VOV4.Sêdang - Mơhé hơnăm hriâm 2021 – 2022 hiăng tơkâ hluâ vâ chê tơdế hneăng hriâm má 1, laga troh nôkố, xuân ối hên hok tro dêi Dak Lak kreăng a mâu kong pơlê ki ê tá hâi chiâng vâ vêh hriâm ƀă xuân ai hên hok tro a mâu kong pơlê ki ê xuân thế hriâm pơtân a Dak Lak. Vâ tơniăn hnoăng pơxúa hriâm tâp dêi hok tro, kơvâ hnê hriâm – Hnê mơjiâng Dak Lak dế pro tơ’lêi hlâu má môi vâ mâu vâi o ôh tá tot pơtê tung tơdroăng hriâm tâp a tíu ki lâi.

Dak Lak pro tơ’lêi má môi ăm hok tro ‘’tro kreăng’’ xua pơreăng COVID-19

Tiô Khu pơkuâ hnê hriâm ƀă Hnê mơjiâng tuăn ngôa rơkê kong pơlê Dak Lak, klêi kơ’nâi 1 khế sap ing hok tro lâp kong pơlê hiăng mot hơnăm hriâm nếo, troh nôkố, xuân ai 1.270 ngế hok tro mâu râ dêi Dak Lak tá hâi chiâng vâ vêh hriâm ƀă lối 660 ngế hok tro mâu kong pơlê dế tiô hriâm pơtân a mâu hngêi trung a Dak Lak. Ƀă mâu ngế hok tro ki kố Khu pơkuâ hnê hriâm ƀă hnê mơjiâng tuăn ngôa rơkê hnê mơhno mâu hngêi trung hbrâ tơdah, ‘mot tung lâm hriâm ki tơtro ăm hok tro, pro tơ’lêi hlâu vâ mâu vâi o veăng hriâm mơhé hriâm mơ’no tơdrêng tung um tiô troăng măng internet lơ hriâm mơ’no tơdrêng tung um tơvi.

A Sa Ly tơplôu ƀă tơbleăng