Tung hngêi kơmăi pêi cheăng dêi Kŏng ti veăng tơlo liăn pro meăm Thép Asean (Kơpong hngêi kơmăi Hòa Phú, kong pơlê Dak Lak), ngoh Lê Trung Hiếu rơtế ƀă pái ngế kơhnâ pêi ngăn dêi xiâm tíu pro meăm thĕp. Hdrối nah vâ pêi cheăng mê thế kal ai 5 troh 7 ngế, la klêi ngoh Lê Trung Hiếu hriăn pro klŏng kơmăi mơ’no ô-xy ki chiâng pêi cheăng xêh ăm kơmăi pro meăm thĕp, tơdroăng pêi cheăng a kơmăi bú kal 4 ngế.

“Tơdroăng cheăng mơ’no ô-xy mê pêi ƀă kŏng, kŏng nhân thế tâng achê kơmăi ki pôh meăm mê há, ‘mot klŏng mơ’no ô-xy a  kơmăi,  rơ-iô ‘nâng xua gá tô têi, kơdrêa on ki tơreăng ing meăm kô tro kơtĕng troh a mơngế. Ki khât gá, á tơmiât tơdroăng hriăn pro kơmăi ki vâ mơ’no mê xua ƀă kơmăi điê̆n, tơkŭm ƀă tơdroăng tiê po ing hơngế. Hiăng klêi, mâu nhŏng o kô chiâng tâng a tíu ki kơtăn hơngế iâ vâ tơniăn ăm kơmăi pêi cheăng xêh, hlối pơxúa, hlối ví ki rơ-iô”.

Kŏng ti veăng tơlo liăn pro Thép Asean nôkố ai 340 đoân viên, tơkŭm hôp a 2 tôh kong đoân. Tiô pôa Nguyễn Hữu Thống, Kăn hnê ngăn Kong đoân kŏng ti, tung kơvâ pro meăm thĕp, hriăn plĕng ki nếo ‘na kih thuât veăng ‘no hnoăng pêi tơdroăng ki kal gum kơdroh kơxô̆ liăn ‘no, mơnhông tơbrê tơmeăm pêi hlối lĕm. Khu mơdró đi đo mơhnhôk mơngế pêi cheăng thế hơ’lêh nếo, hriăn plĕng ki nếo vâ mơdêk tơbriât cheăng tê mơdró. Ing mê, hên kih sư, kŏng nhân hiăng ‘nâi hriăn pêi pro mâu tơmeăm nếo ai pơxúa; krê ngoh Lê Trung Hiếu ai 3 tơdroăng hriăn plĕng ki nếo cho ‘mâi pro kơmăi hrik têa ki pro túa mơjiâng meăm hbo gá kơdĭng têa, ‘mâi rơnêu nam châm điê̆n ƀă ‘mâi pro klŏng mơ’no ô-xy, hlối dế tăng hriăn pro kơmăi ki vâ pơdrâ ki eăng. Pôa Thông tối:

“Mâu tơdroăng hriăn plĕng dêi ngoh Hiếu hiăng veăng pro pơxúa kơdroh kơxô̆ liăn ‘no rôe tơmeăm pêi pro, mơdêk ki tơbrê dêi tơmeăm, mơdêk mơhno túa lĕm tro hơ’lêh nếo, ối kum khu mơdró  mơnhông krá ton”.

Tung pơla mê, ngoh Lê Trung Hiếu kơhnâ vâ ƀă tơdroăng pêi cheăng, ‘nâi hriăn plĕng tơdroăng ki nếo tung hngêi kơmăi, mê nâ H’Chuyên Niê, ƀă tơdroăng cheăng kúa chhá kơxu, xuân hiăng veăng ‘no hnoăng ki tơxâng, ai pơxúa a kơdrum loăng. Cho kong nhân dêi Nông trường kơxu Phú Xuân, ai 10 hơnăm hbrâ ƀă tơdroăng cheăng, Nâ H’Chuyên đi đo pê kêi tơdroăng cheăng. Nâ pêi châ tơƀrê hên tơdroăng cheăng ƀă vâ chê  20% tâng vâ pơchông ƀă tơdroăng rêh ối tơdjuôm. Nâ H’Chuyên ai tối:

“Á mơ-eăm riu kơxo má, lăm kơxo má há la hrá vêh tâ mâu kŏng nhân ki ê. Drêng kúa mê đi đo kơchăng, ôh tá kúa rế rĕng vâ ăm chá loăng pôi tá lo pa kong. Hơkê kúa hâi ki lâi xuân thế kơlĭng ăm heăn, mâu tơmeăm xúa môi tiah kế hdoăng, kơthung, kơxô vâ dâ chhá, kiềng lơ kơxái vâ kât xuân châ hbrâ rơnáu djâ tŭm”.

Lâp tung kong pơlê Dak Lak nôkố ai vâ chê 62 rơpâu ngế đoân viên kŏng đoân, tơkŭm hôp a lối 1.350 kŏng đoân cheăm. Mâu hơnăm hdrối kố nah, tơdroăng tơ’noăng pêi cheăng châ tơbleăng trâu rơdâ. Tơ’mot hên ngế đoân viên vâ pêi, ing mê, chiâng ai rơpâu tơdroăng hriăn plĕng ki nếo, ‘mâi hơ’lêh kih thuât, veăng pro rế hên  ki pơxúa tung pêi cheăng kâ, tê mơdró. Vâ mơhnhôk ăm hên ngế vâ pơ’lêh nếo, Liên đoân Lao động kong pơlê Dak Lak đi đo khĕn kơdeăn inâi, khĕn kơdeăn hlối teăm mơhá tơmeăm tơdrêng ƀă po rơdâ rế ai hên ngế rơkê. Pôa Nguyễn Phú Lập, Phŏ kăn hnê ngăn Liên đoàn Lao động kong pơlê Dak Lak ăm ‘nâi:

“Hơnăm kố, ƀă tơdroăng pêi cheăng hriăn plĕng ki nếo, Liên đoàn Lao động kong pơlê hiăng tơbleăng mâu pơkâ ƀă hlá mơ-éa hnê mơhno, pơtroh ăm kong đoân cheăm vâ hbrâ mơhnhôk, mơhá iâ ăm mơngế pêi cheăng pơtối mơ-eăm kơhnâ tơ’noăng pêi cheăng, chôa lâng mơjiâng cheăm bêng kong pơlê rế mơnhông tơbrê. Tung khế Kŏng nhân, ngin tơrŭm ƀă Khu xiâm ngăn mơngế pêi cheăng dêi kong pơlê , tơkŭm po “Hâi leh Kŏng nhân” a Kơpong hngêi kơmăi Hòa Hiệp (bêng Hòa Hiệp) a hâi lơ 5/5 ƀă kơxô̆ mơngế lối 3.000 ngế veăng. Tơngah hơnăm kố kôm ai hên liăn ‘no veăng kum hên tâ vâ mơhá ăm mơngế pêi cheăng”.

Tung tơdroăng hơ’lêh nếo ƀă pơ’lêh kơxô̆, mâu kŏng nhân môi tiah ngoh lê Trung Hiếu ƀă nâ H’Chuyên Niê dế mơhno ki kơnâ ƀă tuăn mơ-eăm hriăn plĕng tơdroăng ki nếo ƀă hnoăng cheăng pêi tơná. Sap ing hngêi kơmăi pro meăm thĕp troh nông trường kơxu, mâu tơdroăng ki hriăn plĕng ƀă mơ-eăm dêi vâi hiăng veăng mơdêk ki pơxúa tung pêi chiâk hlối hmâ ƀă tơdroăng pơkâ vâ tiô túa pêi cheăng nếo nôkố.