VOV4.Sêdang - Hâi lơ 21/10, a Tíu pêi cheăng Kăn xiâm hnê ngăn tơnêi têa, pôa Nguyễn Xuân Phúc, Kăn xiâm hnê ngăn tơnêi têa hiăng diâp pơkâ tơ’nôm kăn teăng mâ hneăng hơnăm 2021 – 2024 kơpong châu Âu ƀă Trung Á ăm 8 kăn teăng mâ. A roh trâm mâ, teăng mâ ăm mâu Kăn teăng mâ tơdah hnoăng cheăng, mâu Kăn teăng mâ tối phiu ro kân kĭn tơdah hnoăng cheăng Đảng, Tơnêi têa ƀă kuăn pơlê pơcháu ăm, tơdrêng amê mơnhên kô mơ-eăm hên tâ mê, tơrŭm ƀă mâu kơ koan tung tơnêi têa ƀă kong têa ê, pêi pro tro troăng hơlâ tơpui kâ dêi Hneăng hôp Đảng lâp tơnêi têa roh má XIII.

Pôa Nguyễn Xuân Phúc, Kăn xiâm hnê ngăn tơnêi têa xông tơpui a leh pơcháu pơkâ

Teăng mâ khu râ kăn pơkuâ Đảng, Tơnêi têa, pôa Nguyễn Xuân Phúc rơkâu mâu kăn teăng mâ châ Đảng, Tơnêi têa loi tơngah pơcháu hnoăng cheăng a mâu kong têa a kơpong châu Âu. Kăn xiâm hnê ngăn tơnêi têa tối nhên, kố hnối cho phiu ro kân ƀă xuân cho hnoăng cheăng ƀlêi trâng ki Đảng, Tơnêi têa ƀă kuăn pơlê loi tơngah pơcháu ăm mâu Kăn teăng mâ. Kố cho roh rah xo kăn teăng mâ roh má péa klêi kơ’nâi Hneăng hôp Đảng lâp tơnêi têa roh má XIII, Kăn xiâm hnê ngăn tơnêi têa vêh tối rơdêi troăng tơpui kâ dêi Việt Nam klêi kơ’nâi Hneăng hôp Đảng xuân môi tiah pơkâ pêi troh hơnăm 2045, Việt Nam chiâng tơnêi têa pêi lo liăn hên.

A Sa Ly tơplôu ƀă tơbleăng