VOV4.Sêdang - Kơxo lơ 22/10, a pơlê kong kân Hải Phòng, kăn pơkuâ ngăn Đảng lêng xiâm tơnêi têa, Khu xiâm pơkuâ ngăn lêng tơkŭm po leh kân krip tơbâ 60 hơnăm Hâi po troăng Hồ Chí Minh a têa kơxĭ (23/10/1961 -  23/10/2021). Pôa Nguyễn Phú Trọng, Kăn xiâm pơkuâ hnê ngăn Đảng veăng leh. Tung rôh tơplâ xâ Mih tŏng kum tơnêi têa, hdrối tơdroăng kal pêi tơdrêng thế teăm kum ăm tíu tơplâ peăng hdroh, hâi lơ 19/5/1959,  Kăn pơkuâ ngăn Đảng lêng ƀă Khu xiâm pơkuâ ngăn lêng pơkâ mơjiâng Khu pêi cheăng dêi mâu lêng rơkê” (klêi pơ’lêh inâi cho Đoân 559), ai hnoăng cheăng  po troăng chơ tơmeăm, tơkŭm chơ djâ, tơdah mố đô̆i, kăn ƀô̆ ing peăng Kơnhŏng mot a peăng Hdroh ƀă ing peăng Hdroh vêh peăng Kơnhŏng.

Klêi kơ’nâi tí tăng ‘nâi plĕng, mơnúa ƀă hbrâ tŭm tơdroăng, hâi lơ 23/10/1961,  Khu xiâm pơkuâ ngăn lêng pơkâ mơjiâng Đoân 759 chơ lêng prôk troăng têa kơxĭ. Pơxiâm ai khu đoân 759 tơdrêng ƀă tơdroăng po troăng chơ tơmeăm  khoăng  ing peăng Kơnhŏng troh peăng Hdroh a têa kơxĭ cho tơdroăng ki hdró po troăng chơ tơmeăm a têa kơxĭ ăm peăng Hdroh pơxá inâi Hồ Chí Minh  pâ nhoăm.

Khế hơnăm hiăng luâ troăng Hồ Chí Minh a têa kơxĭ xuân u ối đi đo cho tơdroăng ki hâk tơngăm dêi mâu Lêng pin ƀă mâu lêng Việt Nam, tơmeăm ki mơhno eăng bâ dêi chuh ngiah khên tơnôu kăch măng, tuăn rơkê plĕng, hiâm mơno khên tơnôu, tuăn mơ-eăm chân krá, khŏm mơ-eăm tơplâ vâ pro tơleăng lĕm dêi tơnêi têa, lâp tơnêi têa tơrŭm môi hdrê hdroâng mơngế.

Gương tơplôu ƀă tơbleăng