VOV4.Sêdang - Mâu rôh tro tơdjâk dêi pơreăng COVID-19 hiăng tơdjâk ôh tá iâ troh tơdroăng cheăng kâ rêh ối pơlê pơla a kong pơlê Dak Lak. La ƀă tơdroăng ki khŏm mơ-eăm dêi Đảng ƀô̆, khu kăn pơkuâ, kuăn pơlê, Dak Lak hiăng pêi châ hên tơdroăng tung hnoăng cheăng hbrâ mơdât pơreăng. Mâu tơring, cheăm tung kong pơlê xuân rế hía rế hơ’lêh tơdroăng hmâ rơkê vâ tơniăn, ‘mâi mơnhông cheăng kâ, rak tơniăn tơdroăng rêh ối pơlê pơla tung la ngiâ.

Cho môi tung mâu cheăm ai 22 ngế tro tâ COVID-19 a thôn 6 ƀă thôn 7 cheăm Vụ Bổn, Krông Păč tung roh pơreăng roh má 4, laga ƀă hiâm mơno pêi pro hnê mơhno dêi Ngế pro xiâm hnê ngăn Chin phuh: ‘’Rêm cheăm, bêng cho môi kơnâng xŏn, rêm khu, ki rơhêng vâ tối cho tôh hbrâ mơdât COVID pơlê pơla cho tíu gak mơdât apoăng’’, Đảng ƀô̆ khu râ kăn pơkuâ ƀă kuăn pơlê cheăm Vụ Bổn hiăng rĕng mơdât tơdroăng pơreăng xông tâ tú, kâi mơdât pơreăng, pro tơ’lêi hlâu ăm tơdroăng cheăng kâ – rêh ối pơlê pơla pơtối mơnhông mơdêk.

Pôa Lê Viết Nhượng, Kăn pơkuâ Đảng ŭy, Kăn pơkuâ hnê mơhno hbrâ, mơdât pơreăng COVID-19 cheăm Vụ Bổn, tơring Krông Pač, kong pơlê Dak Lak tối ăm ‘nâi:

‘’Cheăm hiăng xo tơdroăng hbrâ, mơdât pơreăng cho tơdroăng kơjo má môi. Troăng tơmiât pêi ‘na hnê mơhno ‘na pơkâ péa pêi xôh cho rế hbrâ, mơdât pơreăng laga tơdrêng amê xuân rế tŏng kum ăm pêi kâ mơnhông mơdêk. Tung pơla kố nah, pêi pro hnê mơhno dêi Ngế pro xiâm hnê ngăn tơnêi têa mê cheăm hiăng rah tŭm Khu hnê mơhno ƀă mơjiâng nếo Tíu xiâm hnê mơhno hbrâ, mơdât pơreăng ƀă hiăng tơ’nôm troăng hbrâ, mơdât pơreăng tung rơxông nếo. Tung mê ai tơdroăng pêi pro pơkâ pêi péa xôh, pro tơ’lêi hlâu ăm kuăn pơlê pêi pro’'’.

Kuăn pơlê Dak Lak thăm pêi cheăng kâ ƀă pêi tiô pơkâ kơtăng mâu pơkâ hbrâ mơdât pơreăng

A tơring Ea Hleo, kong pơlê Dak Lak hiăng châ hlo hên ngế yương tĭnh ƀă SARS-CoV-2, tung mê ai hên ngế yương tĭnh tung pơlê pơla pro tơdjâk troh tơdroăng pêi kâ, tê mơdró, mơ’no liăn cheăng ƀă tơdroăng rêh ối dêi kuăn pơlê. Ing tơdroăng ki tô tuăn, hơkăng apoăng, troh nôkố ƀă tơdroăng ki veăng kơtăng dêi khu cheăng kal kí rơtế ƀă tơdroăng ki mơ-eăm dêi mâu râ kuăn pơlê, tơring Ea Hleo hiăng hbrâ mơdât tơdroăng pơreăng xông tâ tú, tơdrêng amê, pêi pro tơƀrê hên pơkâ mơnhông cheăng kâ – rêh ối pơlê pơla 9 khế dêi hơnăm 2021.

Troh nôkố, tơring hiăng krếo thế, mơhnhôk khĕn châ 21 tơdroăng tơkêa mơ’no liăn cheăng tung kong pơlê ƀă tâi tâng kơxô̆ liăn tiô tối hdrối vâ chê 2.500 rơtal liăn. Xua mê, rơtế ƀă tơdroăng tơniăn hbrâ mơdât pơreăng, mê hnoăng cheăng rak krá tơniăn tơdroăng kal kí, mơnhông mơdêk cheăng kâ dế châ khu cheăng kal kí, kuăn pơlê ƀă khu tê mơdró rơhêng vâ ‘nâi plĕng. Pôa Vũ Đình Tân, Kăn pơkuâ Kŏng ti tơlo liăn mơjiâng pro on tơhrik kơtâu ƀă khía Trung Nam – Dak Lak 1, khu tê mơdró ai tơdroăng tơkêa bro dế châ pêi pro a tơring Ea Hleo tối ăm ‘nâi:

‘’Nôkố, tơdroăng tơkêa bro dế rơnó hên tơdroăng cheăng dêi tơdroăng pơto ƀă krâ. Ƀă tơdroăng mơjiâng mê peăng kŏng ti hiăng hbrâ pêi pro, ki rơhêng vâ tối cho mâu tíu ki kal mê hiăng tôh ƀê-tong tâi tâng. Xua mê, tơdroăng kong prâi tơdjâk klâi mê tơdroăng mơjiang pro ƀă krâ. Bu ai tơdroăng cho nôkố, tơdroăng pơreăng xông tâ tú môi tiah kố mê peăng kŏng ti hiăng hbrâ tơpui ƀă mâu ngế ki rơkê kong têa ê pro mâu mơ-éa rĕng troh a Việt Nam ƀă pêi pro tơdroăng klâ kơtăn, tơniăn mâu pơkâ dêi Chin phuh pơkâ mơ’no. Rơtế amê, mâu kăn ƀô̆, kŏng nhân viên dêi ŏng ti a tíu pêi cheăng mê tâi tâng hiăng hlê plĕng cho lo lăm a tíu pêi cheăng mê vêh a tíu ối dêi tơná pêi pro tơdroăng tối ăm ƀok thái pơkeăng ƀă hía hé’’.

Tiô pôa Phạm Minh Tấn, kăn phŏ hnê mơhno má môi Tĭnh ŭi kong pơlê Dak Lak tối: Pơreăng kân COVID-19 xông tâ tú ó hiăng tơdjâk ó troh tơdroăng rêh ối dêi kuăn pơlê xuân môi tiah tơdroăng mơnhông mơdêk tơdjuôm dêi lâp pơlê pơla, tung mê ai kong pơlê Dak Lak. Laga, ƀă tơdroăng ki khŏm mơ-eăm dêi tâi tâng Đảng, tâi tâng kuăn pơlê, troh nôkố tơdroăng pơreăng xông tâ tú tung kong pơlê hiăng, dế châ mơdât ƀă troh tah. Mâu pơkâ ‘na cheăng kâ – rêh ối pơlê pơla 9 khế pơla kố nah xuân hiăng tâk tâng pơchông ƀă roh kố hơnăm 2020.

Mơdêk cheăng kâ dêi kong pơlê 9 khế châ 5,28%. Tâi tâng xo hnoăng liăn ngân tơnêi têa tung kong pơlê châ 5.500 rơtal liăn, ƀă 74,45% tiô tối hdrối, Hô̆i đong kong pơlê pơcháu, tâk 3% tâng pơchông ƀă roh kố hơnăm nah. Laga, vâ pêi pro ƀlêi trâng mâu hnoăng cheăng hơnăm 2021 tiô pơkâ dêi Tĭnh ŭi hiăng pơkâ mơ’no, tung la ngiâ, mâu khu râ kăn pơkuâ hnê ngăn cheăng Đảng, khu râ kăn pơkuâ kong pơlê, khu râ; mâu kơ koan, tíu cheăng, tơring tung kong pơlê xuân pơtối pêi tiô tơdroăng nôkố, pơkâ mâu troăng pêi, pơkâ pêi, tơkŭm pêi pro ƀeăn ƀĕng rơkê, châ tơ-ƀrê ƀă tơdroăng khŏm mơheăm hên, hlối hbrâ mơdât pơreăng ƀă mơnhông cheăng kâ – rêh ối pơlê pơla, tơniăn gak kring cheăng lêng.

Pôa Phạm Minh Tấn, Kăn phŏ hnê mơhno má môi Tĭnh ŭi kong pơlê Dak Lak tối nhên:

“Pơreăng kân COVID-19 tâ tú vâ chê 2 hơnăm hiăng tơdjâk kân troh mơnhông cheăng kâ – rêh ối pơlê pơla, laga pin xuân đi đo pêi pro hnoăng ki pơxúa, ki pơxúa tơxâng dêi kuăn pơlê ƀă đi đo pêi pro tro tơdroăng hnê mơhno dêi Tơnêi têa, dêi Chin phuh cho pêi pro hnoăng cheăng ‘’péa xôh’’, cho rế tơkŭm mơnhông mơdêk cheăng kâ – rêh ối pơlê pơla, rế tơniăn hbrâ mơdât pơreăng COVID-19 ƀă mâu troăng tê mơdró ki ê. Ôh tá tơngôu, thế kơchăng vâ pro tơ’lêi hlâu má môi vâ pin tơkŭm mâu khu râ cheăng vâ tơniăn kal kí, mơnhông mơdêk cheăng kâ – rêh ối pơlê pơla, tơniăn gâk kring cheăng lêng, mơjiâng khu cheăng kal kí tung lâp kong pơlê’’.

Ƀă khŏm mơheăm ƀlêi trâng “pơkâ péa xôh” ‘na hbrâ, mơdât pơreăng COVID-19 châ tơ-ƀrê ƀă kêi đeăng tâi tâng mâu pơkâ pêi ‘na mơnhông mơdêk cheăng kâ – rêh ối pơlê pơla tung hơnăm 2021, Đảng ƀô̆, khu râ kăn pơkuâ kuăn pơlê mâu hdroâng mơngế kong pơlê Dak Lak dế hbrâ chôa ‘lâng pơ’lêh tơdroăng rêh ối tiô Pơkâ tơbleăng pơkâ pơtân ‘’Kâi trâng tơniăn, ƀeăn ƀĕng tơkê, mơdât pơreăng COVID- 19 châ tơ-ƀrê’’.

Hương Lý chêh

A Sa Ly tơplôu ƀă tơbleăng