VOV4.Sêdang - Tơdroăng ăm ‘nâi ing kơvâ ngăn pơkeăng Dak Lak, tung 24 chôu (riân ing 16h hâi lơ 21/10 troh 16h hâi lơ 22/10) kong pơlê Dak Lak ai 174 ngế tâ tú SARS-CoV-2 tung lâp kong pơlê. Mê a pơlê kong krâm Ƀuôn Hồ ai 64 ngế yương tĭnh ƀă SARS-CoV-2 , tơring Čư Kuin ai 29 ngế, tơring Krông Ƀuk ai 25 ngế, tơring Krông Ana ai 13 ngế, tơring Čư Mgar ai 12 ngế, pơlê kong kơdrâm Ƀuôn Ma Thuột ai 11 ngế.

Tơdroăng ki tô tuăn cho tung 174 ngế nếo tâ tú mê, ai 83 ngế châ ‘nâi tung kuăn pơlê. Mâu tơring cheăm bêng môi tiah pơlê kong krâm Ƀuôn Hồ, tơring Krông Ƀuk, Čư̆ Kuin, pơlê kong kơdrâm Ƀuôn Ma Thuột ... pơtối ‘nâi tâ tú tung kơpong kuăn pơlê ối. Hlo pơtối tâ tú hên tung kuăn pơlê, kơvâ ngăn pơkeăng Dak Lak dế mơ-eăm tơrŭm ƀă mâu kăn kong pơlê tơring cheăm bêng tí tăng xiâm tâ tú, khăm ngăn rơpâu ngế kuăn pơlê ki tơdjâk mâu ngế tâ pơreăng vâ châ ‘nâi F0, ví tâ tú pơreăng. Pakĭng mê, tơbleăng mâu tơdroăng pêi cheăng vâ kum tơniăn tơdroăng rêh ối dêi kuăn pơlê a kơpong klâ krê, kơpong hnhâng kơxái oh tá ăm prôk lăm.

Gương tơplôu ƀă tơbleăng