VOV4.Xơ Đăng - A tơring Ea Hleo, kong pơlê Dak Lak, kơvâ ngăn hnê hriâm hiăng tơbleăng rơkê mâu túa pơkâ ki hnê tơdrêng ƀă hnê ing troăng hyôh Internet rak tơniăn ăm hok tro tung pơla pơreăng COVID-19 tâ tú rơ-iêo.

Lối môi măng tĭng kố, klêi pơreăng COVID-19 hiăng kâi mơdât, Hngêi trung râ má môi Ea Hleo, tơring Ea Hleo hiăng rĕng vêh po ăm hok tro hriâm a lâm. Thái Nnguyễn Văn Tân, Ngế pơkuâ hngêi trung ăm ‘nâi, nôkố hngêi trung ai 16 to lâm ƀă ai 523 ngế hok tro, tung mê hok tro hdroâng kuăn ngo 216 ngế.

‘’Vâ tơniăn tơdroăng hnê hriâm ăm mâu vâ o, vâi muăn, hngêi trung xuân hiăng tí tăng ‘nâi plĕng ƀă rêm râ xôh pơkeăng, mơgrúa krúa hngêi trung lâm hriâm, hbrâ têa xếo kŏng. Hngêi trung tơkŭm klâ iâ mơngế tung lâm hriâm vâ tơniăn ‘na kơxô̆ hok tro hriâm pá xôp 30 ngế hok tro tung môi lâm. Hngêi trung tí tăng ‘nâi plĕng ăm rêm râ pâk tŭm ăm mâu kăn ƀô̆, mâu ngế pêi cheăng tung hngêi trung.

‘Na kơxô̆ hok tro thế pơtê ‘nôi lăm hriâm xua tơdroăng vâi o klâ ối kơtăn, klâ ối krê, mê hngêi trung hiăng pơkâ troăng rơhlâ hnê ăm mâu vâi o ki mê ƀă tơdroăng chiân pơcháu ăm vâi ƀai hriâm’’.

Hngêi trung râ má môi Ea Hleo po ăm hok tro hriâm a hngêi trung

O Nguyễn Phạm Bảo An, hok tro lâm 5A, Hngêi trung râ má môi Ea Hleo phiu ro xua châ vêh hriâm a hngêi trung klêi to lâi khế pơtê xua klâ kơtăn xua ai pơreăng:

‘’Drêng á troh a hngêi trung á tâ hơniâp ro  xua châ trâm vâi pú, mâu thái cô. Drêng á hriâm a hngêi mâu ƀai ki pá á ôh tá châ kơ-êng cô bú êng ƀă tin nhắn tungalo tê. Hriâm a hngêi trung kố á châ hmâng kô hnê, tâng ôh tá hlê  kô êng cô amê hlối’’.

Rơkê ƀeăn mâu tơdroăng hnê ƀă hriâm a hngêi trung - hriâm tiô troăng hyôh internet, lơ pơcháu ăm ƀai hriâm… ngăn tiô kơ tơdroăng pơreăng COVID-19 tâ tú rơ-iô lơ ôh, hiăng châ mâu hngêi trung a tơring Ea Hleo, kong pơlê Dak Lak po hnê a tơring Ea Hleo pêi pro plĕng rơkê. Cô Nguyễn Thị Minh Trường, Ngế phŏ pơkuâ hngêi trung râ má môi Ea Khăl ăm ‘nâi: vâ tơdroăng hnê hriâm tiô troăng hyôh Internet châ tơ-ƀrê, hngêi trung hiăng ‘no liăn tăng pro troăng hrik hyôh Internet, mơjiâng tơdroăng pơkâ hnê hriâm ăm tơ-tro; thái cô hbrâ ƀai hriâm tiô troăng rơhlâ ki nếo, rah tăng tơdroăng hnê ki kal, vâ tối, tâi tâng mâu hok tro chôu pâ ƀai hriâm.

Vâ chê 500 ngế hok tro, tung mê ai 210 ngế vâi o hok tro hdroâng kuăn ngo hriâm a Hngêi trung râ má môi Ea Khăl, cheăm Ea Khăl, tơring Ea HLeo hiăng hmâ ƀă tơdroăng hriâm tiô troăng hyôh Internet.

“Hngêi trung xuân tơkŭm po ăm mâu vâi o ki lâi châ hriâm tiô troăng hyôh Internet, mâu vâi o ki mê hngêi ối achê dêi rơpó hriâm môi khu lâm há kô chiâng tơkŭm ƀă lâm ki ê vâ hriâm tơchoâm, ‘nâ hía péa ngế, pái ngế hriâm tơchoâm môi toăng kơmăi. Mâu vâi o ki lâi oh tá ai tơmeăm vâ hriâm tiô troăng hyôh internet mê hngêi trung kô po tơkum pơcháu ăm vâi ƀai hriâm. Ai mâu vâi o ki ‘nâ xua ai nôu pâ lăm pêi cheăng u ê  vêh mâu vâi o ôh tá chiâng vâ lăm troh a hngêi trung, ôh tá chiâng lăm a hngêi dêi pú vâ hriâm tơchoâm mê thái cô kô lăm pôu a hngêi chiân pơcháu ăm vâi o ƀai hriâm.

Mâu ngế ki lâi ối a kơpong klâ krê mâu thái cô kô ôh tá chiâng vâ lăm troh chiân ăm vâi ƀai hriâm mê kô kơnôm ăm mâu kăn a pơlê cheăm ki mê, lơ tôh COVID tung kuăn pơlê kum chiân ăm’’.

Hnê hriâm a hngêi trung, mâu hngêi trung thế pêi pro tơniăn tung tơdroăng hriâm pơla tơchoam dế ai pơreăng

Tơring Ea Hleo nôkố ai 67 toăng hngêi trung hriâm ƀă ai lối 29 rơpâu ngế hok tro ing mầm non troh râ má péa. Pôa Phạm Văn Đảng, Ngế xiâm ngăn Ƀơrô ngăn Hnê hriâm ƀă hnê mơjiâng tuăn ngôa rơkê tơring Ea Hleo ăm ‘nâi: Xua pơreăng xuân ối tâ tú kâi kâi mơdât, lâp tơring nếo ai tơdế kơxô̆ hngêi trung hriâm hơ’lêh hriâm a hngêi trung. Tơdroăng hnê hriâm tơniăn tung hbrâ mơdât pơreăng đi châ hngêi trung tơmâng pro kơtăng.

Mâu hngêi trung hriâm đi đo tơkŭm po séa ngăn, riân mâu hok tro ki ai nôu pâ nhŏng o lo ing kơpong ai pơreăng dế klâ kơ tăn, klâ krê a hngêi vâ ai troăng rơhlâ pơkâ ăm hriâm ki tơtro:

‘’ ‘Na peăng ƀơrô ngăn Hnê hriâm ƀă hnê mơjiâng tuăn ngôa rơkê hiăng ai hlá mơ-éa hnê mơhno ăm mâu hngêi trung thế mơjiâng pơkâ, chêh tơdroăng vâ hnê. Ƀă rêm ngế thái cô thế mơjiâng tơdroăng pơkâ hnê ăm lâm tơná tơ-tro, tung mê tơmâng troh tơdroăng ki tơ-ƀrê tung hnê  hriâm ăm tơrêm ngế hok tro. Mơhé tơdroăng hnê túa ki lâi mê tơdroăng hnê ki xiâm dêi ƀai hriâm ăm hok tro thế chôu pâ tung tuăn, drêng  kiêm tra ƀai hriâm troh dâng lâi kô  ăm pro ƀai troh dâng mê. Mơdoh hâi chôu ki dế lĕm drêng vâi o troh lăm hriâm a hngêi trung vâ tơbâ ăm vâi tơdroăng ki hiăng hnê hriâm tung pơla vâi hriâm a hngêi tiô troăng hyôh Internet vâ tơniăn, ngăn vâi chôu pâ tơdroăng hnê, hlê ƀai to lâi, chiâng pro ƀai  há lơ ôh.

Drêng ai tơdroăng ‘na F0 a kơpong ki mê ôh tá tơniăn mê thế pơ’lêh ăm vâi o hriâm tiô troăng hyôh Internet nếo, pơcháu ƀai nếo. Tâng hiăng pơ’lêh chiâng kơpong ngiât hlo hiăng tơniăn, mê vêh po hnê hriâm tơniăn Khu hnê mơhno dêi cheăm, Ngế pơkuâ hngêi trung thế tơbleăng ăm mâu vâi o lăm hriâm a hngêi trung nếo’’.

Troh nôkố, a tơring Ea Hleo thái cô ƀă hok tro ôh tá hơngế xếo tung tơdroăng pơ’lêh hriâm tiô kơ tơdroăng pơkâ tung hriâm. Tơdroăng hbrâ ăm hnê hriâm tiô troăng hyôh internet xuân môi tiah hriâm a lâm a mâu hngêi trung hiăng po tơtro, chôa ‘lâng, tơ‘lêi há kum mâu vâi o teăm hriâm tiô tơdroăng pơkâ tung hnê hriâm.

Tuấn Anh chêh

Gương tơplôu ƀă tơbleăng