VOV4.Sêdang - A kong pơlê Dak Lak nôkố ai vâ chê 4 rơpâu ngế kơdrâi cho ƀok thái pơkeăng, thái pơkeăng, mâu ngế ki ngăn ‘na pơkeăng ƀă khăm pơlât. Tung hneăng tơplâ mơdât pơreăng COVID-19, cho mâu ngế ki rêm hâi khăm pơlât, rak ngăn mâu ngế ki tamo châi mê tơ’lêi trâm tơdroăng xâu xía, ing mâu ngế ki pêi hnoăng cheăng ăm pơlê pơla kố, lơ tung mâu kơbong ki séa ngăn pơreăng, lơ khăm pơlât, păn roăng, rak ngăn mơngế tamo châi xua tâ pơreăng COVID-19 ƀă hên hĕng mâu tơdroăng cheăng ki ê, vâi pơrá pleăng dêi tâi tâng ivá, tuăn ngôa ki rơkê, tah lôi mâu tơdroăng krê tơná vâ tơniăn tuăn pêi dêi hnoăng cheăng tơná.

Vêh dêi ngi hngêi klêi kơ’nâi 1 khế pleăng dêi hnoăng cheăng lăm troh a Pơlê kong kân Hồ Chí Minh hbrâ mơdât pơreăng COVID-19, ƀok thái pơkeăng Trần Thị Lệ, Khoa ung Bướu, Hngêi pơkeăng kân Kơpong Tây Nguyên xuân ối préa tung hiâm mơno. Tíu nâ pêi cheăng cho kơpong ki pơlât mâu ngế ki tâ COVID-19 a Khoa Bệnh Nhiệt đới, Hngêi pơkeăng kân Chợ Rẫy. Mâu tơdroăng ki préa dêi mâu ƀok thái pơkeăng vâ mơ-eăm tŏng rêh ăm mâu ngế ki tro tâ pơreăng, mâu hiâm ki ôh tá kâi piu dêi mâu ngế ki tâ pơreăng tá idrâp chuât ing mâu kơmăi Ecmo ƀă hên ki ê môi tiah mâu tơdroăng ki prôk hrá tâ, nâ tối:

“Mâu tơdroăng ki mê cho hmâ trâm rêm hâi, xuân hlo ai hên, ai môi ngế hlâ tung pơla ngin hiăng mơ-eăm pơlât mê tơkâ luâ mâu rôh ki trâm tiah kố tiah mê ngin ai tơdjuôm tơdroăng tơmiât lăm chu veăng kum la ngin xuân mơ-eăm, nôkố mâu ngế ki tâ pơreăng tiah mê pro ăm pin chiâng ai hiâm mơno ôh tá kâi chân mê tơdroăng ki pơlât kố ôh tá tơƀrê, mê ngin mơ-eăm tơkâ luâ vâ pơlât ăm mâu ngế ki tro pơreăng.

Pakĭng tơdroăng pơlât mê ngin xuân ối veăng tung tơdroăng ki tiâ mơnhên ‘na ivá ăm mâu ngế ki tro pơreăng mê ngin ối achê ƀă mâu ngế ki tro pơreăng, drêng mê ôh ti ối klâ kơtăn hngế pơla COVID lơ mâu kế ki lâi. Hên roh hlo mâu rơpŏng hngêi vâi ối a gong krếo phôn ƀă hmâng ƀok thái pơkeăng tơbleăng mê cho tơdroăng ki hiăng vâ hlâ lơ ngế ki tro pơreăng dế râ ó, ƀok thái pơkeăng râng phôn râng kŏng xuân châi heăng tung hiâm mơno ôh pá kâi tối, la klêi kơ’nâi mê xuân mơnhên ƀă tơdroăng ki ai khât”.

Mâu phôn krếo ki khéa hơ’nêng ƀă mâu rơpŏng hngêi mâu ngế ki tâ COVID-19

Ƀă nâ Trần Thị Thu Thủy, ngế ki cheăng séa ngăn têa môh ối tung Tíu xiâm ngăn pơkeăng pơlê kong kơdrâm Ƀuôn Ma Thuột tối, sap ing khế 5/2021 troh nôkố, cho mâu hâi ki ôh tá la lâi kâi piu tung hnoăng cheăng. Tơdroăng rêh ối a dêi rơpŏng hngêi, xuân môi tiah hâi khế dêi tơdroăng cheăng hiăng pro phá tơ-ê ing pơreăng COVID-19. Pơlê kong kơdrâm pơtối châ ‘nâi ai hên mâu ngế ta pơreăng tung pơlê pơla, ƀă pêi pro tơdroăng ki séa ngăn têa môh ăm tâi tâng kuăn pơlê, mâu vâi nâ athế hrăng plâ măng vâ toê xo têa môh séa ngăn vâ ‘nâi ngế ki tâ pơreăng:

“Ngin pêi cheăng ôh tá pơtê, ôh tá ai hâi khế pơtê ối ƀă rơpŏng hngêi. Drêng kăn pơkuâ krếo la lâi mê ngin hbrâ rơnáu ai mâ drêng mê, ƀă hnoăng cheăng rơpŏng mê ngin klâ xoăng hâi khế tê”.

Nâ Trần Thị Thu Thủy kal chôu ‘măn mâu kế tơmeăm drêng test rĕng ăm kuăn pơlê

Rế lêi dêi hmân ếo truâ rak vế châ chăn ƀă kên pâng môh rơkong klêi kơ’nâi 7 chôu pơtối hlối ‘nân tung labo séa ngăn SARS - CoV - 2, nâ Trần Thị Nguyên Hằng, ngế cheăng ‘na Khoa séa ngăn um ƀă séa ngăn mâu tơdroăng, Tíu xiâm séa ngăn châi tamo kong pơlê Dak Lak mê vêh xâp nếo hmân ếo khăm pơlât xua châ xo têa môh ki vâ séa ngăn kal pêi pro tơdrêng.

“Pêi hnoăng cheăng kố á xuân ‘nâi drêng pin hrăng hên măng môi tiah mê ƀă pêi cheăng pơtối môi tiah mê gá kô tơdjâk troh ivá, la á hlo mâu on veăng vâi pin dêi kuăn tơxĭn vêh sap ing hngế tơbrêi tơbrêh môi tiah mê, prôk troăng hngế trâm kong mêi khía to rơxế ki hiăng tơ’nhiê a troăng môi tiah mê  tơdroăng ki á trâm, á pêi akố bu cho tơdroăng ki kŭn tê, ôh tá chiâng tối.

Á tơmiât tơdroăng ki hlâ rêh dêi tơná pro pơxúa tơniăn lĕm ƀă hmiân tuăn ăm rêm ngế mê á  mơ-eăm tơkâ luâ.

Mâu vâi kơdrâi Khoa séa ngăn ƀă séa ngăn um tăng ‘nâi tơdroăng, Tíu xiâm séa ngăn châi tamo kong pơlê Dak Lak pêi cheăng plâ hâi tung tíu ki ôh tá phuâng lĕm

Pôa Nay Phi La, Kăn pơkuâ Khu ngăn pơkeăng ƀă khăm pơlât kong pơlê Dak Lak ăm ‘nâi, nôkố khu ki cheăng ‘na khăm pơlât dêi kong pơlê lối 6 rơpâu ngế, tung mê ai lối 60% cho vâi kơdrâi. Tung rôh hbrâ mơdât pơreăng COVID-19, mâu ngế cheăng cho vâi kơdrâi, ôh ti xê to rơkê ‘na hnoăng cheăng, kơhnâ, krâu tung tơdroăng cheăng, mê ối mơdêk nhên hiâm mơno têm rơpiât drêng pêi dêi hnoăng cheăng. Kơnôm ai vâi, mâu ngế ki châ toê xo têa môh séa ngăn pơreăng, mâu ngế ki tro pơreăng châ rak ngăn, pơlât pơrá hlo hmiân tuăn, tơrŭm hên tâ. Mâu hâi khế pêi dêi hnoăng cheăng hbrâ mơdât pơreăng COVID-19 ƀă vâi kơnốu hiăng cho tơdroăng ki xơpá khât, mê ƀă vâi kơdrâi gá rế tơpá hên tâ nếo:

“Drêng mâu vâi nâ o veăng tung hbrâ mơdât pơreăng kố iâ hên xuân tơdjâk troh túa rêh ối, pêi cheăng. Vâi pơtê tâi mâu tơdroăng cheăng rak ngăn kuăn ‘nĕng, rơpŏng hngêi vâ kum ăm hnoăng cheăng hbrâ mơdât pơreăng, kố cho tơdroăng ki tơmâng ngăn dêi kơvâ ngăn pơkeăng ƀă khăm pơlât ƀă mâu vâi nâ o.

Tung la ngiâ kố ah, kơvâ ngăn pơkeăng ai kơthô krếo thế mâu khu tơrŭm, mâu ngế krê ai hiâm mơno mơhnhôk mâu vâi nâ o tung la ngiâ. Xua kố cho mâu vâi nâ o athế pleăng dêi hnoăng hên má môi tung rôh pơreăng COVID-19 tâ tú rôh kố”.

Tung tơdroăng hbrâ mơdât pơreăng COVID-19, mâu vâi kơdrâi cho ƀok thái pơkeăng xuân dế hâi măng kơdo mơ-eăm, rak tơniăn tíu hbrâ mơdât pơreăng rơtế ƀă mâu khu ki hbrâ mơdât pơreăng vâ kum ăm tơdroăng rêh ối vêh tơniăn tiah hmâ nếo ăm kuăn pơlê.

Nam Trang chêh

Katarina Nga tơplôu ƀă tơbleăng