VOV4.Sêdang - Kơxê lơ 18/10, pôa Vương Đình Huệ, Kăn xiâm hnê ngăn Kuô̆k hô̆i hiăng pêi cheăng ƀă ƀơrô Kuô̆k hô̆i ƀă mâu kơ koan tơdjâk troh ‘na tơdroăng hbrâ  vâ tơkŭm po hneăng hôp roh má péa, Kuô̆k hô̆i hneăng 15 kô hôp a kơxo lơ 20/10. Tiô Ngế chêh tôm xo rơkong Kuô̆k hô̆i, Ngế pơkuâ Ƀơrô Kuô̆k hô̆i, mâu tơdroăng ki kal a rôh hôp hiăng chêh tŭm pơtroh ăm Kuô̆k hô̆i. Tơdroăng hbrâ ‘na hnê tối, tơmeăm, kih thuât, kring tơniăn, rak tơniăn  tung tŭm tơdroăng, a tơdroăng tơdah, ‘na hmê kâ, ‘na  hbrâ mơdât  pơreăng vâ tối hiăng hbrâ tâi.

Rôh hôp drêng kố mơ-eăm pro kơdroh hâi pêi cheăng (tiô tối hdrối dâng 17 hâi) la xuân thế pro tơniăn ki tơ-brê mâu pơkâ dêi Kuô̆k hô̆i ƀă ki mơnhông tơƀrê dêi tơnêi têa tung hơnăm 2022 ƀă mâu hơnăm pơtối, tơniăn hbrâ mơdât pơreăng COVID-19. Tung pơla tơkŭm po hneăng hôp, pôa Vương Đình Huệ, Kăn xiâm hnê ngăn Kuô̆k hô̆i thế xuá tro hâi chôu tơpui tơno a tôh ƀă a tíu hôp; pơtối pơ’lêh nếo ƀă mơdêk tơ-ƀrê tơdroăng chêh xo mâu tơdroăng tơpui a hneăng hôp, tơkŭm tâi tâng mâu tơdroăng hnê tối tơpui tơno ƀă tối mơnhên mâu tơdroăng kơ-êng ai pơkâ tơpui tơno.

Tơdrêng amê, Kăn xiâm hnê ngăn Kuô̆k hô̆i tối nhên, thế mơdêk hnoăng cheăng dêi tôh Đảng, mơdêk nếo hnoăng cheăng pêi, rơkong tơpui dêi mâu kăn Kuô̆k hô̆i cho teăng mâ tơdroăng púi vâ dêi kuăn pơlê, pro pơxúa tơchoâm ăm tơnêi têa, tơpui tơno nhên rơhí rơhó, tơdroăng mơnhông mơdêk tơchoâm.

Gương tơplôu ƀă tơbleăng