VOV4.Sêdang - Klăng roh leh tơbâ 60 hơnăm Hâi po Troăng Hồ Chí Minh a têa kơxĭ Biển Đông, lơ 23/10/1961 – 23/10/2021, kơxê lơ 19/10, a tíu pêi cheăng Kăn xiâm hnê ngăn tơnêi têa, pôa Nguyễn Xuân Phúc, Kăn xiâm hnê ngăn tơnêi têa trâm mâ khu râ kăn teăng mâ mô đô̆i hneăng hdrối nah Troăng Hồ Chí Minh a têa kơxĭ ƀă teăng mâ mâu kăn ƀô̆, mâu lêng Kuân chủng Lêng tuk  châ tơƀrê hên, hnoăng tơplâ ki rơkê, ki má lối rơkê păng ‘nâng.

Xông tơpui a roh trâm mâ, Kăn xiâm hnê ngăn tơnêi têa mơnhên, tơdroăng po troăng Hồ Chí Minh a têa kơxĭ mơhno troăng tơmiât pêi ton xŏn la ngiâ, tơmiât pêi rơkê, hlê plĕng tơtro, rơkê ƀă tuăn pâ dêi Đảng ƀă Pôa Hồ nhuô̆m pâ. Ƀă mâu mô đô̆i hneăng hdrối nah troăng Hồ Chí Minh a têa kơxĭ, pôa Nguyễn Xuân Phú, Kăn xiâm hnê ngăn tơnêi têa pói vâ rêm ngế mô đô̆i hneăng hdrối nah pơtối mơnhông khôi túa khên tơnôu ó rơdêi, ƀlêi trâng dêi Khu lêng tuk ‘’ôh tá ai kơxô̆’’ vâ troh tá ah cho mâu um méa ki bâ eăng ‘na chuh ngiah khên tơnôu kăch măng dêi hiâm mơno khên tơnôu, tơmiât pêi krá chân, đi đo mơ-eăm veăng mơjiâng rơpŏng, pơlê xiâm, tơnêi têa rế hiá rế kro mơdrŏng lĕm tâ.

A Sa Ly tơplôu ƀă tơbleăng