VOV4.Sêdang - Kơxo lơ 19/10, a Hngêi Kuô̆k hô̆i, pôa Vương Đình Huệ, kăn xiâm hnê ngăn Kuô̆k hô̆i pơkuâ po rôh hôp má 2 Khu hnê mơhno tơdroăng tơkêa ‘na mơjiâng ƀă pêi klêi Tơnêi têa hnoăng pơkuâ xah hô̆i chuh ngiah Việt Nam troh hơnăm2030 pơkâ troăng pêi pro troh hơnăm 2045.

A rôh hôp kố, Khu hnê mơhno cheăng séa ngăn tơbleăng kơxop hlá mơ-éa tối tơbleăng ‘na tơdroăng kơxô̆ 10 pêi klêi mâu tơdroăng pơkâ, tơrŭm ƀă séa ngăn pơla mâu kơ koan tơnêi têa tung pêi pro hnoăng pơkuâ luât pơla mâu kơ koan, khu tơrŭm tung tơdroăng cheăng luât pêi pro châ tiô tơdroăng ki pơkâ thế mơjiâng, pêi klêi Tơnêi têa hnoăng pơkuâ xah hô̆i chuh ngiah Việt Nam.

Kăn xiâm hnê ngăn Kuô̆k hô̆i pơkuâ po rôh hôp má 2 Khu hnê mơhno tơdroăng tơkêa ‘na mơjiâng ƀă pêi pro klêi Tơnêi têa hnoăng pơkuâ xah hô̆i chuh ngiah Việt Nam

Tơpui mơgêi rôh hôp, pôa Vương Đình Huệ pơkâ thế, pŭn hlá mơ-éa ki tối tơbleăng ‘na tơdroăng xiâm châ tơpui tơno pơrá ai mâu tơdroăng pơkâ tơdjuôm, mê cho, tơnêi têa luât pơkuâ cho ki kơnía tơdjuôm dêi kuăn mơngế. Túa pơkâ Tơnêi têa hnoăng pơkuâ xah hô̆i chuh ngiah Việt Nam rế ai tơdroăng séa ngăn tơdjuôm dêi kuăn pơlê, rế ai tơdroăng kal xiâm krê, pơkâ troăng xah hô̆i chuh ngiah.

Kơ koan Tơnêi têa xuân ai tơdroăng ki pơkâ phá ‘na tơdroăng pơkâ tơkŭm tơniăn krê, pơkâ hnoăng ivá Tơnêi têa, môi tuăn ƀă tơdroăng ki xing xoăng, tơrŭm séa ngăn pơla mâu kơ koan pêi pro hnoăng pơkuâ. Xua mê, mâu tơdroăng ki xiâm kal séa ngăn, pêi pro kơtăng, rak tơniăn mơhno tối nhên mâu tơdroăng pơkâ ki xiâm.

Katarina Nga tơplôu ƀă tơbleăng