VOV4.Sêdang - Kơxê lơ 18/10, a Hà Nội, pôa Nguyễn Xuân Phúc, Kăn xiâm hnê ngăn tơnêi têa, kăn xiâm hnê ngăn Hô̆i đong ‘na lêng kring tơniăn, veăng leh khĕn kơdeăn mâu khu pú hên ƀă mâu ngế ki ai hnoăng pêi cheăng kơhnâ rơkê ƀă mâu ngế ki mơ-eăm tung kring vế tơniăn lĕm khu lâp kong têa. Ing khế 6 hơnăm 2014 troh nôkố, Việt Nam hiăng rah thế 246 hdroh ngế kăn ƀô̆, mâu ngế pêi cheăng dêi mâu lêng Việt Nam lăm pêi hnoăng cheăng kring tơniăn khu lâp kong têa a mâu khu Nam Sudan, Kŏng hòa Trung Phi ƀă Tíu pêi cheăng khu lâp kong têa a New York, kong têa Mih.  

Tung mê, ai 3 to hngêi pơkeăng pơtân râ má 2 châ Khu lâp kong têa khĕn kơdeăn ivá pêi cheăng ƀă hlối rơkê ‘na tơdroăng cheăng tung khăm pơlât, mâu ngế ngăn pơkeăng, ƀok thái pơkeăng Việt Nam, mơhno tơdroăng ki lĕm tro ƀă mâu ngế ki châi tamo xua hnoăng pêi pro  ‘nâi mơ-eăm, ƀă kơhnâ pêi tâi hiâm mơno, xúa mơngế ki châi tamo.

Teăng mâ kăn xiâm Đảng, Tơnêi têa, pôa Nguyễn Xuân Phúc, Kăn xiâm hnê ngăn tơnêi têa khĕn kơdeăn mâu hnoăng mơ-eăm dêi mâu khu lêng kring vế hơniâp lĕm lâp kong têa, pâ thế Khu xiâm pơkuâ ngăn lêng rơtế ƀă Khu xiâm, kơvâ cheăng pơtối pêi tơ-ƀrê tơdroăng tơkêa tâi tâng ‘na Việt Nam veăng kring vế hơniâp lĕm khu lâp kong têa hiăng châ Khu xiâm kal kí tơbleăng.

Gương tơplôu ƀă tơbleăng