VOV4.Xơ Đăng - Tơdroăng hơ’muăn “Tăm Klâi huăn kái” dêi kuăn ngo Rơđế cho vâ hơ’muăn ‘na môi ngế rơtăm klâi pêi cheăng ƀă chêng kŏng, la púi châ kro mơdrŏng môi tiah mâu ngế pêi cheăng kơhnâ. Mơhé ti mê, ngế rơtăm hiăng chiâng kro mơdrŏng khât ƀă tơdroăng pêi cheăng ôh tá môi tiah mơngế ki ê.

VOV.Xơ Đăng

VOV.Xơ Đăng

VOV.Xơ Đăng - Ton rôh nah, mơngế Rơteăng rêh ối tung kiâp hmối măng muât, ôh tá hlê ki klâi ‘na tơdroăng rêh ối pá gong. Môi ngé kơdrâ tăng hlo troăng rêh ối bâ eăng, po troăng hơlâ djâ tơdroăng rêh ối nếo pơla kong kế kân rơdâ. Kơnôm ai xeăng mơhno djâ ƀă mâu hmui veăng kum, vâi hiăng tăng hlo ‘noăng báu kơnía, pơxiâm ing mê vâi hiăng ‘nâi pêi chiâk chói báu, pro hngêi, ‘nâi tơmiât pêi cheăng kâ. Tơkâ luâ tơdroăng pơloăng mơnúa, mơngế Rơteăng hriâm tơdroăng nhoăm ‘noăng báu cho vâ pơtih tơdroăng phâi tơtô, ƀă đi đo hbrâ rơnáu kơ mâu ki ‘mêi kơneăm, mơnhâu pro ôh tá tơniăn tung tơdroăng rêh ối kuăn pơlê.

VOV.Xơ Đăng - “Apía ro kong” cho môi tơdroăng hơ’muăn ki ro dêi kuăn ngo Bru - Vân Kiều, vâ tối ‘na túa lĕm tro, loi tĭng ƀă ki lĕm tro dêi hdroâng kuăn ngo kơpong kong ngo Trường Sơn. Tơdroăng mê cho vâ hơ’muăn tối ‘na môi ngế droh lĕm rơduăng, khên tơnôu, tơdế cho mơngế, tơdế cho ro kong - hlối lĕm têm rơpiât. Apiá mê vâ pơtih cho tơdroăng kơdô mơ-eăm, mơhé lơ vâ hlâ vâ rêh, laga, xuân ai tuăn pâ khât kơ pơlê pơla, hlối hmâ ƀă kong kế ƀă kuăn mơngế.

VOV.Xơ Đăng - Tơdroăng xôi kiâ “Pah Nâng ki kân” dêi hdroâng Jarai cho vâ hơ’muăn tối ‘na Tăm Rit kuăn tê nôu pâ ƀă Jâ Pôm ki kơtiê, xahpá, tơdrăng kơnôm châ Pah Nâng Xeăng tŏng gum mê rơpŏng jâ chiâng kro mơdrŏng. Khu Xeăng tŏng gum mơngế kơtiê xuân cho tơdroăng ki hmâ tâng tối hên tung mâu tơdroăng hơ’muăn dêi mâu hdroâng kuăn ngo a Trường Sơn-Tây Nguyên ƀă xuân cho hiâm mơno pói rơhêng vâ dêi kuăn pơlê chal krâ nah vâ ai tơdroăng rêh kâ ối lĕm niân tâ. Tơdroăng hơ’muăn mê xuân vâ pơtâng tối ai pêi cheăng ‘nôi nếo ai kế kâ, mâ ta rơhăm git kơ tơmeăm vâi, ah kô chiâng trâm tơdroăng xahpá kân.

VOV.Xơ Đăng - Miếo prế Klá-péa to kuăn kiâ ki châ kân, châ kŭn ƀă ai ivá pơrá phá dêi pó, laga, prế cho nhŏng o tung môi hdroâng hdrê. Tơdroăng hơ’muăn kố ga cho vâ mơhno tối tơdroăng ki tơpeăng tơtŭng dêi pó, mâu tơdroăng ki pá, rế hêng krôu há la rế hêng tó há, la ai môi tơdroăng ki mơ’nui lui ah ga chiâng ro tơviah nếo.

VOV.Xơ Đăng - Ing môi ngế kuăn kơnốu ki kơtiê, Y Nhuăt hiăng chiâng pơtáu kro mơdrŏng, ai hnoăng kân tung tơdroăng cheăng. La ai tơdroăng ki ‘ló mơjo pâ, tơdroăng kro mơdrŏng ‘na kế tơmeăm cho hiâm mơno ki ‘nâi hơ-ui gum ƀă kuăn pơlê. Tơdroăng hơ’muăn ‘na Tăm Y Nhuăt, ôh ta xê to tơdroăng ki pơhlêh rêh ối, pêi cheăng ki hil tơviah, mê ối cho ƀai mơhriâm ki mơhnhôk thế ai hiâm mơno kơdo mơ-eăm ƀă ai tuăn mơno ‘nâi mơjo pâ, đi đo châ mơngế Rơđế hơ’muăn tối, kơdeăn hâk.

VOV.Xơ Đăng - Tơdroăng xôi kiâ “mŏng kơtôu plâi tuâk” cho vâ hơ’muăn tối ‘na on veăng ki hdrốu, la kơ’nâi mê, kơnôm châ Xeăng hơ-ui gum ăm prế ai môi ngế kuăn kơnốu hâu nguăn. Nôu ga hía, ngế pâ ga krôu bê ta troh puâ mâ, la xuân ối kơdo mơ-eăm pêi cheăng vâ păn roăng, rak ngăn dêi kuăn chiâng mơngế ki rơkê. Klêi kơ’nâi kuăn kơnốu hiăng chiâng kăn pơkuâ ngăn tơring ƀă xo mế, prế rêh ối lĕm khât ƀă dêi pâ, la xua lối kơ mơjo tơmeăm, prế hiăng xo kơtôu plâi tuâk vâ pro mŏng, ăm dêi pâ i kâ. Kơnôm ai cháu mê prế nếo ‘nâi dêi tơná pro mŏng kơtôu plâi tuâk ăm dêi pâ i kâ hmê cho ôh tá hâu nhoăm kơ vâi krâ. Tơdroăng hơ’muăn mê cho vâ tối pơchân ăm tâi tâng pin môi tơdroăng, dế rêh ối a rŏng tơnêi athế đi đo ‘nâi mơnê nôu pâ, athế nguăn, hâu, nhoăm, ai hnoăng păn roăng, rak ngăn vâi kơdrâi, pêi p

VOV.Xơ Đăng