VOV4.Sêdang - Hdrối chôu vâ pơxiâm po hneăng hôp má péa Kuô̆k hô̆i hneăng má 15, mâu kăn pơkuâ Đảng, Tơnêi têa, Măt trâ̆n tơnêi têa Việt Nam, mâu kăn Kuô̆k hô̆i veăng hôp a tíu ki tơdjêp Hngêi Kuô̆k hô̆i troh ‘măn reăng ƀă mot ngăn tíu ‘măn poăng pôa Hồ Chí Minh.

Kăn xiâm pơkuâ Đảng, Tơnêi têa ƀă Khu kuăn Kuô̆k hô̆i pôu ngăn tíu ‘măn poăng pôa Hồ Chí Minh

Veăng a leh pôu ngăn ai pôa Nguyễn Xuân Phúc, kăn xiâm hnê ngăn tơnêi têa, pôa Phạm Minh Chính, Ngế pro xiâm hnê ngăn Chin phuh; pôa Vương Đình Huệ, kăn xiâm hnê ngăn Kuô̆k hô̆i; pôa Đỗ Văn Chiến, kăn xiâm Vi ƀan xiâm Măt trâ̆n Tơnêi têa Việt Nam rơtế ƀă mâu ki cheăng tung tíu xiâm kal kí, kăn pơkuâ ngăn tíu xiâm Đảng, mâu kăn xiâm phŏ hnê ngăn Kuô̆k hô̆i.

Ngế pro xiâm phŏ hnê ngăn Chin phuh, kăn pơkuâ mâu khu xiâm, kơvâ cheăng, mâu kăn Kuô̆k hô̆i ki veăng hôp a Hà Nội rơtế văng lăm pôu ngăn. Hơvĭng reăng dêi khu kăn kố ai chêh chư “Plâ rơxông chôu pâ Hồ Chí Minh khên tơnôu”.

Katarina Nga tơplôu ƀă tơbleăng