VOV4.Sêdang - A kong pơlê Kon Tum tung 24 chôu hiăng hluâ ai kong mêi ƀă râ kân, kơxô̆ kong mêi châ sap ing 80 – 240 mm ƀă khu râ kăn pơkuâ kong pơlê hiăng châ hlo tơmeăm tro lŭp. Kơxo lơ 17/10, Vi ƀan kong pơlê Kon Tum ai mơ-éa ki thâ pơtroh mâu tíu cheăng, kơvâ cheăng ối tung kong pơlê ƀă Vi ƀan 10 tơring, pơlê kong kơdrâm hbrâ mơdât kong mêi, têa kân lân lu, têa rơlêa ƀă tơnêi tơhnah tơhnâp.

Kông vế a têa kroăng Pô Kô a pơlê kân Đăk Glei, tơring Đăk Glei tro tơhnah tơhnâp

Tơdroăng ki tro lŭp apoăng xua kong mêi têa kân lân lu hiăng hlo a mâu troăng kân. Xua kong mêi kân, têa a mâu têa kroăng, têa plông đik kân, a tơring Đăk Glei, môi to kông vế a têa kroăng Pô Kô tơdjêp pơlê kân Đăk Glei ƀă 2 thôn Đông Sông, Đông Thượng hiăng tro têa kân lân lu mơhiu. Khu râ kăn pơkuâ tâp kơƀăng tơbleăng tối, pơtroh mơngế gâk hnê mơhno kuăn pơlê prôk ing kông ki ê.

Tíu têa kân lân lu a troăng mot a cheăm Đăk Pxi, tơring Đăk Hà

Tơdroăng kong mêi têa kân lân lu pro tơhnâp kơnâng troăng chiâng pro chôm troăng prôk, nôkố xuân ai tơdroăng chôm a mâu troăng a tơring Kon Plông ƀă Tu Mrông.

A Sa Ly tơplôu ƀă tơbleăng