VOV4.Sêdang - Kơxo lơ 18/10, tơdroăng ing Tíu xiâm mơdât pơreăng CDC Dak Lak tối ăm ‘nâi, tung pơlê kong kơdrâm Ƀuôn Ma Thuột nếo châ hlo môi tíu pơreăng xông tâ tú tung pơlê pơla a kơchơ xiâm pơtroh kế tơmeăm Tân Hòa, bêng Tân Hòa, pơlê kong kơdrâm Ƀuôn Ma Thuột ƀă 12 ngế ai yương tĭnh ƀă SARS-CoV-2. Pơtối mê, a hâi lơ 17/10, ngoh P.M.T, 48 hơnăm, ối a troăng Xô Viết Nghệ Tĩnh, pơlê kong kơdrâm Ƀuôn Ma Thuột, cho ngế xui tơmeăm a kơchơ xiâm pơtroh kế tơmeăm Tân Hòa troh Tíu xiâm khăm pơlât bêng Tân Hòa khăm ngăn test rĕng pơreăng mê ăm hlo yương tĭnh ƀă SARS-CoV-2.

Khu ƀok thái pơkeăng pro test rĕng ăm mâu ngế tê mơdró a kơchơ xiâm pơtroh tơmeăm

Klêi kơ’nâi khăm ngăn ƀă Realtime Rt-PCR mơnhên yương tĭnh ƀă SARS-CoV-2. CDC  Dak Lak hiăng tơrŭm rơtế Tíu xiâm khăm pơlât bêng Tân Hòa tơkŭm ti tăng xiâm kối, xo mơheăm khăm ngăn ăm mâu ngế ki ối achê ngế tro tâ pơreăng. Troh 2 chôu kơxo lơ 18/10, khu ƀok thái khăm pơlât hiăng tôe xo têa môh, khăm ngăn test rĕng ăm lối 500 ngế tê mơdró a kơchơ xiâm pơtroh tơmeăm ƀă mâu ngế ki ối achê ƀă ngoh T.

Klêi test rĕng hiăng châ hlo tơ’nôm 11 ngế yương tĭnh ƀă SARS-CoV-2, tung mê ai 6 ngế cho nhŏng o dêi ngế tro tâ pơreăng ƀă 5 ngế cho ngế tê mơdró a kơchơ xiâm pơtroh tơmeăm.

A Sa Ly tơplôu ƀă tơbleăng