VOV4.Sêdang -Tiô Khu ngăn ‘na chiâk deăng ƀă Mơnhông thôn pơlê kong pơlê Dak Lak, kong mêi kân hên hâi pơla hdrối kố nah hiăng tro têa lân lu ƀă tơ’nhiê hên kế tơmeăm a tơring Ea Súp, Ƀuôn Đôn, Ea Hleo. Nôkố, khu kăn pơkuâ mâu tơring rơtế ƀă kuăn pơlê dế ‘mâi mơnhông kế tơmeăm klêi kơ’nâi kong mêi têa lân lu vâ rĕng tơniăn tơdroăng rêh ối. A tơring tơkăng kong Ea Súp ai 390 toăng hngêi tro têa lu, lối 2 rơpâu ha klâng báu, prá alâi tro tro têa lu, hên troăng prôk troh a cheăm tro têa lu ó ƀă hên tíu kuăn pơlê rêh ối xuân tro têa lu.

Têa lân lu tung lâp lu hên cheăm a tơring Ea Súp

Rơtế ƀă hnoăng cheăng ‘mâi rơnêu klêi kơ’nâi kong mêi, têa lân lu pro tung mâu hâi hdrối kố nah, mâu tơring, cheăm pơtối tơbleăng mâu troăng hơlâ hbrâ ví khía mơhot têa kân lân lu tiô tơdroăng pơkâ “4 tơdrêng”. Malối,cho xing xoăng khu ngế ƀă mâu rơxế gak ngăn a mâu kơpong ki ki tơ’lêi trâm xía vâ vâ hbrâ rơnáu ƀă tơdroăng tâng lơ ai, ‘mâi xĕn mâu rơpŏng ki mơni kô tơ’lêi tro têa lân lu troh a kơpong ki a ‘ngêi.

Katarin Nga tơplôu ƀă tơbleăng