VOV4.Sêdang - Tiô Khu ngăn pơkeăng [ă khăm pơlât Gia Lai ăm ‘nâi, mâu hngêi pơkeăng tung kong pơlê, a tơring pơrá hiăng mơjiâng khu ki pêi pro tơdrêng tung hngêi pơkeăng, [ă pa gong hngêi pơkeăng vâ hbrâ mơdât pơreăng Covid-19. Hngêi pơkeăng kân kong pơlê, Hngêi pơkeăng Nhi kong pơlê kô cho 2 to hngêi pơkeăng ki má mơ’nui vâ tơdah xo pơlât mâu ngế tâ pơreăng drêng ai pơreăng Covid-19 tâ tú tung kong pơlê.

A mâu tíu xiâm khăm pơlât tơring, pơlê kân, pơlê kong kơdrâm; Hngêi pơkeăng 331; Hngêi pơkeăng Quân y 211 pơrá hbrâ rơnáu kế tơmeăm, mâu ngế cheăng, hbrâ rơnáu tơdah xo mâu ngế ki nhôm tâ pơreăng Covid-19 vâ khăm, séa ngăn, tiâ mơnhên tiô pơkâ dêi Khu xiâm ngăn pơkeăng [ă khăm pơlât. Sap ing hâi lơ 10/2 troh nôkố, mâu hngêi pơkeăng dêi kong pơlê Gia Lai ôh tá ai ngế ki lâi nhôm tro tâ pơreăng Covid-19.

Katarina Nga tơplôu [ă tơbleăng