VOV4.Sêdang - Khu kăn pơkuâ kong pơlê Gia Lai hiăng pơkuâ Hneăng hôp mơ’no tơdrêng tung um tơvi lâp kong pơlê [a\ mâu tơring, pơlê kong krâm, pơlê kong kơdrâm tơpui tơno tơdroăng mơjiâng kế tơmeăm khoăng 3 khế apoăng hơnăm 2020. Xông tơpui a Hneăng hôp, Khu kăn pơkuâ kong pơlê pơkâ mâu kơ koan tơbleăng, khu mơ’no liăn pêi pro tơdroăng tơkêa bro mơnhên mâu tơdroăng pá puât, tơvâ tơvân [a\ pơkâ mâu troăng pêi ki nhên vâ thăm pêi pro re\ng tơdroăng mơjiâng pro drêng pơrea\ng Covid 19 dế xông tâ tú ó.

Troăng tơmiât pêi pro hnê mơhno dêi khu râ kăn pơkuâ kong pơlê cho: Tơku\m kơxo# liăn vâ hbrâ mơdât pơrea\ng châ tơ-[rê laga thế tơniăn mâu tơdroăng mơjiâng pro xuân môi tiah tơdroăng pêi pro mâu tơdroăng kân, ki kal kum ăm tơdroăng cheăng kal kí, mơnhông cheăng kâ – rêh ối pơlê pơla dêi kong pơlê. Khu râ kăn pơkuâ kong pơlê tối: Tâng khu mơ’no liăn cheăng ki lâi ôh tá ai ivá mê thế pơtê mơ’no pro kế tơmeăm vâ hơ’leh ăm khu mơ’no liăn cheăng ki ê ai tu\m ivá vâ mơjiâng pro, tơniăn tro tiô pơkâ, tâng kal thế tơmiât troh ‘na mơngế pêi, tâng ngế pơkuâ mơ’no liăn cheăng ôh tá ai ivá pêi mê kô ăm ngế ki ê. Xua tơdroăng lôi hrá cho pro xôi [a\ kuăn pơlê drêng kơxo# liăn nâp hnoăng mơhá xúa tá hâi châ tơ-[rê.

A Sa Ly tơplôu [a\ tơbleăng