mê ai mâu ƀai hriâm ki pơxúa cho “ngế ki lâi pêi, kong pơlê, pơlê kong kân, kơvâ cheăng ki lâi, kong pơlê-pơlê kong kân-kơvâ cheăng ki mê pêi pro”.
Tơdroăng ki kal châ Chin phuh séa ngăn tơdrêng drêng hiăng ai mâu ƀai hriâm ki rơkê sap ing mâu kong pơlê, pơlê kong kân pêi pro tơdroăng klâ ối krê pơlê pơla ton môi tiah Pơlê kong kân Hồ Chí Minh, Bình Dương, Long An ƀă hên kong pơlê ki ê; klêi kơ’nâi hiăng ai ivá ki kâi trâng tơniăn sap ing mâu kơpong ngiât môi tiah: Bắc Ninh, Bắc Giang, Vĩnh Phúc, Hải Phòng ƀă hên kong pơlê ki ê cho athế tơmâng tơdroăng ki tơdjêp kơpong; kong pơlê; tơmâng ngăn tơdroăng ki xúa xơrô COVID, ôh ti xê to rak vế tơdroăng tung la ngiâ xơrô COVID a troăng ngăn ki xiâm.
Pôa Phạm Minh Chính, Ngế pro xiâm hnê ngăn tơnêi têa pơkâ thế:
“Séa ngăn tung tơdroăng ki ai khât a kong pơlê lôu péa tiô troăng hnê mơhno dêi Khu xiâm ngăn pơkeăng ƀă khăm pơlât, lôu péa ki hbrâ mơdât tro, vâ kuăn pơlê châ cheăng kâ, kuăn pơlê châ prôk lăm. Môi tơdroăng ki mê cho: 5K + vaccine + kong ngê̆, mê nếo ki hlê plĕng dêi kuăn pơlê. ‘Nâi nhên ivá rơkê kố ƀă mơhnhôk xúa tơtro ƀă tơdroăng ki ai khât la athế tung tơdroăng ki hnê mơhno tơdjuôm vâ ví tơdroăng ki pro ôh tá tơniăn, ví tơdroăng ki pro xơpá”.
Rơtế amê, Chin phuh mơnhên, troăng hơlâ hmâ tơtro ƀă pơreăng athế ngăn tung tơdroăng pơkâ “Ngăn pơkeăng cho xiâm, tíu xiâm; Cheăng kâ cho tíu ngăn; ivá; Hlá mơ-éa, khoa hok, kong ngê̆ cho tơdroăng ki xiâm; Tơniăn kal kí, pơlê pơla cho kal, đi đo; Vaccine, pơkeăng ƀă ki hlê plĕng dêi kuăn pơlê cho ivá ki kơhnâ; Tơniăn vâ mơjiâng pro kế tơmeăm; mơjiâng pro athế tơniăn”. Ôh ti xê pro xơpá ‘na cheăng kâ, hên khu mơdró kâ, khu ki rơkê xuân ngăn kố cho troăng hơlâ kum mơdêk ivá kâi trâng – rĕng ăm tơdroăng cheăng tơnêi têa ‘mâi mơnhông, tung pơla tá hâi ‘nâi nhên hơnăm ki lâi pơreăng kâi châ hbrâ mơdât.
Pôa Nguyễn Quang Huân, kăn Kuô̆k hô̆i hneăng má 15, kăn phŏ hnê ngăn Khu mơdró kâ kâ Việt Nam tối nhên:
“Pâ pôa pin tung chal tơplâ xơpá môi tiah mê, mê ối tơmiât pơtroh ngế ki lăm a kong têa ê vâ hriâm vâ xo ah hmôi hơniâplĕm mơjiâng tơdroăng cheăng kâ. Môi rôh tơplâ 20 hơnăm ối tơmiât môi tiah mê. Nôkố pơreăng bu 1,2 hơnăm, tâng bu séa ngăn to tơdroăng ki hbrâ mơdât pơreăng, ôh tá tơmiât troh mơnhông mơdêk cheăng kâ, klêi kơ’nâi ai pơreăng môi tiah lâi? Nah pin tí tăng xêh gá phá, nôkố cho tơrŭm tâi tâng plâi tơnêi.
Tâng vâ tơdroăng ki tê mơdró mê tro pơtê, mê vêh pêi nếo gá kô xơpá. Mê, apoăng pin tơmiât mơni kô kâi hbrâ mơdât pơreăng-ăm vêh a kơxô̆ 0, kố nah Ngế pro xiâm hnê ngăn tơnêi têa hiăng ai tơdroăng ki tối nhên cho athế rêh ối ton, môi tuăn mơnhông cheăng kâ tung rôh ki ai pơreăng. Tơmiât kô pro hiâm mơno hbrâ mơdât pơreăng ki phá tơ-ê; ivá châ chăn dêi kuăn pơlê xuân cho tơdroăng ki kal tâ mâu kế tơmeăm ki ê, la athế mơjiâng tơdroăng cheăng kâ”.
Tơchĕng tơmiât ƀă tơdroăng ki ôh tá tơniăn dêi tơnêi têa, tơdroăng ki châi heăng dêi kuăn pơlê, ôh ti xê ngăn tung hiâm mơno ôh tá vâ hmâng sap ing tơdroăng ki ai khât, ôh ti xê ing mâu tối tơbleăng sap ing mâu khu xiâm, kơvâ cheăng, kong pơlê vâ mơ’no tối mâu tơdroăng ki hnê mơhno, pơkâ troăng hơlâ – teăng hơ’lêh tơdroăng cheăng tung la ngiâ, Chin phuh hiăng loi nhuô̆m, tơmâng rơkong tơpui tối, pâ thế sap ing hên khu ki rơkê plĕng, khu mơdró kâ, teăng mâ mâu Khu tơrŭm ƀă hên ki ê vâ rĕng tơleăng mơnhên mâu tơdroăng ki xơpá, tơvâ tơvân, tíu ki xơpá mơdât mơjiâng pro, tê mơdró, kơdroh hên kơxô̆ khu mơdró kâ, khu pêi cheăng tơrŭm, rơpŏng tê mơdró pơtê tê mơdró, pơtê hlô̆ng hlối, xua tơdjâk sap ing pơreăng kân.
Vâ chê 700 hâi hbrâ mơdât pơreăng cho ivá vê ngăn hiâm mơno – cho “on pơloăng mêa,xơpá pơloăng ivá”, cho tơdroăng tơrŭm, tơdjuôm ivá, môi hiâm mơno – “tŏng kum dêi pó” dêi Đảng, Tơnêi têa, kuăn pơlê ƀă mâu khu mơdró kâ – khu tê mơdró. Rôh hbrâ mơdât pơreăng kân COVID-19 a tơnêi têa pin hiăng pêi pro mâu tơdroăng ki tơƀrê, la ‘na ngiâ xuân ối ai hên tơdroăng xơpá, pơloăng mơnúa, kal hmâ rơkê dêi tâi tâng khu pơkuâ tơdroăng kal kí.
Tâng tâi tâng rơtế mơ-eăm, kơdo pêi pro mâu troăng hơlâ tơdâng tơ’mô, rơkê plĕng – châ tơdroăng ki hnê mơhno rơkê sap ing Đảng, Chin phuh, “tơdroăng pơkâ pêi péa tơdroăng” mơni kô tơƀrê khât – cheăng kâ, rêh ối pơlê pơla tơnêi têa kô rĕng pêi pro châ tơdroăng ki loi tơngah!
Chu Thúy Ngà-Phó Trưởng phòng-Ban Thời sự
Katarina Nga tơplôu ƀă tơbleăng
Viết bình luận