Ngế rak ngăn dêi kuăn ki kơbrĕn ngôa pơlât a Khoa Khám - Hồi sức cấp cứu, Hngêi pơkeăng pơlât mâu ngế kơbrĕn ngôa kong pơlê Dak Lak, nâ H’Loanh Niê, ối a cheăm Čư̆ Dliê Mnông, tơring Čư̆ Mgar ăm ‘nâi, kuăn nâ kơbrĕn ngôa sap ối kŭn, kơnôm ôu pơkeăng mê tơdroăng kơbrĕn ngôa dêi kuăn nâ chía kơdroh iâ. La mâu hâi achê kố, kong tô ó, pơ-oh ton hâi, pro tơdroăng ki kơbrĕn ngôa sap ối kŭn nah dêi muăn chiâng rế râ, đi đo tâng troh dêi chôu kơƀrĕn pro gá chiâng kơdrâ rơxá ƀă gá ôh tá ’nâi ki klâi.

“Hmâ hlo rêm xôh pơtê ôu pơkeăng tro hlối. Rôh kố ôu pơkeăng rêm hâi xuân ối tro, mơni xua kong tô pơ-oh ó mê. Môi hâi hlo gá kơdrâ rơxá 1 hdroh ăm ôu pơkeăng, la ôh tá kâi hlo kơdroh, hlo 3 - 4 xôh mê chiâng djâ mot pơlât a hngêi pơkeăng’’.

Ối tơdjuôm tung môi veăng ƀă kuăn nâ H’Loanh cho Nguyễn Đức Lĩnh, kot mâ hơnăm 2000, a cheăm Trung Hòa, tơring Čư̆ Kuin. Tiô jâ Nguyễn Thị Qùy, nôu ngế ki kơbrĕn ngôa tối, kơtăn kố 5 hơnăm, xua pêi cheăng hên luâ râ, ngoh Lĩnh tro pơreăng hlâ lok  ƀă châ pơlât. To lâi hơnăm hdrối mê hía nah, ngoh Lĩnh rêh ối ƀă pêi cheăng môi tiah hmâ tá hlo ai tơdroăng klâi. Kơtăn kố 2 khế, ngoh Lĩnh ôh tá ôu pơkeăng tro tiô ƀok thái pơkeăng hnê, tơ’nôm kong tô ó pro pơreăng hlâ lok dêi ngoh pơtối vêh tro nếo ƀă klêi mê djâ ngoh lăm pơlât a hngêi pơkeăng:

“Kong tô ó luâ râ mê gá kơdrâ rơxá môi péa hdroh, tơdroăng hlâ lok  hên tâ. Ấ djâ muăn mot pơlât a hngêi pơkeăng, hlo ƀok thái pơkeăng pâk ăm muăn hlo muăn koi môi iâ, nôkố chía kơdroh iâ, la xuân hâi tơleăng’’.

Tiô chêh tối dêi Khoa khám - Hồi sức cấp cứu, Hngêi pơkeăng pơlât Kôk- Rơxok kong pơlê Dak Lak, sap khế 3 troh nôkố, tâng riân rêm hâi, Khoa tơdah khám lối 100 hdroh ngế, tâk dâng 20% tâng vâ pơchông ƀă hdrối nah, kơxô̆ mơngế mot pơlât a hngêi pơkeăng xuân tâk. Ƀok thái pơkeăng Nguyễn Thị Bé, Ngế pơkuâ Khoa Khám – Hồi sức cấp cứu,  Hngêi pơkeăng pơlât Kôk - Rơxok kong pơlê Dak Lak tối, mâu ngế vêh tro rơxok tung pơla kố cho tro kôk, rơxok xua kơbrĕn ngôa, kơbrĕn troăng veăn, ôh tá vâ tơpui, ‘mêi tung tuăn ngôa, ‘mêi tung tuăn tơchĕng tơmiât ƀă hên ki ê...

Hên ngế mot pơlât a hngêi pơkeăng hmôu pơ to kơdrâ, hmôu pơ xâu, tơmiât hmâng vâ mâu tơdroăng ôh tá xê, ‘nêk tơmeăm, tơkêk mơdêi... Ki xiâm ăm hlo kơxô̆ mơngế mot pơlât tâk rế hên, tung pơla mê kong prâi pơ’lêh, kong tô luâ râ cho xiâm ki tơdjâk pro vâi rế chiâng kôk, rơxok, pro ‘mêi ivá dêi rêm ngế, malối ƀă mâu ngế pêi cheăng tơdroăng hngăm hngo tung hiâm mơno, tuăn tơchĕng tơmiât hên, mâu hiăng krâ ki tung châ hiăng ai tơdroăng châi, vâi kơdrâi klêi mơhum kuăn ngá...

Vâ kơdroh tơdroăng vêh tro nếo pơreăng pro kơbrĕn ngôa a mâu ngế ki kôk, rơxok, tung pơla kố, rơpŏng hngêi thế tơmâng khât mơngế mơngế ki kơbrĕn ngôa. Drêng hlo vâi ôh tá vâ ôu têa, ôh tá vâ kâ hmê, ôh tá ‘nâi chiâng koi, ôh tá kâi ối, môi tiah ai tơdroăng ‘mêi ti lâi hía tung châ, mâu ngế tung rơpŏng hngêi ôh tá kâi ngăn mê thế rĕng djâ a hngêi pơkeăng vâ teăm pơlât vâ ví pơreăng ki mê pro ah rế chiâng rơ-iô. Ƀok thái pơkeăng Nguyễn Thị Bé hnê tối hdrối:

“Hlo kong tô ó hlối pơ-oh, thế hnê ăm mâu ngế ki kơbrĕn ngôa mê ôu pơkeăng tŭm, ôu tro rêm hâi tiô ƀok thái hnê. Tung pơla kố ăm ôu têa hên vâ ăm pơkeăng tung mơheăm kơtâu tơ’mô. Ƀă mâu ngế ki chiâng lăm pêi cheăng thế ví pôi tá ối tung kong tô ó, pôi tá pêi cheăng tung pơla chôu ki tô ó''.